Atateng​—Pastolan Yo ray Ananak Yo

1, 2. (a) Anto ray kimey na sakey a pastol diad Israel nensaman? (b) Akin ya singa pastol iray atateng?

MAIRAP so kimey na saray pastol diad Israel nensaman. Kaukolan dan anosay petang tan betel, tan kaukolan dan protektaan iray karnero ed saray masisibeg ya ayep tan matatakew. Regular dan nenengnengey kipapasen na kada karnero tan no walay mansasakit o asugatan et tambalen da. Aasikasoen dan maong iray angkekelag ta makapuy ni ra, aliwan singa saray angkabaleg la.​—Gen. 33:13.

² Saray Kristianon atateng et singa ra met pastol ta kaukolan dan ipanengneng iray kualidad na literal a pastol. Responsabilidad dan pabalegen iray ananak da “diad panagdisiplina tan panamilin nen Jehova.” (Efe. 6:4) Kasin mainomay itan ya gawaen? Andi! Dakel so propagandan uusaren nen Satanas pian impluensyaan iray ananak. Likud ed satan, wala ray mauges ya tendensia da ta imperpekto ra. (2 Tim. 2:22; 1 Juan 2:16) No wala ray anak yo, panon yo ran natulongan? Aralen tayoy taloran sarag yon gawaen pian napastolan yo ray anak yo​—kabaten ira, pakanen ira, tan igiya ira.

KABATEN IRAY ANAK YO

3. Panon ya ‘nakabat a maong’ na atateng iray ananak da?

³ Nenengnengen na maong a pastol so kipapasen na kada karnero pian naseguro ton anggapoy sakit da. Maabig no ontan met so gawaen yod saray ananak yo. Ibabaga na Biblia: “Nepeg mon kabaten a maong so pulok mo.” (Uli. 27:23, NW) Pian nagawaan yo itan, kaukolan yon obserbaan so kiwas da tan amtaey iisipen tan nalilikna da. Panon? Mitongtong kayon lanang ed sikara.

4, 5. (a) Anto ray praktikal ya nagawaan na atateng pian ibalikas na ananak da so iisipen tan nalilikna da? (Nengnengen so litratod gapo na artikulo.) (b) Anto ray gagawaen yo pian agnababaingan iray anak yon mitongtong ed sikayo?

⁴ Naimano na pigaran atateng ya mas mairap so mitongtong ed ananak da no tinedyer la ra​—ompan agda la labay o ambaing da lan ibagay iisipen tan nalilikna da. No ontay situasyon yo, antoy sarag yon gawaen? Imbes ya piliten yo ray anak yon mitongtong ya seryoso, sali yo ran katongtongen a singa maniistoryaan kayo labat. (Deu. 6:6, 7) Manggawa kayoy paraan pian makapan-iba kayo. Sarag yoy onakar odino manpasyar, manggalaw, odino saniban mankimey diad abung. Mas mainomay ya ibaga na saray kalangweran so iisipen tan nalilikna ra ed ontan iran mas relaks ya pankanawnawa.

⁵ Panon to balet no siansia nin aglabay na anak yo so mitongtong? Sali yoy arum ya paraan. Alimbawa, imbes ya tepetan yoy anak yo no kumustay agew to, nayarin sikayo lay unonan mangistorya no anto ray agawad sanagew yo. No ontay gawaen yo, ompan mangistorya met la. Odino no labay yon amtaen so opinyon na anak yo ed sakey ya topic, mantepet kayo balet aliwan nipaakar ed sikato. Nayarin tepetan yo no anto kasi opinyon na saray kakaaro to nipaakar ed satan. Insan yo tepetan no antoy nisimbawa tod sikara.

6. Panon ya nalikna na ananak yo ya walay panaon yod sikara tan mainomay kayon asinggeran?

⁶ Pian mitongtong ed sikayo iray ananak yo, kaukolan ya nalikna dan walay panaon yod sikara tan mainomay kayon asinggeran. No nanengneng dan busy kayon lanang, ompan iyamot da lay problema da. Tan panon yon nipanengneng ya mainomay kayon asinggeran? Agyo labat ibabagan, “Ibagam labat ed sikami no walay problemam.” Kaukolan ya nalikna na ananak yo ya importantid sikayo iray problema da tan kontrol yoy reaksion yo. Oniay imbaga nen Kayla ya 19 años: “Nibabagak ya amin ed si Dad. Paulyanan da ak ya mansalita, tan agda ak huhusgaan; dedengelen da ak ya maong. Insan ira mangiter na balibalin simbawa.”

7. (a) Panon ya magmaliw a balanse so ateng no say pantotongtongan et pidi-date? (b) Panon ya posiblin napasyodot na atateng iray ananak da anggano agda gagagalaen?

⁷ Anggano say pantongtongan yo et sensitibon topic ya singa say pidi-date, aliwan puros negatibo labat so ibaga yo, noagta seguroen ya nibangat yod sikara no panoy dugan panggawad satan. Niay alimbawa to ‘tan: Kunwari et linma kayod restawran balet akasulat ed menu ya anggan antoy kanen yo diman et posiblin onsakit so eges yo. Ompan onalis kayo la tan mananap kayoy arum ya restawran. Ontan met so nayarin reaksion na anak yo no onkerew iray simbawad sikayo balet ta puros negatibo so narengel da. (Basaen so Colosas 3:21.) Mas maabig no balanse kayo. Oniay naobserbaan na kalangweran a sister ya si Emily: “No kakatongtongen ak na atateng ko nipaakar ed pidi-date, agda ipapalikna ya makapuy itan. Ibabaga ran maliket ya nakabat so sakey ya toon posiblin magmaliw ya asawam. Akatulong itan pian agak nababaingan ya itongtong itan ed sikara. Diad tua, labay kon ipaamtad sikara no wala lay inarok, imbes ya isekretok.”

8, 9. (a) Antoy maabig ya resulta no ondengel kayo ni tan ag-onsasalet no mansasalitay anak yo? (b) Anto ray positibon epekto na idengel yod ananak yo?

⁸ Singa ed samay imbaga nen Kayla, nipalikna yon mainomay kayon asinggeran no maanos kayon ondengel ed ananak yo. (Basaen so Santiago 1:19.) Oniay imbaga na mansusulon ateng ya si Katia: “Nensaman, anggapoy anos kon ondengel ed anako. Agko la pasumpaley ibabaga to. Nayarin lapud naknaksawan ak la odino agko labay so paisturbo. Natan ya inuman koy ugalik, anguman met so anako. Mas maunor la natan.”

⁹ Ontan met so naeksperiensya na ama ya si Ronald ed tinedyer ya marikit to. “Nen imbaga tod siak ya in-love kunod kaeskuela to, mamapasnok ak ya maong,” so inkuan to. “Balet nen dinalepdep koy anos tan inkamakatunongan nen Jehova ed saray lingkor to, inisip ko ya mas maabig no ikdan koy pankanawnawa may anako ya ibalikas so nalilikna to antis kon simbawaen. Maong labat ta onmay ginawak! Diman ko labat atalosay liknaan to. Kayari ton nansalita, mas maaro lay impitongtong kod sikato. Abigla ak ta mabulos ton inawat so simbawak. Imbaga tod siak ya umanen toy kanonotan to.” No mabetbet kayon mantotongtong na saray anak yo, mas naamtaan yoy iisipen tan nalilikna da. Bilang resulta, mas natulongan yo ran manggawa na duga iran desisyon ed bilay da.a

PAKANEN IRAY ANAK YO

10, 11. Panon yon natulongan iray anak yo pian ag-ira makaarawid katuaan?

¹⁰ Amta na maong a pastol ya say sakey a karnero et posiblin makaarawi ed pulok. Nayarin makanengneng na mabunan dika ya medyo arawid pulok, ya anggad makaarawi la tan nisian lad sikara. Ontan met iray anak. Nayarin kalkalna iran makaarawi ed katuaan lapud nasagyat ira na saray mauges ya kaulop odino makapuy ya panagligliwaan. (Uli. 13:20) Panon yo ran natulongan pian ag-itan nagawad sikara?

¹¹ Diad pambabangat yod ananak yo, kiwas kayon tampol no walay naimano yon kakapuyan da. Tulongan yo ran napaaligwas iray maong ya kualidad da. (2 Ped. 1:5-8) Say sankaabigan ya panggawad satan et diad regular ya panagdayew na pamilya yo. Oniay inkuan na Oktubre 2008 ya Ministeryo Tayo ed Panarian: “Saray ulo na pamilya so papasesegen a manakbat ed responsabilidad da ed imaton nen Jehova pian seguroen a natutumbok so makabaliksan tan regular a programa parad pampamilyan panagaral na Biblia.” Kasin uusaren yo iyan maaron uksoyan pian pastolan iray ananak yo? Ilaloan yon naapresya dan maong no iyuuna yoy espiritual a pankaukolan da.​—Mat. 5:3; Fil. 1:10.

12. (a) Panon ya agunggonaan iray kalangweran ed regular ya panagdayew na pamilya ra? (Ipila so kahon ya “Apresyaen Da Itan.”) (b) Panon kan agunggonaan ed panagdayew na pamilya yo?

¹² Imanoey imbaga na tinedyer a si Carissa no panon ya agunggonaan ed Panagdayew na Pamilya da. “Labalabay ko itan ta saniiba kami tan makapantotongtong kami. Legan min gagawaen iya, oneelet so ulopan mi tan wala ray balibalin gagawaen mi ya agmin balot nalingwanan. Seseguroen nen Dad ya regular so Panagdayew na Pamilya mi. Makapaseseg ya nanengneng ya seseryosoen da itan, kanian seseryosoen ko met. Lapud satan et mas arespetok ira bilang tatay ko tan ulok ed espiritual.” Oniay inkomento na 23 años ya si Brittney: “Lalo ak ya inmapit ed saray atateng ko lapud panagdayew na pamilya mi. Aliknak ya labay dan naamtaan iray problemak tan sankanonot day pankaabigan ko. Akatulong itan pian onelet tan mankakasakey so pamilya mi.” On, say pamakan yod saray anak yo ed espiritual​—lalo lad panagdayew na pamilya yo—​so manunan paraan pian magmaliw kayon maong a pastol.b

IGIYA IRAY ANAK YO

13. Panon a napakiwas so anak yon manlingkor ed si Jehova?

¹³ Manguusar na baston so maong a pastol pian igiya tan protektaan so pulok to. Say manunan gagala to et igiya irad “maong a pankabkaban.” (Eze. 34:13, 14) Bilang ateng, agta ontan met so gagala yo? Labay yon igiya iray anak yon manlingkor ed si Jehova. Labay yon nalikna da iyan insulat na salmista: ‘Maliket ak a mangunor ed linawam, O Dios ko, on, say ganggan mo walad dalem na pusok.’ (Sal. 40:8) No ontan so kaaralem na apresasyon na saray kalangweran, napakiwas iran idedikay bilay dad si Jehova tan manpabautismo. Siempre, gawaen da itan no natatalosan da lay kabaliksan na satan ya desisyon tan labay dan talagay manlingkor ed si Jehova.

14, 15. (a) Antoy nepeg ya gagala na saray Kristianon atateng? (b) Anto ray posiblin rason no akin ya panduaruwaan na saray kalangweran so dugan panagdayew?

¹⁴ Panon to balet no singa ag-onaaligwas ed espiritual iray ananak yo​—ompan panduaruwaan da ni ingey papanisiaan yo? Gawa yoy anggaay nayarian yon ibangat iran aroey Jehova a Dios tan apresyaey amin ya ginawa to. (Apo. 4:11) Insan no nasabi panaon ya akaparaan la ra, sikaran mismoy mandesisyon ya mandayew ed Dios.

¹⁵ Balet, panon to no panduaruwaan na ananak yo so katuaan ya ibabangat yod sikara? Panon yo ran napastolan tan ipamoriad sikara a say panlingkor ed si Jehova so sankaabigan ya desisyon ed bilay tan mangiter na andi-anggaan ya liket? Amtaen no akin ya manduaruwa ira. Singa bilang, talaga kasin agda panisiaan iray bangat na Biblia odino anggapo labat so talek dan idepensa itan ed saray kakaaro da? Talaga kasin panduaruwaan na ananak yo ya parad pankaabigan da iray estandarte na Dios odino maermen labat ira ta anggapoy malabay ya mikaaro ed sikara?

16, 17. Panon ya natulongan na atateng iray ananak da pian awaten tan ipapuso day katuaan?

¹⁶ Antokaman so rason, tulongan yoy anak yon natalosan no anton talagay sengegan na panduaruwa to. Panon? Say sakey ya praktikal tan epektibon paraan ya asali la na dakel ya atateng et say pantepet ed ananak da: “Parad sika, mainomay o mairap so magmaliw a Kristiano? Anto ra kasi pankaabigan to? Anto ray sakripisyo? Kasin mas dakel iray sakripisyo no ikomparad saray bendisyon ya naawat tayo natan tan diad arapen? Akin ey?” Siempre, itepet yo iratan diad sarilin salita yo tan diad paraan ya maaro, tan nalikna dan iyaansakit yo ra, aliwan singa maniimbestiga. Legan na satan, sarag yon pantongtongan so Marcos 10:29, 30. Wala ray kalangweran ya nanggawa na duaran listaan​—say sakey et no anto ray sakripisyo na saray Kristiano tan say sakey et no anto ray bendisyon. Nayarin makatulong iyan listaan ed sikayo pian nanengneng no anton talagay problema tan no anto ray marakep ya solusyon. No diad saray interesado et iyaaral tayoy libron Ibabangat na Biblia tan “Panangaro na Dios,” di mas lalod saray ananak tayo! Kasin gagawaen yo itan?

¹⁷ Nasabi panaon, kaukolan ya mandesisyon iray ananak yo no siopay labay dan panlingkoran. Agyo isipen ya automatiko dan aligey desisyon yo. Kaukolan dan personal ya awaten tan ipapuso so katuaan. (Uli. 3:1, 2) No naiirapan so anak yo ya gawaen itan, maabig no pawilen yo ray manunan bangat na Biblia. Tulongan yon mankatunongan tan paseseg yon tepetan toy sarili to: “Akin et manisia ak ya walay Dios? Anto ray akakombinsid siak ya inaro ak nen Jehova? Akin et manisia ak ya parad pankaabigan ko iray estandarte nen Jehova?” Atateng, ipanengneng yon maong kayon pastol diad maanos ya pangigiyad ananak yo pian napaneknekan dan say panlingkor ed si Jehova so sankaabigan ya bilay.c​—Roma 12:2.

18. Panon ya naalig na saray atateng si Jehova, say Sankatagyan a Pastol?

¹⁸ Labay na amin ya tuan Kristiano ya aligey Sankatagyan a Pastol. (Efe. 5:1; 1 Ped. 2:25) Lalo lad saray atateng. Kaukolan dan kabaten a maong so pulok da​—saray mabmablin ananak da​—tan gawaey anggaay nayarian dan igiya ira ed saray bendisyon ya imparaan nen Jehova parad sikara. Kanian pansagpotan yon pastolan iray ananak yo tan itultuloy yo ran pabalegen ed dalan na katuaan!