“Pangarap Koy Magmaliw ya Pari”

ISTORYAY BILAY KO:

Nianak ak ed melag a baley na Texcoco. Diad saman a panaon, dakel ed saray karsada et aliwan sementado tan marabok. Lanang kan makanengneng na totoon paonlad baley a nanlapud saray asingger ya baryo ya awit da ray kabayo dan apano na saray lako ra. Agaylay irap na bilay mi. Siamera kamin sanaagi tan siak so komapito. Mangaapiger na guaraches (sandalyas) si tatay ko pian nasuportaay pamilya mi. Balet ta sikatoy inatey nen pitoy taon ko ni labat. Kanian manlapud saman, nairapan lay nanay kon mangitarya parad pamilya mi.

Si lakik et marunong ya mantogtog na violin tan sikatoy conductor na sakey ya orchestra parad relihyoson musika. Amin kami lawari et walay amta ton togtogen ya instrumento. Si nanay ko et kaibad choir na simbaan, tan si uncle ko et opera singer tan pianist. Relihyoso kami—sakristan ak, tan labay koy magmaliw ya misionero na Katoliko. Balet, mahilig ak met ya manbantay na pelikulan karate. Lapud lanang ak ya manbabantay na saratan, mas nagmaliw ya mipepetang so ulok.

Nanaral ak ed eskuelaan a singa seminaryo diad Puebla. Pangarap koy magmaliw ya pari. Balet nen asingger ak lan man-graduate, adismaya ak ed Katolikon Simbaan. Walay ugaw nin madre ya mangaakit ed siak, balet agak inmabuloy. Lapud satan ya agawa labay ko la laingey mangasawa. Anengneng ko met so doblin panagbilay na dakel ed saray pari. Kanian ag-abayag agko la labay so magmaliw ya pari.

Nanaral ak ed National Conservatory of Music diad Mexico City. Ka-graduate ko, angasawa ak, tan awalaan na apatiran ananak. Pian nalegpet koy pamilyak, mangakansion ak ed saray Misa na Katolikon Simbaan.

Diad gapo ni labat et maproblema lay relasyon mi nen asawak. Lanang kamin mankokolkol lapud imon. Nen unaan et ebatan ni labat, anggad mansasakitan kami la. Kanian kayari na 13 taon, nansian tan nan-divorce kami.

NO PANON YA INUMAN NA BIBLIA SO BILAY KO:

Say inmunan impitongtong kod Saray Tasi nen Jehova et nen antis kamin mansian nen asawak. Duaran Tasi so linmad abung mi tan tinepet da no labay koy manaral na Biblia. Abalang ko et dakel lay amtak ed relihyon, kanian akitongtong ak ed sikara pian paneknekan ya aliwa ra. Tinepetan ko ra na mairap iran tepet ya say amtak et anggapoy ebat. Balet pankelawan ko ta balibali ebat dad saratan ya based Biblia. Diman ko naamtaan ya daiset ni manayay amtak ed Biblia. Balet aliwdiway panagtrato nen asawak ed saray Tasi, tan dakel so trabahok, kanian agla ra linmad abung.

Kayari limay taon, walay inyamong kon sananey ya bii, si Elvira, tan akatongtong ko lamet iray Tasi nen Jehova. Ayos labat ed si Elvira iray Tasi nen Jehova, kanian regular ak lan makakapanaral na Biblia kaiba iray Tasi. Balet pigaran taon ni linmabas insan ko nauman so kabibilay ko.

Naisip ko ya no labay koy mandayew ed si Jehova ya interon puso, baleg a pananguman so kaukolan kon gawaen. Unona et kaukolan ko lan itunday pangakansion kod simbaan. Kanian kaukolan koy mananap na arum a trabaho parad pambilay mi. (Apocalipsis 18:4) Kaukolan ko met ya gawaen lan legal so relasyon mi nen Elvira.

Balet say sankairapan a gawaen et say pangontrol kod petang na ulok. Duaran bersikulod Biblia so talagan akatulong ed siak: Salmo 11:5, ya mangibabagan kabusol nen Jehova so karawalan, tan 1 Pedro 3:7, ya angibangat ed siak ya no labay kon dengelen nen Jehova so pikakasik, nepeg kon tratoen ya marespeto so asawak. Legan kon nononoten irayan bersikulo tan onkekerew na tulong ed si Jehova diad pikakasi, kalkalnak lan nakokontrol so petang na ulok.

MARAKEP IRAN RESULTA:

Maliket la natan so pamilyak. Gagawaen kon amin pian onapit so relasyon kod saray ananak kod inmunan pamilyak tan tutulongan ko met so pamilyak natan ya ombiskeg ed pananisia.

Nen ugaw ak ni, pangarap koy magmaliw ya pari tan ontulong ed totoo. Natan et mas maliket lay bilay ko. Susuportaan koy pamilyak diad pambabangat koy musika. Misalsalamat ak ta inanosan ak nen Jehova, inikdan to ak na tsansan manguman tan magmaliw ya maong a too!