Aligen so Pananisia Ra

Imbesngaw To ed Dios so Walad Puso To

SAY nilimeng la nen Hana et say pampaparaan to parad pambiahe ra ta pian agto la nanonotan iray problema to. Niyugali la nen asawa ton si Elkana ya ipila so interon pamilya ed tinaon a piesta’d tabernakulo diad Shiloh, kanian malikeliket komon iyan panaon. Tan talagan labay nen Jehova ya maliket irayan okasyon. (Deuteronomio 16:15) Seguradon nen ugaw ni Hana et panlikliketan to irayan piesta. Balet ta anguman lay situasyon to.

Si Hana et inar-aron maong na asawa to. Balet ta wala ni sakey ya asawa nen Elkana, si Penina. Andi lay ginawa nen Penina et sakitay liknaan nen Hana. Walay anonotan ton paraan pian paermenen a maong si Hana diad sarayan tinaon a piesta. Anto itan? Tan say lalon importante et, panon ya akatulong so pananisia nen Hana ed si Jehova pian nasarag toy mairap a situasyon to ya agto kontrolado? No bilang ta walaray problemam tan lapud saratan et agka la maliket, naapresyam a maong so istoryay bilay nen Hana.

‘Akin et Maermen so Pusom?’

Walay duaran baleg a problema nen Hana. Ngalngali anggapoy nagawaan to’d samay sakey, balet diad samay sakey ni et talagan anggapoy nagawaan to. Say unonan problema to et aliwan sikato labat so asawa nen Elkana, tan sikatoy kabkabusol nen Penina. Komadua, agmakaanak. Makapadismaya itan ed anggan siopan bii a labay toy makaanak. Balet diad panaon nen Hana et lalon makapadismaya tan makapaermen itan. Parad saray Israelita nensaman, importante so pakawalaay anak pian mantultuloy so poli na pamilya. Kanian no agka makaanak, baleg itan a balaw tan kababaingan.

Sarag met komon ya itepel nen Hana iyan situasyon to no agkomon pibabalian nen Penina. Talagan anggapoy maabig a resulta na poligamya (odino pakawalaay pigaran asawa). Mangiter labat itan na sakit na linawa, tan pansengegay kompetisyon tan kolkol. Mapatnag ya aliwan ontan so labay na Dios ta saksakey labat so inter ton asawa ed si Adan diman ed hardin na Eden.a (Genesis 2:24) On, ipapanengneng na Biblia ya talagan makapuy so poligamya, tan papaneknekan itan na situasyon diad pamilya nen Elkana.

Mapatnag a say inad-aron maong nen Elkana et si Hana. Papanisiaan na saray Judio a si Hana so unonan inasawa nen Elkana tan linmabas ni pigaran taon insan to inasaway Penina. Antokaman so agawa, manseselos a maong si Penina tan nambabangil so gagawaen to pian miserable so bilay nen Hana. Say lamang nen Penina ed si Hana et mantataluntonay anak to kanian mapaspasirayew. Imbes komon a kasian toy Hana tan pabiskegey liknaan to ta aglanti makaanak, lalo to ni ingen ya papaermenen. Ibabaga na Biblia a “sutil-sutilen tan pabpaabebaen” toy Hana pian nabaingan. (1 Samuel 1:6, Maung a Balita) Talagan gagagalaen ton sakitay Hana.

Diad tinaon ya iyaakar na pamilya nen Elkana ed Shiloh et ditan sasamboten nen Penina a sakitay Hana. Tan ontan lamet so ginawa to ed sayan pankanawnawa. Diad samay bagat a pandurungoan ya inyapay ed si Jehova et inter nen Elkana so apag na saray anak nen Penina​—“saray amin ya anak to a lalaki tan saray bibii.” Balet ta si Hana et saksakey ya apag so naawat to, ta anggapoy anak to lanti.b Insan diad satan la matangtangsit ya impalupa nen Penina ed si Hana so situasyon to kanian manak-akis laingen tan agla makapangan. Seguradon naimano nen Elkana a say inad-aro ton si Hana et maer-ermen tan agmamangan kanian sinali ton kuyongen. “Hana,” so kuan to, ‘akin et mannangis ka, tan akin et agka mangan, tan akin et maermen so pusom? Agta magmaong ak ni nen say samploran anak a lalaki?’​—1 Samuel 1:4-8.

Maong labat ta alikas nen Elkana a say paneermenan a maong nen Hana et lapud agmakaanak. Tan seguradon pisalsalamatan nen Hana iray balikas na panangaro to. Balet ta anggapoy abitla nen Elkana nipaakar ed gagawaen nen Penina, tan anggapo met so nabasa’d Biblia ya nandalem si Hana. Anganko et inisip to a no gawaen to ‘tan et onloor labat so situasyon. Tan ompan anggapo met lanlamang so nagawaan nen Elkana. Nayarin si Hana et lalo laingen a busolen nen Penina tan ontan met na saray ananak tan ariripen to. Mas pakaskasi laingey Hana no ontan so nagawa.

Anggano bilang et ag-amta nen Elkana so amin a gagawaen nen Penina, amta iratan ya amin nen Jehova. Isasalaysay na Salita To so interon istorya. Pakaaralan tayo iya a talagan makapuy so panselos tan pambusol ed arum, anggano parad sikatayo et singa anggapo met so uges na gagawaen tayo. Balet no mareen itayon too tan anggapoy gagawaen tayon makapuy ed arum, a singa si Hana, maliket tayon nailaloan ya walay paraan nen Jehova pian ipetek so amin a bengatla diad pinili ton panaon, ta sikatoy Dios na hustisya. (Deuteronomio 32:4) Amta itan nen Hana, ta si Jehova so inasinggeran to a kereway tulong.

“Aliwa Lan Maermen”

Palbangon ni labat et manpaparaan lay interon pamilya, anggan saray ugugaw. Andukey a biahe so paonla’d Shilo, masulok a 30 kilometro so kaarawi to, a say dalan et diad kapalandeyan na Efraim.c Manga sanagew odino duay agew ni ingen itan ya akaren. Amta la nen Hana no antoy gawaen nen Penina. Balet ta agnampatilak ed abung, akila nin siansia. Maabig ya alimbawa si Hana ed saray mandadayew ed Dios natan. Talagan makapuy no abuloyan tayon say aliwdiwan ugali na arum et apektaen toy pandadayew tayo’d Dios. No ontan so gawaen tayo, singa isisiblet tayo’d sarili tayo iray bendisyon ya ontulong pian nasarag tayo ray problema.

Kayari sanagew ya biahe na sayan baleg a pamilya diad pakurba-kurban dalan ed kapalandeyan, asingger la ran siansia ed syudad na Shiloh. Sankabantag da la, wadman ed sakey a palandey ya apaliberan na mas atagey ni ran palandey. Seguradon diad saman et nononoten lan maong nen Hana no antoy ibaga to diad pikakasi to’d si Jehova. Sanen akasabi ran siansia, nandurungo so interon pamilya. Tampol ya sinmian si Hana ed grupo tan linma’d tabernakulo nen Jehova. Wadmay Atagey a Saserdoten si Eli, a manyudyurong ed abay na puerta. Balet ta say kawalaay nonot nen Hana et say pampikasi to’d Dios to. Mataletalek a diad tabernakulo et sikatoy dengelen na Dios. Anggano anggapoy toon talagan makatalos ed mairap a situasyon to, amta ton natalosan itan na Ama to ed tawen. Agto la apokpokay liknaan to, kanian inyakis toy ampaipait.

Legay pannangis nen Hana, marendeen ya nampikasi ed si Jehova, a mitimiti diad pangibabalikas to ed ambelat a liknaan to. Abayag a nampikasi, ya imbesngaw to’d Ama to so walad puso to. Kinerew to’d Dios a makaanak komon, balet ta aliwan satan labat so impikasi to. Tua, talagan labay nen Hana so makaawat na bendisyon na Dios balet ta labay to met ya iter ed Sikato so anggaay nayarian to. Kanian insamba to a no makaanak na laki et iter to so ugaw pian manlingkor ed si Jehova diad interon bilay to.​—1 Samuel 1:9-11.

Maong sirin ya alimbawa si Hana ed amin a lingkor na Dios no nipaakar ed panagpikasi. Lapud maaroy Jehova, labay ton ibesngaw tayo labat ed sikato so amin a walad puso tayo. Ibaga tayo sirin ed sikato iray pakapapagaan tayo, a singa sakey ya ugaw a mataletalek ya onasingger ed maaron ateng to. (Salmo 62:8; 1 Tesalonica 5:17) Pinuyanan nen Jehova si apostol Pedro ya isulat irayan salita nipaakar ed panagpikasi: “Ipaawit yo . . . ed sikato so amin a kapagaan yo, lapud iyaansakit to kayo.”​—1 Pedro 5:7.

Say pakatalos tan pililikna na totoo et aliwan singa si Jehova. Legay pannangis tan pampipikasi nen Hana et akigtot ta walay biglan nansalita. Si Eli manaya, amay Atagey a Saserdote, a nen niman ni mangoobserba’d sikato. Imbaga ton: “Dakel amoy nainum mo? Mampamawmaw ka ni!” Naimano nen Eli ya mitimiti Hana, a manak-akis tan mabepbeleng. Imbes a tepetan to komoy Hana no antoy problema to, inisip ton tampol ya abuek.​—1 Samuel 1:12-14, MB.

Asakisakitan si Hana! Anta maer-ermen la lanti, insan onman ni inyakusa na toon rerespetoen ton maong. Anggaman ontan, diad saya lamet et agaylay abig so impanengneng ton pananisia. Agto inabuloyan a naapektoay pandadayew to’d si Jehova lapud lingo na arum. Marespeto ton impaliwawa’d si Eli so situasyon to. Anguman so tonaday boses nen Eli ta amoria ton alingo. Imbaga ton: “Onla ka ed kareenan, et say Dios na Israel iyabobon [odino, iter] to komon so kerew mo a kinerew mo ed sikato.”​—1 Samuel 1:15-17.

Natan ta nibesngaw la nen Hana ed si Jehova so walad puso to tan nandayew diman ed tabernakulo, antoy epekto na satan ed sikato? Oniay salaysay na Biblia: “Say bii linma ed dalan to, tan angan; et say lupa to aliwa lan maermen.” (1 Samuel 1:18) Oniay nabasa ed Maung a Balita diad satan a bersikulo: “Nakal lay ermen to.” On, nainawaan si Hana. Aliling to et impasakbat to la’d Ama to ed tawen so ambela-belat a liliknaen to. (Salmo 55:22) Wala tay probleman agsarag a sakbaten nen Jehova? Anggapon balot!

Sano ambela-belat lay liknaan tayo odino maer-ermen itayo, a singano agtayo la sarag, marakep no aligen tayoy Hana. Ibesngaw tayo’d Dios so walad puso tayo ta talagan ‘dedengelen to ray pikakasi.’ (Salmo 65:2) No manpikasi tayo a walaay pananisia, nayarin nalikna tayo met a say ermen tayo et nasalatan na “deen na Dios a palumbasan toy amin a kanonotan.”​—Filipos 4:6, 7.

“Anggapoy Manangiyagel a Singa say Dios Tayo”

Kaimbuasan to, kaiba la nen Hana si Elkana a pinmawil ed tabernakulo. Nayarin impaamta to’d si Elkana so kerew tan samba to ed Dios. Diad samay ganggan ya inter na Dios ed saray Israelita nensaman panamegley nen Moises, walay kanepegan na asawan laki a sebelay asawa to ed insamba to no agmiabobon. (Numeros 30:10-15) Balet ag-itan ginawa nen Elkana. Imbes, saniba ran dua nen Hana ya nampikasi ed si Jehova diman ed tabernakulo antis iran sinmempet.

Kapigan kasi alikas nen Penina ya anggapo lay epekto na pamapasyodot to’d si Hana? Anggapoy ibabaga na Biblia a detalye nipaakar ed satan. Balet ipapanengneng na saramay salitan “aliwa lan maermen” a manlapu la’d impanpikasi nen Hana et sikatoy maliket la tan agla napapagaan. Kanian mapatnag ya anggano pabpabaingan ni nen Penina, anggapo lay epekto to iratan. Anggapo lay arum nin salaysay ed Biblia a pakabasaay ngaran nen Penina.

On, mareen lay nonot nen Hana. Tan diad inlalabas na bulan et nanlukon a siansia! Agnasabaan so liket to! Balet agbalot alingwanan nen Hana no siopay nanlapuan to ’yan bendisyon. Say inyanak to et ugaw a laki, a nginaranan toy Samuel, a say labay ton ibaga et “Ngaran na Dios.” Mapatnag a say tutukoyen to iya et say itawag ed ngaran na Dios, a singa ginawa nen Hana. Diad saman a taon et agto akila’d Shiloh. Taloy taon a nansiansia’d abung kaiba toy Samuel, anggad apakso. Imparaan toy sarili to parad samay agew a kaukolan to lay onsian ed inad-aro ton anak.

Aliwan mainomay itan ed sakey ya ina. Amta nen Hana a dima’d Shilo et asikasoen a maong na saramay bibiin manlilingkor ed tabernakulo si Samuel, balet siempre, uga-ugaw ni. Tan anggan siopan ina et labay ton nakaibay anak to. Anggaman ontan, ag-ansakit ed linawa ya inawit di Elkana tan Hana si Samuel diman ed tabernakulo. Angiyapay iray bagat diad abung na Dios tan impresenta day Samuel ed si Eli, ya impanonot da’d sikato imay insamba nen Hana taloy taon lay apalabas.

Insan nampikasi si Hana. Parad si Jehova, satan a pikakasi to et manepeg ya ipila ed pinuyanan a Salita To. No basaen mo itan diad 1 Samuel 2:1-10, nanengneng mo ed kada balikas so kabiskeg na pananisia to. Indayew toy Jehova lapud makapadinayew a panguusar to’d pakayari to​—say agnaparaan ya abilidad to ya mangiyabeba ed saray mapaatagey, mamendisyon ed saray napapairap, tan mamatey odino mamabilay ni ingen. Indayew toy Ama to lapud anggapoy mipara’d inkamasanto, inkamahustisya, tan inkamatoor To. Walay rason sirin a nibaga nen Hana ya: “Anggapoy manangiyagel a singa say Dios tayo.” Talagan si Jehova et napanmatalkan, agmanguuman, tan nailaloan na amin a napapairap tan nalalames ya onkekerew na tulong ed sikato.

Talagan agunggonaan si Samuel lapud malmalet a pananisia nen ina to ed si Jehova. Seguradon nanailiw toy ina to, balet ta agton balot aliknan alingwanan la nen Hana. Tinaon ya oonlay Hana ed Shiloh, a walay awit ton kawes a dinait ton mismo parad si Samuel ya usaren to’d panserbi ed tabernakulo. Kada dait et ebidensya na panangaro to’d anak to. (1 Samuel 2:19) Imadyin mo pa labat ya isusulong to itan ed si Samuel, ap-apigeren to, tan manim-imis ton sankanengneng so anak to legan ton maaron bibilinen. Talagan abendisyonan si Samuel na maomaong ya ina, tan diad imbaleg to et sikatoy bendisyon met ed saray ateng to tan ed bansan Israel.

Anggan si Hana et agmet alingwanan. Sikatoy benendisyonan nen Jehova na limara nin anak. (1 Samuel 2:21) Balet say sankabalegan a bendisyon nen Hana et say maapit a relasyon to ed Ama ton si Jehova, ya lalon inmelet diad inlabas na tao-taon. Ontan met komon so nagawa’d sika diad pangalig mo ed pananisia nen Hana.

[Saray paimano ed leksab]

[Kahon ed pahina 17]

Duaran Marakdakep a Pikakasi

Walaray nikabkabiig a nabasa tayo’d samay duaran pikakasi nen Hana ya akarekord ed 1 Samuel 1:11 tan 2:1-10. Nia ray pigara:

◼ Tinawag nen Hana so Dios ya “Jehova na saray ehersito” diad samay unaan a pikakasi to. Diad Biblia et sikato so sankaunaan ya anawag ed Dios ed satan a titulo. Nabasa itan a 285 beses diad orihinal iran kopya na Biblia tan ontutukoy itan ed autoridad na Dios ed baleg ya armada na saray anghel to.

◼ Samay komaduan nirekord ya pikakasi nen Hana et sanen impresenta dan dua nen Elkana si Samuel pian manlingkor ed Dios diad Shiloh. Napatnagan ed saya a sikatoy maliket lapud benendisyonan nen Jehova, aliwan lapud abaingan si Penina.

◼ Sanen imbaga nen Hana ya, “Say saklor ko nitandoro ed Jehova,” nayarin say sankanonot to et say toro odino lakin baka. Mabisbiskeg iyan ayep ya uusaren nensaman diad panagdalus tan arum nin ambelat a kimey, tan uusaren toy saklor to ed pambuno. Singa ibabaga sirin nen Hana ya, ‘Jehova, sika so mamapabiskeg ed siak.’​—1 Samuel 2:1.

◼ Samay imbaga nen Hana nipaakar ed “nilanaan” na Dios et nibagan walay ipapatnag ton nagawa ed arapen. Satan met lanlamang a salita so nipatalos a “mesias,” tan diad Biblia et si Hana so sankaunaan ya angusar ed satan pian tukoyen so sakey a nilanaan ya ari diad arapen.​—1 Samuel 2:10.

◼ Kalabas na manga 1,000 a taon, angibalikas si Maria ya ina nen Jesus na panangidayew ed si Jehova tan walay piparaan to itan ed samay pikakasi nen Hana.​—Lucas 1:46-55.

[Litrato ed pahina 16]

Talagan maer-ermen si Hana ta agmakaanak, tan ginawa nen Penina so amin pian lalon sakitay liknaan to

[Litrato ed pahina 16, 17]

Alig moy impapuson impanpikasi nen Hana

[Litrato ed pahina 17]

Agsinmanok si Hana anggano inakusaan nen Eli