Tuloken Iray Pastol nen Jehova
“Matulok kayo komon ed saramay mangidadaulo diad limog yo tan mapasakop kayo komon, ta babantayan da iray kamarerwa yo.”—HEB. 13:17.
1, 2. Akin et inkompara nen Jehova so sarili to ed sakey a pastol?
INKOMPARA nen Jehova so sarili to ed sakey a pastol. (Eze. 34:11-14) Makatulong itan pian natalosan tayo no anton klase na Dios si Jehova. Bibidbiren na sakey a maaron pastol ya akadependid sikatoy bilay na saray karneron walad pulok to. Itotonton to rad panagpastolan tan abay na danum (Sal. 23:1, 2); agew-labi to ran babantayan (Luc. 2:8); proprotektaan to rad saray masisibeg ya ayayep (1 Sam. 17:34, 35); aawiten tod pagew to iray kapangiyanak (Isa. 40:11); aanapen to ray nababalang, tan aasikasoen ton maong iray asakitan.—Eze. 34:16.
2 Say maslak ya panaayaman na saray totoo nen Jehova nensaman et diad saray panagpastolan tan kaumaan, kanian atalosan dan tampol no akin ya inkompara nen Jehova so sarili to ed sakey a maaron pastol. Amta ra ya kaukolan ya asikasoen tan bantayan a maong iray karnero pian nabilay ira. Mipadpara, kaukolan na saray totoo so panangasikaso tan panangiwanwan nen Jehova. (Mar. 6:34) No agto ra asikasoen tan idaulo, kaskasian ira. Main-inomay iran atakien tan anggapoy direksion na bilay da, singa saray “karnero ya andian na pastol.” (1 Ara. 22:17) Balet, maar-aron itatarya nen Jehova so pankaukolan na totoo to.
3. Antoy pantongtongan tayo ed sayan artikulo?
3 Si Jehova et singa pastol ya anggad natan. Siansia nin aasikasoen to ray singa karneron totoo to. Pantongtongan tayo no panon ton iwawanwan tan itataryay pankaukolan na saray karnero to natan. Nengnengen tayo met no antoy kaukolan tayon gawaen pian minabang ed maaron panangasikaso to.
SAY MAONG A MANAGPASTOL ET ANURO NA SARAY KATULONGAN A PASTOL
4. Panoy pangaasikaso nen Jesus ed saray karnero nen Jehova?
4 Tinuro nen Jehova si Jesus bilang Ulo na Kristianon kongregasyon. (Efe. 1:22, 23) Ipapatnag nen Jesus, say “maong a managpastol,” iray panlabayan, gagala, tan kualidad na Ama to. Inter to ni ingey kamarerwa to parad saray karnero. (Juan 10:11, 15) Talagan bendisyon ed saray totoo so dondon bagat! (Mat. 20:28) Gagala nen Jehova ya “balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan”!—Juan 3:16.
5, 6. (a) Siopa ray tinuro nen Jesus ya mangasikasod saray karnero to, tan antoy kaukolan ya gawaen na saray karnero pian minabang irad panangasikaso to? (b) Anto so manunan rason no akin ya manpapasakop tayod saray elder?
5 Panon a nipanengneng na saray karnero ya si Jesu-Kristo so Managpastol da? Oniay inkuan nen Jesus: “Saray karnerok et ondedengel ed boses ko, tan kabat ko ra, tan tutumboken da ak.” (Juan 10:27) Dedengelen na saray karnero so boses na Maong a Managpastol diad panguunor dan naynay ed panangiwanwan to. Kaibad satan so pikokoopera dad saramay tinuro ton katulongan a pastol. Nen inmunan siglo, anuro si Jesus na saray apostol tan disipulo ya mangituloy ed kimey ya inggapo to. Ingganggan to ran “ibangat” tan ‘pakanen iray angkekelag a karnero to.’ (Mat. 28:20; basaen so Juan 21:15-17.) Legan ya onlalaknab so maong a balita tan ondadakel iray disipulo, seseguroen nen Jesus ya wala ray maespiritual a Kristiano ya manpastol ed saray kongregasyon.—Efe. 4:11, 12.
6 Imbaga nen apostol Pablo ed saray manangasikaso ed inmunan siglon kongregasyon diad Efeso a say masanton espiritu so anuro ed sikara ya ‘manpastol ed kongregasyon na Dios.’ (Gawa 20:28) Ontan met iray Kristianon manangasikaso natan lapud aturo ira base ed saray Makasulatan ya kakaukolanen ya impuyan na masanton espiritu. Kanian no tutuloken tayo ray manangasikaso, rerespetoen tayoy Jehova tan si Jesus, say duaran sankamaongan a Pastol. (Luc. 10:16) Saya so manunan rason no akin ya mabulos tayon manpapasakop ed saray elder. Balet wala ni ray arum ya rason no akin ya tutuloken tayo ra.
7. Panon kan tutulongan na saray elder ya mansiansian maapit ed si Jehova?
7 No mangiiter iray elder na panamaseseg tan panangiwanwan ed saray kapananisiaan da, naynay dan ibabase itan ed saray ibabaga odino prinsipyo na Biblia. Aglabay na saray elder ya diktaan iray agagi no panoy pambilay da. (2 Cor. 1:24) Imbes, mangiiter iray Makasulatan a panangiwanwan a makatulong ed saray agagi ya manggaway maabig iran desisyon. Diad ontan, niwalay pankakasakey tan kareenan ed kongregasyon. (1 Cor. 14:33, 40) Ibabaga na Biblia ya saray elder et “babantayan da iray kamarerwa yo.” Panon? Labay na saray elder ya tulongan so balang sakey ed kongregasyon ya mansiansian maapit ed si Jehova. Kanian onkikiwas iran tampol no nalikas dan say sakey ya agi et ngalngali la makagawa odino akagawa lay “aliwa.” (Gal. 6:1, 2; Jud. 22) Agta maabig irayan rason pian magmaliw a ‘matulok ed saramay mangidadaulo’?—Basaen so Hebreos 13:17.
8. Panon ya proprotektaan na saray elder so pulok na Dios?
8 Oniay insulat na sakey ya maespiritual a pastol a si apostol Pablo ed saray agagid Colosas: “Manalwar kayo: ompan walay mamatit ed sikayo ya usaren toy minumundon karunongan tan maapan panagpalikdo unong ed tradisyon na totoo, unong ed inuugaw iran bengatla ed mundo tan aliwan unong ed si Kristo.” (Col. 2:8) Nanengneng ed satan a pasakbay so sakey nin rason no akin ya importante pangimano ed Makasulatan a simbawa na saray elder. Proprotektaan day pulok diad panutulong ed saray agagi ya magmaliw ya alerto ed siopaman ya manalin mamakapuy ed pananisia ra. Impasakbay nen apostol Pedro ya wala ray “palson propeta” tan “palson managbangat” ya “sasagyaten da iray makapuy” pian manggaway aliwa. (2 Ped. 2:1, 14) Saray elder ed panaon tayo et nepeg a mangiter na ontan a pasakbay no nakaukolan. Lapud matatken irad espiritual, dakel lay eksperiensya ra. Sakey ni, antis iran aturo ya elder, anengneng ed sikara ya malinew so pakatalos dad Kasulatan tan kualipikado iran mangibangat na katuaan. (1 Tim. 3:2; Tito 1:9) Lapud eksperiensyado, balanse, tan walay nibase ed Biblia ya karunongan da, sarag day mangiter na makabat a panangiwanwan ed saray agagi.
SAY MAONG A MANAGPASTOL ET PAPAKANEN TAN PROPROTEKTAAN TO RAY KARNERO
9. Panon ya iwawanwan tan papakanen nen Jesus so Kristianon kongregasyon natan?
9 Diad panamegley na organisasyon to, mangitatarya si Jehova na daakan ya espiritual a naakan parad amin ya agagi ed interon mundo. Dakel a Makasulatan ya simbawa so naaawat tayo panamegley na saray publikasyon tayo. Niarum ni, panapanaon ya mangiiter so organisasyon na panangiwanwan ed saray elder ed kongregasyon, balanglan panamegley na saray sulat odino diad saray instruksion ya ipapasabi na saray ombiabiahen manangasikaso. Diad saratan a paraan, saray karnero et makakaawat na malinew ya panangiwanwan.
10. Antoy responsabilidad na saray manangasikaso ed saramay inmarawi ed kongregasyon?
10 Responsabilidad na saray manangasikaso ya protektaan tan asikasoen so kongregasyon, lalo lad saramay kinmapuy so espiritualidad da odino akagaway seryoson lingo. (Basaen so Santiago 5:14, 15.) Nayarin walad sikaray inmarawi lad kongregasyon tan agla mibibiang ed saray Kristianon aktibidad. No ontan so situasyon, agta gawaen na sakey ya maasikason elder so anggaay nayarian to ya anapen so kada karneron nababalang tan pasesegen ton ompawil ed pulok, salanti, diad kongregasyon? On, ta inkuan nen Jesus: “Aliwan makapaliket ed Amak a walad tawen no nabalang so sakey ed sarayan angkekelag.”—Mat. 18:12-14.
ANTOY NEPEG YA PANMORIA TAYOD LINGO NA SARAY KATULONGAN A PASTOL?
11. Akin ya mairap parad arum so itulok ed saray elder?
11 Si Jehova tan si Jesus et perpekto iran Pastol. Balet ta saray totoon katulongan a pastol ya angimatalekan dad kongregasyon et andi. Lapud satan, nayarin mairap parad arum so itulok ed saray elder. Nayarin oniay ikatunongan da: ‘Kapara tayo labat iray elder, agmet ira perpekto. Akin et dengelen tayo ni simbawa ra?’ Tua ya aliwan perpekto iray elder, balet kaukolan ya dugay panmoria tayod saray lingo tan kakapuyan da.
12, 13. (a) Anto ray lingo na saray inusar nen Jehova ya mangidaulod totoo to nensaman? (b) Akin ya akasulat ed Biblia iray lingo na saray lalakin tinuro to?
12 Ag-inyamot na Kasulatan iray lingo na saramay inusar nen Jehova ya mangidaulod totoo to nensaman. Singa bilang, si David et nilanaan ya ari tan lider na Israel, balet ta atukso tan nankasalanan na pikakalugoran tan panagpatey. (2 Sam. 12:7-9) Imanoen met si apostol Pedro. Anggano naikdan na baleg ya responsabilidad ed Kristianon kongregasyon nen inmunan siglo, akagawa na saray seryoson lingo. (Mat. 16:18, 19; Juan 13:38; 18:27; Gal. 2:11-14) Nilikud ed si Jesus, anggapoy toon perpekto kayari di Adan tan Eva.
13 Akin ya impaisulat nen Jehova ed Biblia iray lingo na saray lalakin tinuro to? Say sakey ya rason et pian nipanengneng ya sarag ton usaren iray agperpekton lalaki ya mangidaulo ed totoo to. Diad tua, ontan so naynay ya gagawaen to. Kanian agtayo uusaren ya baraan so ag-inkaperpekto na saray mangidadaulod sikatayo natan pian manmeremere odino agrespetoey autoridad da. Iilaloan nen Jehova ya respetoen tan tuloken tayo ra.—Basaen so Exodo 16:2, 8.
14, 15. Antoy naaralan tayod paraan na impangipasabi nen Jehova na instruksion ed totoo to nensaman?
14 Importante ya tuloken tayo iray mangidadaulod sikatayo natan. Isipen pa no panon ya angiter si Jehova na instruksion ed saray totoo to nensaman diad saray mapeligron panaon. Singa bilang, nen pinmaway iray Israelita ed Ehipto, inikdan ira na Dios na instruksion panamegley nen Moises tan Aaron. Pian agnalanor ed komasamplon salot iray Israelita, kaukolan dan tuloken iray instruksion nen Jehova. Ingganggan to ran mangiparaan na espisyal a panangan tan say dala na karneron pinakgeran da et ipuranis dad lusek na puerta tan tagey na puertay kaabungan da. Wala kasi nadngel dan boses ya nanlapud tawen? Anggapo. Naawat day instruksion panamegley na saray mamasiken ed Israel ya angipasabian nen Moises ed mensahe nen Jehova. (Exo. 12:1-7, 21-23, 29) Diad saman et inusar nen Jehova si Moises tan saray mamasiken ed Israel ya mangipasabi na instruksion ed saray totoo to. Ontan met so importantin responsabilidad na saray elder natan.
15 Nayarin wala met iray nanonotan mon arum ya inkagawad Biblia ya angusar si Jehova na totoo odino anghel pian mangipasabi na instruksion a makapangisalbay bilay. Diad sarayan amin, inikdan nen Jehova iray mensahero to na autoridad ya mansalita ed ngaran to tan ipasabid totoo to no antoy kaukolan dan gawaen pian nasarag da ray mapeligron situasyon. Nailaloan tayo ya ontan met so gawaen nen Jehova parad saray totoo to diad Armagedon. Balet, saray elder ya inikdan nen Jehova na responsabilidad ya mangirepresentad sikato odino say organisasyon to natan et agda nepeg ya abusoen so autoridad ya inter tod sikara.
“SAKEY A PULOK, A WALAY SAKEY A MANAGPASTOL DA”
16. Anto so “salita” ya kaukolan tayon dengelen?
16 Saray totoo nen Jehova et “sakey a pulok” ya aasikasoen na “sakey a managpastol,” si Jesu-Kristo. (Juan 10:16) Oniay impaseguro nen Jesus ed saray disipulo to: “Wala ak ed sikayo ed amin ya agew anggad sampot a panaon na mundo.” (Mat. 28:20) Bilang Ari ed tawen, kontrolado toy amin ya nagawa a manresultad kaderal na mundo nen Satanas. Pian makapansiansia itayod pulok na Dios tan nasalimbengan, kaukolan tayon dengelen so ‘salita ed benegan tayo,’ a mangibabaga no iner so arapen tayo. Kaibad satan a “salita” iray ibabaga na masanton espiritu na Dios a walad Biblia tan saray ibabaga nen Jehova tan si Jesus panamegley na saray tinuro dan katulongan a pastol.—Basaen so Isaias 30:21; Apocalipsis 3:22.
17, 18. (a) Antoy mamipeligro ed pulok na Dios, balet antoy naseguro tayo? (b) Antoy pantongtongan ed onsublay ya artikulo?
17 Ibabaga na Biblia ya si Satanas et “singa managlem a leon, a manaanap na buagen to.” (1 Ped. 5:8) Singa sakey a masibeg tan narnarasan ya ayep, sisiim-siimen toy pulok na Dios tan manaalagar na pankanawnawa pian atakien so siopaman ya ag-alerto odino onaarawi. Importante sirin ya mansiansia tayon maapit ed kongregasyon tan ed si Jehova, say “managpastol tan manangasikaso na saray kamarerwa” tayo. (1 Ped. 2:25) Oniay ibabaga na Apocalipsis 7:17 nipaakar ed saramay makaliktar ed baleg ya irap: “Say Kordero [si Jesus] . . . et pastolan to ra tan itonton to ra diad saray subol na danum na bilay. Tan punasen na Dios so amin a lua ed kamataan da.” Talagan alay abig itan ya sipan!
18 Kayari tayon inkonsidera so importantin responsabilidad na saray Kristianon elder ya manpastol ed kongregasyon, say balibalin tepet et, Panon a naseguro na sarayan aturon lalaki ya dugay pantratrato dad saray karnero nen Jesus? Pantongtongan tayoy ebat ed onsublay ya artikulo.