Jesu-Kristo​—Say Epekto na Mensahe To

“Say sankabiskegan ya ebidensya na karunongan na samay too a nanlapud Capernaum et napapakiwas to nin siansia iray puso tan nonot na totoo diad maaron paraan to.”a​—AUTOR A SI GREGG EASTERBROOK.

MAPUERSA iray salita. No saratan et pinilin maong tan napnoy karunongan, saratan so mamakiwas na kapusoan, mamabiskeg na ilalo, tan makapanguman na bilay. Anggapo lay arum a mas mapuersa ni nen say mensahe nen Jesu-Kristo. Oniay insulat na samay akarengel ed kabkabat a Sermon nen Jesus ed Palandey: “Kasumpal nen Jesus a sinalita iraya, nikelawan iray totoo ed paraan na panagbangat to.”​—Mateo 7:28.

Anggad natan, maslak ed saray balikas nen Jesus et kabkabat na totoo diad interon mundo. Nengnengen pay pigaran balikas to a makabkabaliksan.

“Agkayo nayarin manpaaripen ed Dios tan ed saray Kayamanan.”​—Mateo 6:24.

“Sirin, amin a bengatlan labay yon gawaen na totoo ed sikayo, ontan met so nepeg yon gawaen ed sikara.”​—Mateo 7:12.

“Ibayar yo . . . ed Cesar iray bengatlan kien nen Cesar, balet dia ed Dios iray bengatlan kien na Dios.”​—Mateo 22:21.

“Mas makapaliket so mangiter nen say mangawat.”​—Gawa 20:35.

Balet, sarayan balikas nen Jesus et aliwa lambengat a makatantanda. Say mensahen impulong to et mapuersa lapud ipapaamta na satan ed totoo so katuaan nipaakar ed Dios, say tuan kabaliksan na bilay, tan say solusyon ed paniirap na katooan​—say Panarian na Dios. Legan tayon aaralen iyan mensahe diad ontumbok iran pahina, natalosan tayo no akin a napapakiwas nin siansia nen Jesus so “puso tan nonot na [minilyon] diad maaron paraan to.”

[Paimano ed leksab]