Tepetepet na Saray Manbabasa

Kapigan nibantak si Satanas diad dalin?​—Apo. 12:1-9.

Anggaman say libro na Biblia ya Apocalipsis et ag-angiter na eksakton panaon na inkibasileng nen Satanas, walaray sinalambit ton nantutumbokan ya ebento a makatulong ed sikatayon nakalkula no kapigan itan agawa. Say unona ed saraya et say inkiletneg na Mesianikon Panarian. Kayari na satan, “agawa so sakey a baleg a bakal ed tawen,” a diad satan et atalo si Satanas tan insan sikatoy nibantak diad dalin.

Malinlinew ya ipapabitar na Kasulatan a say 1914 so taon ya angangga so “aturo iran panaon na saray nasyon” tan niletneg so Panarian.a (Luc. 21:24, NW) Kayari na inkiletneg na satan, pigaran panaon ni linmabas sakbay ya agawa so bakal ed tawen a nanresulta’d inkibasileng nen Satanas diad dalin?

Oniay ibabaga na Apocalipsis 12:4: “Say dragon [si Satanas] tinmunda ed arap na bii a ngalngali mananak, pian akmonen to so anak to, no nananak la.” Ipapanengneng na satan a labalabay nen Satanas, no nayari, a deralen a tampol so kapkapangiletneg a Panarian. Anggaman ag-inabuloyan nen Jehova a nagawa itan a marelmeng a getma nen Satanas, siansia nin determinado si Satanas tan ag-ontutunda ed sagpot ton deralen iyan kapkapangiletneg a Panarian. Kanian, satan so makasengeg no akin a tamtampol a kinmiwas “si Miguel tan saray anghel to” a mangekal ed “samay dragon tan saray anghel to” ed tawen, diad ontan et agnagirogiro so Panarian. Mapatnag sirin a say inkatalo tan inkibasileng nen Satanas et agawa kayarin tuloy na inkiletneg na Panarian nen 1914.

Say sananey nin bengatlan ikonsidera et say inkioli na saray alanaan a Kristiano, ya unong ed saray ebidensia a walad Kasulatan, et ginmapo kayarin tuloy na inkiletneg na Panarian.b (Apo. 20:6) Lapud ag-asalambit a kaiba nen Kristo iray alanaan ya agagi to ed impibakal to ed dragon tan saray demonyo, nibagan agawa la imay bakal ed tawen tan say inkibasileng nen Satanas tan saray demonyo antis a ginmapo so inkioli na saray agagi nen Kristo.

Ag-ibabaga sirin na Biblia so eksakton panaon na inkibantak nen Satanas tan saray demonyo to diad dalin. Anggaman ontan, mapatnag ya agawa itan kayarin tuloy na inkitrono nen Jesu-Kristo diad tawen nen 1914.

[Saray paimano ed leksab]