Onapit ed Dios
‘Siak, si Jehova a Dios Mo, so Mamemben ed Kawanan a Limam’
“PEKET kad limak,” so inkuan na sakey ya ama ed ugaw nin anak to antis iran ombasil ed karsadan dakel so luluganan. Lapud akapeket a malet ed mabiskeg a lima nen ama to, maligen so liknaan na ugaw tan agnatatakot. Naisip mo la kasin wala met komoy mangitabin ed sika legan mon aarapen iray kapagaan ed bilay? No ontan, naligliwa ka ed saray salitan insulat nen Isaias.—Basaen so Isaias 41:10, 13.
Sarayan salita nen Isaias et parad saray Israelita. Impasen na Dios itan a nasyon bilang ‘pabpablien a pinagka-kayamanan’ to, balet apaliberan itan na saray kabusol. (Exodo 19:5) Nepeg kasin ontakot iray Israelita? Inusar nen Jehova si Isaias pian ipasabi panamaseguro to. Legan tayon uusisaen irayan salita, tandaan ya onaplika met iraya ed saray mandadayew ed Dios natan.—Roma 15:4.
“Agka antakot,” so kuan nen Jehova. (Bersikulo 10) Makabkabaliksan irayan salita. Impaliwawa nen Jehova no akin ya agnepeg ya ontakot iray totoo to: “Ta wala ak ed sika.” Sikatoy naasinggeran a tampol parad tulong. Labay ton ipaamtad saray mandadayew ed sikato ya sikatoy wala ed sikara, a singano kaabay da, tan naynay ya akaparaan ya suportaan ira. Talagan makaligliwa irayan salita.
Onia ni impaseguro nen Jehova ed saray mandadayew ed sikato: “Agka napagaan.” (Bersikulo 10) Say Hebreon salita ya inusar dia et nayarin ontukoy ed saramay “lingaw-lingaw pian nengnengen no kasin walay antokaman a peligro.” Impaliwawa nen Jehova no akin et agnepeg ya ontakot iray totoo to: “Ta siak so Dios mo.” Agta makapaseseg itan? Si Jehova so “Sankatageyan” tan “Makapanyarin-amin.” (Salmo 91:1) Lapud say Dios da et si Jehova, say makapanyarin-amin, anggapoy nepeg dan takotan!
Anto sirin so nailaloan na saray mandadayew ed si Jehova? Oniay insipan to: “On, ampayaen [odino bembenan] ta ka ed nikawanan a lima na inkatunong ko.” (Bersikulo 10) Imbaga to met ya: “Siak, si Jehova a Dios mo, a mangitagey [odino mamemben] na kawanan a limam.” (Bersikulo 13) Antoy naisip mo no narengel mo iratan a salita? Oniay impaliwawa na sakey a reperensya: “Naimadyin tayod sayan duaran bersikulo so sakey ya ateng tan sakey ya anak. Aglabat akaalagey [so ama] pian mangidepensa, noagta sankabembenan to imay anak to; agto abuloyan a nisian so anak to ed sikato.” Nonot mo pa labat—ag-abuloyan nen Jehova a nisian ed sikato iray totoo to, anggan diad singa sankaermenan lan panaon.—Hebreos 13:5, 6.
Saray mandadayew ed Dios natan et talagan naligliwa ed saray salitan insulat nen Isaias. Diad sayan “nikadkaduma tan mair-irap a panaon,” no maminsan et nayarin onkapuy itayo lapud saray kapagaan ed bilay. (2 Timoteo 3:1) Balet agtayo bukbukor. Mabulos si Jehova ya alaen tan bembenan so lima tayo. Singa ugaw ya matalek ed ama to, sarag tayoy ompeket ed mabiskeg a lima nen Jehova, a segurado itayon igiya to itayo ed dugan dalan tan tulongan to itayo diad panaon na pankaukolan.—Salmo 63:7, 8.