Antoy Naaralan Tayod Sakey a Kriminal?

Say kriminal ya natutukoy dia et sayay nanenengneng mod litrato ya katongtong nen Jesus. Talagan nagbabawian la na sayan kriminal iray kasalanan to. Kinerew tod si Jesus: “Nonot mo ak sano onsabi ka ed panarian mo.” Natan, singa nanenengneng mo, kakatongtongen nen Jesus iyan kriminal. Antam no antoy ibabaga nen Jesus ed sikato?—a Isisipan nen Jesus ed sikato: “Tua ibagak ed sika natan, nakaiba ta ka ed Paraiso.”

Anto kasi itsura na satan ya paraiso?— Pian naamtaan ta so dugan ebat, pantongtongan ta so Paraison ginawa na Dios parad inmunan laki tan bii, si Adan tan Eva. Iner itan? Kasin diad tawen odino diad dalin?—

No say iisipen mo et diad dalin, duga ka. Kanian no samay kriminal et wala ed “Paraiso,” nepeg ya isipen tayon sikatoy manbilay diad dalin no paraiso la itan. Antoy itsura na Paraiso?— Amtaen.

Kayarin pinalsa nen Jehova a Dios so inmunan totoo, si Adan tan Eva, nabasa tayod Biblia ya inkarga to rad sakey a paraiso diad dalin. Tinawag itan ya “hardin na Eden.” Naiimadyin mo ta no panon karakep so “hardin na Eden”?— Seguradon sankarakepan itan ya lugar no ikomparad saray hardin ya anengneng mo la!

Balet isip mo pa iya. Kasin nakaiba nen Jesus ed dalin imay kriminal ya nagbabawid saray kasalanan to?— Andi, ta diad saman et manaari lay Jesus ed tawen tan uuleyan to ray totood Paraiso diad dalin. Kanian nibagan nakaiba nen Jesus so kriminal lapud bilayen to lamet tan seguroen ton marakep so bilay to diad Paraiso. Balet akin et panayamen nen Jesus ed Paraiso so datin kriminal?— Pantongtongan ta itan.

Tua a dakel so mauges a ginawa na sayan kriminal. Tan binilyon met ya totoon nambilay ed dalin so akagawa na ontan. Balet, dakel ed sikara so akagaway ontan lapud agda akabat si Jehova tan agda naamtaan no anto ray labay ton gawaen da.

Kanian say ontan iran totoo, pati samay kriminal ya akatongtong nen Jesus ya akapasak ed kiew et nabilay lamet diad Paraiso. Ibangat ed sikara no antoy labay na Dios. Insan da pruebaan ya inaro day Jehova.

Antam no panon dan napaneknekan ya inaro ray Dios?— Diad panggawa ray labay to. Talagan maliket so manbilay ed Paraiso tan nakaiban lanang iray totoon mangaarod si Jehova tan ed balang sakey!