Agmakasbel Iray Ketegan

Ag-aabuloyan na saray Tasi nen Jehova ya naapektoay panagtrato rad arum lapud pandurumaan na bansa. Ipapapuso ra imay imbaga nen Jesus ed saray disipulo to ya: “Sikayon amin et sanaagi.” (Mateo 23:8) Nanengneng ya talagan tua iya diad duaran pasen ya pandadayewan na saray Tasi​—say sakey et diad Portugal tan say sakey et diad España.

SAY apadiran ya syudad na Valença do Minho ya walad bandad norte na Portugal et impaalagey legay guerra. Manlapud toktok na saray padir et nabantag so Ilog Minho, ya pinagka-ketegan na España tan Portugal. Diad basil na ilog et wadtay syudad na España ya Tui, a ditan et walay katedral ya say itsura to balet et singa salimbengan. Saray padir tan salimbengan ed Tui tan Valença et impaalagey nen koma 17 siglo sanen manggi-guerra so España tan Portugal.

Nen 1995, saray karatulan mangipapanengneng na ketegan na sayan duaran bansa ya membro na European Union (asosasyon na saray bansa ed Europa) et ineekal la. Anggapo met la ray buis na saray produkton iloloob tan ipapaway ed baetan na sarayan bansa. Balet, pian napankasakey so totoo, aliwan satan labat so kaukolan ya gawaen. Say nalalanor dia et say isip tan puso. Diad Valença, walay melag tan marakdakep ya bilding a mangipapanengneng no panon ya napankasakey iray totoon nanlapud nandumaan a bansa. Satan a bilding et say Kingdom Hall, pasen ya pandadayewan na saray Tasi nen Jehova. Samay Kingdom Hall ed Valença et uusaren na duaran kongregasyon, say sakey et Spanish congregation, say sakey et Portuguese congregation.

Say gapoan to ’ya et nen 2001. Kakkaukolan na saray Tasi ed Tui so balon Kingdom Hall. Agda la narentaan imay datin uusaren dan lugar, tan anggapoy baleg ya pundo ran pampaalagey na balon Kingdom Hall. Ni say manrenta ingen et agla sarag na badyet da ta daiset labat so membroy kongregasyon da. Kanian akitongtong irayan Tasi ed España diad saray agagi dan Portuguese diad Valença no ayos labat ya miusar irad Kingdom Hall da, ya pigaran kilometro labat so kaarawi to ed sentro na Tui.

“Nanmiting kami nen Disyembre 2001, insan kami nandesisyon,” so inkuan nen Eduardo Vila, membro na Tui Congregation. “Kayari na saman a miting, aliknak ya tinenyeg nen Jehova so puso na saray kaagian min Portuguese. Baleg so sakripisyo ra pian nipaalagey da imay balibalin Kingdom Hall da, tan makapabiskeg na pananisia so liket dan ipausar met itan ed sikami.”

“Inawat mi ray agagi min Español diad Kingdom Hall mi,” so kuan nen Américo Almeida, Portuguese ya Tasi ya kaibad saman a miting. “Matalek kamin bendisyonan nen Jehova iyan apantongtongan mi, tan nampapakna kamid saksakey a desisyon.” Maong so nagmaliw ya ulopan na sarayan Español tan Portuguese ya Tasi. “Ompan singa ag-iya napanisiaan na arum, balet diad tua, agmi ingen nanaimano ya nandumaay bansa mi. Sanaagi kami ed espiritual,” so kuan nen Paolo ya tagad Valença.

Say sakey ya unonan naimano na saray ombibisitad saman a Kingdom Hall et say duaran wall clock ya parehoy itsura da balet ta nandumaay oras da. No ikomparad oras ed Portugal, makakaunay sakey oras so España, balet likud ed satan et anggapo lay arum a nanengneng ya pandumaan. Sanen kaukolan ya i-renovate imay bilding, say tinmulong ed saray makukulin membro na sayan duaran kongregasyon et say Regional Building Committee ya walad España. “Dakel so tinmulong ya marundunong iran agagi a nanlapud España, a pigarad sikara et nanlapu nid lugar ya masulok a 160 kilometro so kaarawi to,” so kuan nen Paolo. “Lapud saman a proyekto, lalon inmelet so aroan tan pankakasakey na duaran kongregasyon.”

Nengnengen tayo pay komaduan alimbawa a mamapaneknek ya saray ketegan et agmakasbel ed pankakasakey.

Pankakasakey Diad Aketeg ya Lawak

Say Puigcerdá et syudad ed España ya asingger ed ketegan na France. Wala itan ed sentro na mabunan lawak ya apaliberay ataragey a kapalandeyan na Pyrenees. Say interon lawak a kabkabat ed tawag ya Cerdaña et datin sakop na España. Balet nen 1659, diad paknaan a tatawagen ya Treaty of Pyrenees, inmabuloy so España ya say kapaldua na sayan lawak et onlad France.

Say pansho-shoppingan na saray Pranses ya asingger ed satan a ketegan et diad Puigcerdá, say sankabalgan a syudad ed satan a lawak. Tan nanlapu lad 1997, inmabuloy iray Tasi diad Puigcerdá ya usaren met na saray kaagian dan Pranses so Kingdom Hall da. Diad saman a taon, agla narentaan na sarayan Pranses imay datin uusaren dan Kingdom Hall. Say sankaasinggeran ya Kingdom Hall ed France et sakey oras nin biahien, tan no panaoy ambetel, makapal so yelo ed saray kapalandeyan ya kaukolan dan dalanen pian nasabi itan.

Sanen naamtaan na saray Tasi ed Puigcerdá ya kakkaukolan na saray kaagian dan Pranses so pasen a napantiponan, tampol iran inmabuloy ya ipausar so Kingdom Hall da. “Eksayted kamin amin ya nakaiba ran mangusar ed Kingdom Hall mi,” so kuan nen Prem, a tagad man ed Puigcerdá. “Siempre, oniay liknaan mi lapud saray naaralan mid Biblia. Kayari pigaran simba, kaiba mi la ran manguusar, tan 13 taon kami lan saniiba.”

“Samay Kingdom Hall ed Puigcerdá so sankaabigan lan pasen a sarag min usaren,” so kuan nen Eric, elder ed samay French congregation. “Tan agko nalingwanan imay maaron impan-welcome na Spanish congregation ed sikami. Dinekorasyonan da imay Kingdom Hall na baleg ya bouquet tan walay akasulat ya ‘Welcome kayo dia, inad-aro min agagi.’”

“Inisip na totoo ya naandi la ‘may kongregasyon mi ta agmi la uusaren imay datin Kingdom Hall,” so kuan nen Eric. “Balet lapud lanang kamin manpupulong diad saman a lugar, tan mangibubunog kami imbitasyon parad saray pantitipon dimad Kingdom Hall ed España, naamtaan dan agnaandi so kongregasyon mi. Maliket iray interesado ya onatendid Kingdom Hall ed España. Ontan met, lapud saksakey a hall so uusaren na kongregasyon mi tan na Spanish congregation, lalo kamin inmapit ed sakey tan sakey. Nensaman, amta min walay Spanish congregation diad ketegan na España tan France, balet ta mataltalag kamin makapannenengneng. Natan ya lanang kami lan makapanuulop, agmi la iisipen ya bukbukor mi ed sayan nisulinek ya pasen.”

Kasin lapud nandumaay kultura da et ag-ira komportable ed sakey tan sakey? “Sanen naamtaan kon saray pantitipon mi et dia lad ketegan na España, singa apagaan ak,” so inamin na 80 años a Tasin Pranses. “Balet misalsalamat ak ta inawat kami na saray agagid Puigcerdá tan makakkaaro ra, kanian agkamin balot nairapan ed sayan pananguman. Diad tua, pinaneknekan na saya ya talagan walay internasyonal a pankakasakey na saray lingkor nen Jehova.”

Say Makapangiter na Tuan Pankakasakey

Imbaga na saray angigapo ed European Union a saray bansan membro na satan et “determinadon mas pankasakeyen iray totood Europa.” Pian tampol dan nagawaan iya, saray karatulan mangipapanengneng ed ketegan na kada bansa et ineekal nen 1980’s tan 1990’s. Balet, kaukolan ya ekalen met ed isip so antokaman ya makasbel ed pankakasakey.

Gagawaen na saray Tasi nen Jehova so anggaay nayarian dan paliisan so agpanmatalek ed arum tan say panaglabi. Amta ran walay kaabigan na pandurumaan na kultura. Amta da met a “say Dios et agmanangidumaduma.” (Gawa 10:34) Diad saray internasyonal a kombension tan diad Kingdom Hall da, talagan nalilikna ran “agaylay abig tan makapaliket ed saray totooy Dios a manbilay iran mankakasakey!” (Salmo 133:1, Maung a Balita) Say sakey a prueba ed satan et say impikasakey na saray Tasi ed Valença tan Puigcerdá ed saray kaagian dad kaabay dan bansa.

[Blurb ed pahina 13]

“Ompan singa ag-iya napanisiaan na arum, balet diad tua, agmi ingen nanaimano ya nandumaay bansa mi. Sanaagi kami ed espiritual”

[Blurb pahina 14]

“Lapud saman a proyekto, lalon inmelet so aroan tan pankakasakey na duaran kongregasyon”

[Blurb ed pahina 15]

“Agaylay abig tan makapaliket ed saray totooy Dios a manbilay iran mankakasakey!” SALMO 133:1, MB

[Litrato ed pahina 12, 13]

Say Tui tan Ilog Minho no bantagen manlapud apadiran a syudad na Valença do Minho

[Litrato ed pahina 14]

Impan-renovate ed Kingdom Hall

[Litrato ed pahina 15]

Say kapalandeyan na Pyrenees tan say lawak na Cerdaña

[Litrato ed pahina 15]

Duaran elder ed duaran kongregasyon ya manguusar ed Kingdom Hall diad Puigcerdá, sakey ya Spanish tan sakey a French