Impatnag na Dios so Panangaro Tod Sikatayo

‘Say agnaparaan a kaabigan et manuley bilang ari diad panamegley na inkatunong a mangitonton ed bilay ya andi-anggaan.’​—ROMA 5:21.

1, 2. Parad dakel, anton duaran regalo so ipapasen dan makana, balet dinan so talagan mas makana?

IMBAGA na sakey a propesor na University of Melbourne diad Australia ya saray ley na Empiryo na Roma et regalon makana ed sibilisasyon. Anggaman ontan, ibabangat na Biblia ya lapud aro na Dios et inikdan to itayo na regalon agnaparaan so kana to. Sayan regalo et say paraan ya ginawa na Dios pian naabobonan to itayo tan magmaliw a matunong ed imaton to, diad ontan et nailaloan tayoy kilalaban tan bilay ya andi-anggaan.

² Nalalanor so inkahustisya na Dios diad impangiter to ed sayan regalo. Ingen ta diad Roma kapitulo 5, say impangipaliwawa nen apostol Pablo ed saya et aliwan sobsobran detalyado ed legal iran pamaakaran. Imbes, inggapo to itan panamegley na sayan makapaligsan panamaseguro: “Niyabawag itayo lan matunong lapud pananisia, [kanian] panggayagaan tayo so pikakareenan ed Dios diad panamegley nen Katawan tayon Jesu-Kristo.” Saramay akaawat na regalo na Dios et apakiwas a mangaro met ed sikato. Sakey ed saratan et si Pablo. Insulat to: “Nikalbo ed kapusoan tayo so aro na Dios diad panamegley na masanton espiritu.”​—Roma 5:1, 5.

3. Antoray linmesan tepet nipaakar ed regalo na Dios?

³ Balet, akin et kaukolan iyan regalo? Panon iyan niiter na Dios diad patas a paraan, ya anggapoy lalabien to? Tan antoy nepeg a gawaen na sakey pian naawat to itan? Amtaen tayo iray ebat tan nengnengen tayo no panon ya idanet na saratan so aro na Dios.

Say Aro na Dios Kontrad Kasalanan

4, 5. Panon ya impatnag nen Jehova so panangaro to? (b) Antoy ontulong ed sikatayo pian natalosay Roma 5:12?

⁴ Lapud baleg ya panangaro nen Jehova, imbaki toy bogbogtong ya Anak to pian tulongay katooan. Oniay impaneskribe nen Pablo ed satan: “Ipapatnag na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.” (Roma 5:8) Imanoen pa iyan asalambit a katuaan: “Makasalanan itayo.” Nepeg tayon naamtaan no panon itayon nagmaliw a makasalanan.

⁵ Impaliwawa itan nen Pablo diad oniaran salita: “Linmoob so kasalanan ed mundo lapud sakey a too tan say ipapatey lapud kasalanan, tan ompapatey so amin a totoo lapud nankasalanan iran amin.” (Roma 5:12) Natalosan tayo iya ta impairekord na Dios no panon so inggapo na bilay na too. Pinalsa nen Jehova so duaran too, si Adan tan Eva. Perpekto so Amalsa, tan perpekto met iray inmunan atateng tayo. Saksakey labat so insebel na Dios ed sikara tan imbaga ton say isumlang da et manresultad sentensian ipapatey. (Gen. 2:17) Balet, ginagala ray nanrebelde, ya sinumlang day makatunongan a ganggan na Dios, kanian sikatoy impulisay da bilang Manangiter na Ganggan tan Soberano.​—Deu. 32:4, 5.

6. (a) Antoy makasengeg akin ya amin ya ilalak nen Adan et ompatey, tan kasin anguman iyan situasyon lapud Mosaikon Ganggan? (b) Panon a niyilustra so epekto na atawir a kasalanan?

⁶ Nankasalanan lay Adan antis nin nanilalak, kanian nipatawir toy kasalanan tan saray epekto na satan ed amin ya ilalak to. Siempre, agginagala na saray ilalak nen Adan so manrebelde tan mankasalanan a singa sikato, kanian agmiparay kasalanan da ed sikato. Sakey ni, anggapo met niray niiter a ganggan diad saman. (Gen. 2:17) Ingen, siansian akatawir iray kasalanan. Kanian, say kasalanan tan patey et nanuley anggan sanen inter na Dios ed saray Israelita so Mosaikon Ganggan, ya angipamoria ed sikaran makasalanan ira. (Basaen so Roma 5:13, 14.) Say epekto na atawir a kasalanan et singa sakit ya natawir ed atateng. Tua, diad ontan iran kaso, walaray ananak ya makatawir, wala met iray andi. No diad kasalanan balet, amin tayo et akatawir ed si Adan, kanian amin tayo et ompatey. Panon itayon naagwat ed satan a pakaskasin kipapasen?

Say Intarya na Dios Panamegley nen Jesu-Kristo

7, 8. Panon a say impanbilay na duaran perpekton too et amawalay nandumaan a resulta?

⁷ Nanggaway paraan si Jehova pian nibulos iray totoo ed atawir dan kasalanan. Impaliwawa nen Pablo a nagmaliw iyan posible panamegley na sinmublay a perpekton too ya aliling toy komaduan Adan. (1 Cor. 15:45) Balet nandumaan a maong so resulta na impanbilay na sarayan duaran perpekton too. Akin et ontan?​—Basaen so Roma 5:15, 16.

⁸ Insulat nen Pablo: “Midumaan so resulta na regalo ed resulta na impakalingo.” Si Adan so akagawa na satan ya impakalingo, tan manepeg labat ya nasentensiaan na ipapatey. Ingen ta aliwan sikato labat so ompatey lapud satan a ginawa to. Oniay nabasa tayo: “Dakel so inatey lapud impakalingo na [satan] a too.” Base ed estandarte na Dios ed inkahustisya, amin ya ilalak nen Adan, anggan sikatayo, et manepeg labat a nasentensiaan a singa sikato. Makapaliket ta say perpekton too a si Jesus et makapawalay duman resulta. Anto itan? Oniay ebat ya imbaga nen Pablo: “Amin a klase na totoo et niyabawag a matunong parad bilay.”​—Roma 5:18.

9. Antoy kabaliksan na pangiyabawag na Dios ed sakey a too bilang matunong, a singa ibabaga na Roma 5:16, 18?

⁹ Antoy kabaliksan na saray Griegon salita a nipatalos ya “niyabawag a matunong”? Oniay insulat na sakey a managpatalos na Biblia nipaakar ed satan: “Sakey iyan panangikompara ya walay koneksion tod legal iran pamaakaran. Tutukoyen toy panguman na panmoria na Dios ed sakey a too, aliwan say panguman na mismon inkatoo to . . . Nikompara so Dios ed sakey ya ukom a say desisyon to et pabor ed akusado ya aliling to et inawit ed korte na Dios ta naakusaan na ag-inkatunong. Balet ta inabsuelto na Dios.”

10. Antoy ginawa nen Jesus a nagmaliw a basiyan pian niyabawag a matunong iray totoo?

¹⁰ Antoy basiyan na matunong ya “Ukom na amin a dalin” diad pangabsuelto tod agmatunong iran totoo? (Gen. 18:25) Bilang unonan kundang, imbaki na Dios so bogbogtong ya Anak to diad dalin. Sigpot a ginawa nen Jesus so linawa nen Ama to, anggano sikatoy tinukso, binalawbalaw, tan pinairap. Sikatoy nansiansian matoor anggan sanen manpapanabos lad panamairapan a kiew. (Heb. 2:10) Diad impangisakripisyo nen Jesus ed perpekton bilay to, inyapay toy sakey a dondon a makapangibulos ed saray ilalak nen Adan manlapud kasalanan tan ipapatey.​—Mat. 20:28; Roma 5:6-8.

11. Akin ya inusar nen Pablo so terminon “kasimbangan a dondon”?

¹¹ Diad arum a sulat nen Pablo, tinukoy to iya bilang “kasimbangan a dondon.” (1 Tim. 2:6) Akin et nibagan kasimbangan? Impatawir nen Adan so ag-inkaperpekto tan ipapatey ed amin a binilyon ya ilalak to. Tua, lapud perpekto si Jesus, makapanilalak met komon na binilyon a perpekton totoo.a Kanian say pakatalos tayo nensaman et say bilay nen Jesus tan say bilay na amin ya posiblin perpekton nailalak to so misimbangan a dondon a nakaukolan pian nabayaran so abalang nen Adan tan saray agperpekton ilalak to. Balet, ag-ibabaga na Biblia a magmaliw a kabiangan na dondon so siopaman a posiblin ilalak nen Jesus. Ipapabitar na Roma 5:15-19 a niwalay dondon lapud ipatey na ‘sakey a too.’ On, say perpekton bilay nen Jesus et misimbangan ed bilay nen Adan. Kanian say nalalanor labat dia et si Jesu-Kristo. Diad panamegley na “gawa ya angitonton ed panamatunong,” salanti, say impansiansia nen Jesus a matulok tan matoor anggad patey, posiblin naawat na amin a klase na totoo so bilay tan say regalon kiyabawag a matunong. (2 Cor. 5:14, 15; 1 Ped. 3:18) Antoy epekto na dondon?

Naabsuelto Panamegley na Dondon

12, 13. Akin a saramay niyabawag a matunong et kaukolan day panangasi tan panangaro na Dios?

¹² Inawat nen Jehova so dondon bagat ya inyapay na Anak to. (Heb. 9:24; 10:10, 12) Anggaman ontan, siansia nin agperpekto iray disipulo nen Jesus ed dalin, anggan saray matoor ya apostol to. Mankakasalanan niran siansia anggano panggugunaetan dan paliisan itan. Akin? Lapud akatawir iray kasalanan. (Roma 7:18-20) Balet sarag na Dios a solusyonan itan, tan talagan walay ginawa to. Inawat to so “kasimbangan a dondon” tan mabulos ton inusar so balor na satan parad saray lingkor to.

¹³ Ginawa itan na Dios aliwan lapud walaray maabig ya agawaan na saray apostol tan arum ni. Imbes, ginawa to itan lapud panangasi tan baleg a panangaro to. Saray apostol tan arum ni et inabsuelto to lad sentensia ra, a parad sikato et nibulos la rad atawir dan kasalanan. Malinew iyan imbaga nen Pablo: “Diad sayan agnaparaan a kaabigan et nilaban kayo ed panamegley na pananisia; tan aliwa iyan lapud sikayo, noagta saya so regalo na Dios.”​—Efe. 2:8.

14, 15. Antoy tumang ya awaten na saramay inyabawag na Dios a matunong, balet anto ni nepeg dan gawaen?

¹⁴ Talagan alay abig iyan regalo ya perdonaen na Makapanyarin-amin so kasalanan ya atawir na sakey a too tan anggan saray lingon agawaan to! Agnabilang so kasalanan ya agawaan na saray indibidual antis iran nagmaliw a Kristiano. Ingen, perdonaen na Dios irayan kasalanan lapud dondon. Insulat nen Pablo: “Say regalo a naawat lapud dakel ya impakalingo et nanresulta ed inkiyabawag a matunong.” (Roma 5:16) Saray apostol tan say arum nin akaawat ed sayan regalo (say kiyabawag a matunong) et nepeg ya mantultuloy a mandayew ed tuan Dios tekep na pananisia. Antoy tumang ya awaten da? “Saramay mangaawat na daakan ya agnaparaan a kaabigan tan regalon andi-bayar na inkatunong et manuley bilang arari ed bilay diad panamegley na sakey a too, si Jesu-Kristo.” On, say ‘regalon inkatunong’ et walaay duman epekto komparad impakalingo nen Adan. Say resulta na satan et bilay.​—Roma 5:17; basaen so Lucas 22:28-30.

¹⁵ Saramay akaawat na satan a regalo et magmaliw ya espiritual ya ananak na Dios. Bilang kaiba nen Kristo a tomatawir, walay ilalo dan napaoli diad tawen bilang espiritun ananak ya “manuley bilang arari” kaibay Jesu-Kristo.​—Basaen so Roma 8:15-17, 23.

Impatnag na Dios so Aro ed Arum Ni

16. Antoy regalon natan ni labat et naawat la na saramay maniilalon manbilay diad dalin?

¹⁶ Aliwan amin ya walaay pananisia ed Dios tan manlilingkor ed sikato et maniilalon “manuley bilang arari” a kaibay Kristo diad tawen. Say ilalo na karaklan ed sikara et mipara ed saramay lingkor na Dios antis na panaon na saray Kristiano. Iilaloan day manbilay na andi-anggaan diad paraison dalin. Kasin natan ni labat et naawat da lay regalo na Dios, tan ipasen to la ran matunong, a nailaloan day maandon bilay ed dalin diad arapen? Base ed samay insulat nen Pablo ed saray taga Roma, say makapaliket ya ebat et on!

17, 18. (a) Panoy impangipasen na Dios ed si Abraham lapud pananisia to? (b) Akin et sarag lan ipasen nen Jehova a matunong si Abraham antis nin imbayar so dondon?

¹⁷ Say manunan inusar nen Pablo ya alimbawa et si Abraham. Sayan too a walaay mabiskeg a pananisia et nambilay antis nin inter nen Jehova so Ganggan ed Israel tan sakbay nin tuloy a nilukasan nen Kristo so pribilehyon pambilay ed tawen. (Heb. 10:19, 20) Oniay nabasa tayo: “Inawat nen Abraham odino say bini to so sipan a sikatoy magmaliw a tomatawir na mundo diad panamegley na inkatunong lapud pananisia, aliwan diad panamegley na ganggan.” (Roma 4:13; Sant. 2:23, 24) Lapud satan et impasen na Dios a matunong si Abraham.​—Basaen so Roma 4:20-22.

¹⁸ Aglabay ya ibaga na saya ya anggapoy kasalanan nen Abraham legay abayag ya impanlingkor tod si Jehova. Aliwan ontan so kabaliksan na impangipasen na Dios ed sikaton matunong. (Roma 3:10, 23) Lapud anggapoy limitasyon na karunongan nen Jehova, inkonsidera toy nikabkabiig a pananisia nen Abraham tan saray ginawa to lapud satan a pananisia to. Singa bilang, impatnag toy pananisia to ed insipan ya “ilalak” o bini a manlapud poli to. Satan a Bini et say Mesias, odino Kristo. (Gen. 15:6; 22:15-18) Kanian base ed “dondon a binayaran nen Kristo Jesus,” sarag a perdonaen na Dios iray kasalanan ya agawad apalabas. Lapud satan, si Abraham tan arum nin matoor a lingkor a nambilay antis na panaon na saray Kristiano et walaan na ilalon napaoli.​—Basaen so Roma 3:24, 25; Sal. 32:1, 2.

Panliketay Kiyabawag a Matunong Natan

19. Akin et makapaseseg ed saray tuan Kristiano natan so impangipasen na Dios ed si Abraham a matunong?

¹⁹ Makapaseseg ed saray tuan Kristiano natan so impangipasen na maaron Dios ed si Abraham a matunong. Say impangipasen nen Jehova ed sikato a matunong et duma ed saramay nilanaan to na espiritu pian magmaliw a “tomatawir a kaiba nen Kristo.” Satan a melag a grupo et “tinawag pian magmaliw a masanto” tan inawat bilang “ananak na Dios.” (Roma 1:7; 8:14, 17, 33) Diad pidumaan, si Abraham et tinawag a “kaaro nen Jehova” antis nin imbayar so dondon. (Sant. 2:23; Isa. 41:8) Panon to balet iray tuan Kristiano a maniilalon manbilay diad Paraiso ed dalin?

20. Antoy iilaloan na Dios ed saramay ipapasen ton matunong a singa ed si Abraham?

²⁰ Saraya et aliwan singa saramay akaawat na ‘regalon inkatunong’ a walaan na ilalon manbilay ed tawen “panamegley na kibulos lapud dondon a binayaran nen Kristo Jesus.” (Roma 3:24; 5:15, 17) Anggaman ontan, mabiskeg so pananisia rad Dios tan ed dondon ya intarya to, tan ipapatnag da iya panamegley na maabig iran gawa. Kabiangan ed saya so ‘pangipulong ed panarian na Dios tan pangibangat nipaakar ed Katawan a Jesu-Kristo.’ (Gawa 28:31) Kanian nayarian nen Jehova ya ipasen iran matunong a singa met ed si Abraham. Say regalon naawat da​—say pikakaaro ed Dios—​et duma ed “regalon” naawat na saray alanaan. Ingen ta pabpablien da iyan regalo.

21. Antoran bendisyon so nagamoran lapud panangaro tan inkahustisya nen Jehova?

²¹ No iilaloan moy andi-anggaan a bilay diad dalin, nepeg mon nonoten ya aliwan saray agnapanmatalkan ya totoo so nanlapuan na sayan sipan. Imbes, kabiangan itan ed makabat a gagala na Soberano ed Uniberso. Walaray ginawa nen Jehova a kundang pian kalkalnan nasumpal so gagala to. Nibase iraya ed peteg ya inkahustisya. Likud ed satan, ipapatnag na saraya so baleg a panangaro na Dios. Duga labat sirin imay imbaga nen Pablo: “Ipapatnag na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.”​—Roma 5:8.

[Paimano ed leksab]

Kasin Nanonotan Mo?

• Antoy atawir na saray ilalak nen Adan, tan antoy epekto na satan?

• Panon a nitarya so kasimbangan a dondon, tan akin et nibagan kasimbangan itan?

• Anton ilalo so niwalad sika lapud kiyabawag a matunong?

[Litrato ed pahina 13]

Nankasalanan so perpekton too a si Adan. Inyapay na perpekton too a si Jesus so “kasimbangan a dondon”

[Litrato ed pahina 15]

Talagan maong a balita so kiyabawag tayon matunong panamegley nen Jesus!