Walay Sengegan na Panggayaga Yo

MANLAPUD sankamelagan a mabilay a selula anggad angkakabaleg iran galaxy ya amungmungkog ed cluster tan saray supercluster, napatnagan so inkaorganisa na palsa. Agla pankelawan iya lapud say Manamalsa et ‘aliwan Dios na gulo.’ (1 Cor. 14:33) Makapadinayew met so uksoyan na Dios ed panagdayew. Konsideraen pa so ginawa nen Jehova. Tinugyop to ed sakey ya organisasyon ed interon uniberso iray nilasus milyon ya intelihentin pinalsa, salanti, saray totoo ontan met ed saray anghel, a walay bulos a panagdesisyon tan nankakasakey ed puron panagdayew. Talagan makapadinayew!

Diad Israel nensaman, say kabiangan na organisasyon na Dios ed dalin et irerepresenta na Jerusalem, a ditan so kawalaan na templo nen Jehova tan panaayaman na tinuro ton ari. Onia so impangibalikas ed liknaan na sakey ya Israelitan apriso ed Babilonia nipaakar ed masanton syudad: “No agta ka nanodnonotan, ompeket so dilak ed tawen-tawen na sangik, no agko pablien so Jerusalem ya alabas nen say manuna a gayagak.”​—Sal. 137:6.

Ontan met kasi naliliknam ed organisasyon na Dios natan? Kasin satan so manunan sengegan na liket mo? Natatalosan kasi na ananak mo so history tan ikukurang na organisasyon na Dios ed dalin? Kasin naaapresya da ya kabiangan ira na sankamundoan ya impanaagi na saray Tasi nen Jehova? (1 Ped. 2:17) Anto kasi no iyaplika yo irayay ontumbok ya suhestion ed Panagdayew na Pamilya yo pian lalon naapresya na pamilya yo so organisasyon nen Jehova?

Istoryaen Iray ‘Inmuna a Panaon’

Kada taon, mantitipon iray Israelitan pamilya pian selebraan so Paskua. Sanen inggapo iyan piesta, binilin nen Moises iray totoo: “[No] tepeten na anak mo a laki ed sika, a kuan to, Anto so saya? Salitaen mo naani ed sikato, Dia ed biskeg na lima nen Jehova inala to kami a nanlapu ed Ehipto, diman ed abung ya akaaripenan.” (Exo. 13:14) Kaukolan ya agnalingwanan so impideneng nen Jehova ed saray Israelita. Seguradon dakel ya Israelitan kaamaan so anumbok ed ganggan nen Moises. Kalabas na pigaran henerasyon, onia so impikasi na sakey ya Israelita: “Nadngel mi ed saray layalayag mi, O Dios, saray atateng mi tinongtong da ed sikami, no anto so saray kimey a ginawam nen samay agew da, sanen [inmuna] a panaon.”​—Sal. 44:1.

Parad sakey ya ugaw natan, say history na saray Tasi nen Jehova ed apalabas a 100 taon odino onsulok ni et singa met sanen ‘inmuna a panaon.’ Panon yon gawaen a mabilabilay iratan ya ebento ed ananak yo? Pian nagawaan itan, uusaren na pigaran atateng so Jehovah’s Witnesses​—Proclaimers of God’s Kingdom, say Yearbook, saray istorya ed bilay a nipalapag ed saray magasin tayo, tan arum niran report nipaakar ed teokratikon awaran, pati say balon DVD nipaakar ed totoo na Dios ed modernon panaon. Saray video a nipaakar ed panamasegsegang ed saray agagi tayo ed datin Soviet Union tan Nazi Germany so mangibabangat ed saray pamilya a manmatalek ed si Jehova legan na saray subok. Usaren iratan ed Panagdayew na Pamilya yo. Mamabiskeg itan na pananisia na ananak yo no bilang ta nipaarap ira ed saray pakasubokan na katooran da.

Balet no ipaliwawa labat so nipaakar ed awaran et nayarin onsawan tampol iray ugugaw. Kanian pibiangen yo iray ananak yo. Singa bilang, nayarin pampili yoy anak yo na bansa a makapainteres ed sikato, ipa-research yoy teokratikon history na satan a bansa, insan kerewen ya inabang toy naaralan to ed pamilya. Diad kongregasyon yo, nayarin walaray agagin abayag lan matoor ya manlilingkor a sarag yon imbitaan no maminsan ed panagdayew na pamilya yo. Nayarin interbioen ira na anak yo tan paisalaysay to’d sikara iray eksperiensya ra. Sarag yo met ya ipa-drowing ed anak yo iray makatantandan ebento ed organisasyon, singa say konstruksion na sangan opisina, internasyonal a kombension, odino say panguusar na phonograph ed panagkabkaabungan.

Aralen no Panon a “Gagawaen na Kada Kabiangan so Kimey To”

Inkompara nen apostol Pablo so Kristianon kongregasyon ed “interon laman, impantutugyop tan impankakasakey na manusuportan langolangoan, ya ombabaleg tan ombibiskeg diad panamegley na aro, legan ya gagawaen na kada kabiangan so kimey to.” (Efe. 4:16, New International Version) No naaralan tayo no panon ya onggagana so laman na too, lalon naapresya tan narespeto tayo so Manamalsa tayo. Mipadpara, no uusisaen tayo no panon ya onkukurang so sankamundoan a kongregasyon, onkelaw tayo ed “karunongan na Dios a napapatnagan ed dakel tan nanduruman paraan.”​—Efe. 3:10.

Dedeskribien nen Jehova no panon ya onkukurang so organisasyon to, pati say kabiangan na satan ed tawen. Singa bilang, ibabaga to ed sikatayo ya inter ton unona so pasingawey ed si Jesu-Kristo, ya “imbaki toy anghel to tan diad panamegley na saray simbolo et imparungtal to itan ed aripen ton si Juan, a nantasi.” (Apo. 1:1, 2) No ipaparungtal na Dios no panon ya onkukurang so agnanengneng a kabiangan na organisasyon to, agta labay to met a natalosan tayo no panon ya “gagawaen na kada kabiangan so kimey to” diad dalin?

Singa bilang, no magano lan ombisita so manangasikaso na sirkito ed kongregasyon yo, maabig no itongtong ed pamilya yo iray kimey tan pribilehyo na saray ombiabiahen manangasikaso. Panon iran ontutulong ed balang sakey ed sikatayo? Say arum niran tepet a nayarin pantongtongan et: Akin ya importante so pangireport ed agawaan ed lawak na serbisyo? Panon a susuportaan ed pinansyal so organisasyon na Dios? Panon ya naoorganisa so Mananguley ya Ulop, tan panon itan a mangitatarya na espiritual a naakan?

No natatalosan tayo no panon ya naoorganisa so totoo nen Jehova, nagunggonaan tayo ed taloran paraan: Mas lalo tayon napabli iramay mansasagpot a mankimey parad sikatayo. (1 Tes. 5:12, 13) Napapakiwas itayon suportaan iray teokratikon uksoyan. (Gawa 16:4, 5) Ontan met, napapabiskeg so talek tayo ed saramay mangidadaulo no naiimano tayon ibabase da ed Biblia iray desisyon tan uksoyan a gagawaen da.​—Heb. 13:7.

“Imanoen Yo so Palpalasyo To”

“Manakar kayo ed abay na Sion, ya onliber kayo ed abay to: bilang yo so saray ilang to: Tandaan yo a maong so saray kuta to. Imanoen yo so palpalasyo to; pian nayarian yo a tongtongen ed mantumbok a kailalakan.” (Sal. 48:12, 13) Pinaseseg na salmista iray Israelita a nengnengen dan maong so Jerusalem. Kasin naiimadyin yo iray makapalikliket ya naeksperiensya na saray Israelitan pamilya diad impanbiahe ra ed masanton syudad parad tinaon iran piesta tan anengneng da so marakdakep a templo ditan? Seguradon apakiwas iran ‘itongtong itan ed mantumbok a kailalakan.’

Nonoten pa so reyna na Sheba, a nen primero et agni manisia ed saray narerengelan to nipaakar ed alay abig a pananguley tan malaknab a kakabatan nen Solomon. Antoy akakombinse ed sikato kanian anisiaan to iray nadngel to? Inkuan to: “Agko sinisia so saray salita ra, anga ed inyakar ko dia, tan saray dili a matak . . . anengneng da.” (2 Awa. 9:6) On, saray nanenengneng na ‘dilin mata’ tayo et mangapektan maong ed sikatayo.

Panon yon natulongan iray ananak yo a nanengneng so makapadinayew ya organisasyon nen Jehova ed ‘dilin mata’ ra? No walay sangan opisina na saray Tasi nen Jehova ya asingger ed panaayaman yo, panggunaetan yoy ombisita. Singa bilang, si Mandy tan Bethany et binmaleg ed lugar ya manga 1,500 a kilometro so kaarawi to ed Bethel diad bansa ra. Balet, implano na atateng day mabetbet a pan-tour ed saray pasilidad na Bethel, lalo la nen ombabaleg ni labat iray ananak da. “Nen agkami ni akakar ed Bethel, say amta mi et masyadon seryoso ditan tan para labat ed saray matatatken,” so kuan da. “Balet ta walaray akabat mi ditan a kalangweran ya makulikulin mankikimey parad si Jehova tan panliliketan da itan! Anengneng mi ya say organisasyon nen Jehova et malaklaknab manaya, tan kada ibisita mi ed Bethel mas lalon napapabiskeg so espiritualidad mi.” Diad impakanengneng dan maong ed organisasyon na Dios, apakiwas si Mandy tan Bethany ya manpayunir, tan naimbitaan ni ra ingen ya temporaryon manboluntir ed Bethel.

“Nanengneng” tayo so organisasyon nen Jehova ed sakey nin paraan ya anggapo’d Israel nensaman. Diad agano niran taon, nitarya ed saray totoo na Dios iray video tan DVD nipaakar ed organisasyon na Dios, a singa saraya: Jehovah’s Witnesses​—Organized to Share the Good News, Our Whole Association of Brothers, To the Ends of the Earth, tan United by Divine Teaching. No nanengneng yo tan na pamilya yo so pansasagpot na saray Bethelite, saray ontutulong ed saray naapektaay kalamidad, saray misionero, tan agagin mangipaparaan tan mangoorganisa na saray kombension, seguradon ombaleg so apresasyon yo ed sankamundoan ya impanaagi.

Kada kongregasyon na totoo na Dios et walay importantin betang ed panangipulong na maong a balita tan pananuporta ed saray Kristiano a kabiangan ditan. Anggaman ontan, mangigana na panaon bilang pamilya pian nodnonoten so “amin ya agagi yo diad interon mundo.” Ontulong iya ed sikayo tan saray ananak yo ya mansiansian ‘mabiskeg ed pananisia,’ lapud amta ran walay sengegan na panggayaga yo.​—1 Ped. 5:9.

[Kahon/Litrato ed pahina 18]

Organisasyon na Dios​—Makanan Tema ya Aralen

Walaan itayo na dakel ya probisyon pian natulongan itayon amin a mas naaralan so history tan ikukurang na organisasyon nen Jehova. Saray ontumbok ya tepet so ontulong ed sikayo pian nigapo so panaral:

☞ Panon a ginmapo so kimey na saray ombiabiahen manangasikaso ed modernon panaon?​—Jehovah’s Witnesses​—Proclaimers of God’s Kingdom, pahina 222-227.

☞ Antoy makatantandan agawa ed “Agew na Ananak” diad Teokratikon Asemblea nen 1941?​—Jehovah’s Witnesses​—Proclaimers of God’s Kingdom, pahina 86, 88.

☞ Panon ya manggagaway desisyon so Mananguley ya Ulop?​—“Bearing Thorough Witness” About God’s Kingdom, pahina 108-114.