Pikakasi

1 Akin a Manpikasi?

PIKAKASI. Sakey iya ed pigpigaran topic ed Biblia a paninteresan na totoo. Nabasa ed sayan magasin so pitoran maslak ya itetepet na totoo nipaakar ed pikakasi, tan no antoy ebat na Biblia ed saratan. Diad sarayan artikulo et natulongan ka pian nipasal moy manpikasi, tan naaralan mo no antoray nepeg mon gawaen pian dengelen na Dios so pikakasim.

DIAD interon mundo, manpipikasi iray totoo, antokaman so kultura tan relihyon da. Nayarin manpipikasi iran bukor odino bilang grupo. Manpipikasi ira diad saray simbaan, templo, sinagoga, mosque, diad saray altar. Nayarin manguusar iray rosaryo, imahen, libro na dasal, tan saray tatawagen ya prayer rug, prayer wheel, tan prayer board.

Say panagpikasi et sakey ed saray pidumaan na totoo ed arum nin mabilay a pinalsa diad dalin. Tua, dakel so piparaan tayo ed saray ayayep. Kaukolan tayoy naakan, dagem, tan danum a singa sikara. Tan singa met saray ayayep, nianak itayo, ontatken, insan ompatey. (Eclesiastes 3:19) Balet ta totoo labat so manpipikasi. Akin kasi?

Nayarin say sankasimplian ya ebat et lapud kaukolan tayoy manpikasi. Parad karaklan, say panagpikasi et paraan pian makaasingger ed sakey a momoriaen dan masanto odino sagrado, tan agmangangga. Ibabaga na Biblia a talagan nisipor ed puso tayo so pampilalek ed satan. (Eclesiastes 3:11) Aminsan et oniay imbaga nen Jesus: “Maliket iramay manonot ed espiritual a pankaukolan da.”​—Mateo 5:3.

“Espiritual a pankaukolan”​—mapatnag a satan so rason no akin a lanang a manpipikasi iray totoo tan no akin a nanggawa ira na saray pasen tan kagawaan parad panagdayew. Walaray totoon mandedepende ed sarili da odino ed kapara dan too pian napenek so espiritual iran pankaukolan da. Balet, agmo ta naiimano ya limitado labat so nitulong na totoo? Walaray kakapuyan tayo, antikey so bilay tayo, tan kulang so karunongan tayo. Say makapangiter labat na espiritual iran pankaukolan tayo et say sakey a talagan mas marunong, mas makapanyari, tan mansiansia lawas. Anto ta irayan espiritual a pankaukolan a mamapakiwas ed sikatayon manpikasi?

Nonot mo pa: Asalim ta lay nananap na direksion ed bilay mo, karunongan, odino ebat ed saray tepet ya agsarag ya iter na kakabatan na too? Asalim ta la imay talagan kaukolan moy tulong lapud nanaermenan kan maong diad impatey na inad-arom, kaukolan moy direksion lapud nanairapan kan mandesisyon, odino kaukolan moy panamerdona lapud graben pakakakonsiensia?

Unong ed Biblia, nayarin ipikasi irayan bengatla. Say Biblia so sankanapanmatalkan a libro no nipaakar ed pikakasi, tan nabasa ditan so dakel a pikakasi na lalaki tan bibii a matoor ed Dios. Nampikasi ira parad tulong, direksion, panamerdona, tan pian naebatan iray mair-irap a tepet da.​—Salmo 23:3; 71:21; Daniel 9:4, 5, 19; Habacuc 1:3.

Anggaman nanduruma irayan pikakasi, walay sakey ya pampaparaan da. Amta na saramay nampikasi no siopa so nepeg a pampikasian. Parad dakel a totoo natan et agla iya importante. Balet diad tuay tua, kaukolan tayon naamtaan no siopa so nepeg a pampikasian pian naebatay pikakasi tayo.