Saray Agko Nalingwanan Diad Panlilingkor Ko Parad Panarian

DUAY taon antis na satan ya agawa, siak tan say partner kon misionero ya si Evelyn Trabert et nan-graduate ed komapat ya klase na Watchtower Bible School of Gilead, ya nensaman et diad asingger ed Ithaca, New York. Niasain kamid Santa Ana. Balet antis kon ituloy so antikey ya istorya na ngalngali 29 taon ya impanmisionerok, istoryaen ko ni no akin ya nandesisyon ak ya manmisionero.

SAY ESPIRITUAL YA TAWIR KO

Saray atateng kon si John tan Eva Olson et manaayam ed Spokane, Washington, U.S.A., nen 1923, say taon na inkianak ko. Membro ira na Lutheran Church balet ta agda naawat so bangat ya impiernon apoy, ta ag-itan mitunosan ed papanisiaan da ya say Dios et aro. (1 Juan 4:8) Mantratrabahod bakery si tatay, tan aminsan et imbagad sikato na katrabaho to ya ag-ibabangat na Biblia a say impierno et lugar na panamairapan. Ag-abayag, nampaiyaral na Biblia iray atateng ko ed saray Tasi nen Jehova tan naaralan da no anton talaga so ibabangat na Biblia ya nagawa no say sakey et ompatey.

Siam taon ko ni labat ed saman balet natandaan ko ni ya madengedengel ak ed maligligsan pangiistorya dad saray balon nanaaralan dad Biblia. Lalo la nen naamtaan dan say ngaran na tuan Dios et Jehova, tan atalosan dan palso so doktrinan Trinidad. Singa ak espongha ya angesep ed sarayan balibalin bangat na Biblia legan kon nanaaralan so ‘katuaan ya mangibulos’ ed sakey a too. (Juan 8:32) Kanian agkon balot alikna ya makapangiras so panaral na Biblia, noagta lanang kon nai-enjoy so pangusisad Salita na Dios. Anggano mabaing ak, mimila ak ed saray atateng ko no manpulong ira. Abautismoan ira nen 1934. Nen 1939, nen 16 ko la, nampabautismo ak met bilang lingkor nen Jehova.

Nen Hulyo 1940, inlako na atateng ko so abung mi, tan nampayunir kamin talo diad Coeur d’Alene, Idaho. Nanrenta kami na apartment ya diad leksab to et walay talyer. Say apartment mi et uusaren met ed saray aral. Diad saman et pigpigara ni kongregasyon ya walaay Kingdom Hall kanian diad abung o nirentaan iran kuarto so panaaralan.

Nen 1941, akiasemblea kamid St. Louis, Missouri. Say Simba et “Children’s Day,” kanian akayurong ed arap iray manedad na 5 anggad 18. Diad bandad sampot na paliwawa nen Brother Joseph F. Rutherford, oniay imbaga tod sikami ran kalangweran: “Amin yo ran . . . ananak . . . ya nandesisyon ya unoren so Dios tan say Ari, ipangasi yoy onalagey!” Inmalagey kamin amin. Insan mapuersan imbaga nen Brother Rutherford: “Nengneng yo, masulok ya 15,000 a balon tasi parad Panarian!” Akatulong iman pian mas desidido ak ya manpayunir legay bilay ko.

SAY ASAINMIN NA PAMILYA MI

Pigaran bulan kayari na satan ya asemblea ed St. Louis, inmalis kamid southern California. Say asainmin na pamilya mi et mamormay kongregasyon ed syudad na Oxnard. Say ayaman mi et melag ya trailer ya saksakey so dukolan. Say “dukolan” ko et diad tapew na lamisaan—aliwa lan singa dati ya walay sarilin kuartok!

Antis kamin sinmabid California, inataki na Japan so Pearl Harbor ed Hawaii nen Disyembre 7, 1941. Diad tinmumbok ya agew, akibabali so United States ed Sankamundoan a Guerra II. Ingganggan na gobierno so blackout, kanian kaukolan min erepen so amin ya silew no labi. Manroronda ed dayat na California iray submarino na Japan, et no akaerep so amin ya silew, agda natira so target da.

Kalabas na pigaran bulan, nen Setyembre 1942, inmatendi kamid New World Theocratic Assembly ed Cleveland, Ohio. Madengedengel kamid paliwawa nen Brother Nathan H. Knorr ya “Peace—Can It Last?” Impalinew toy Apocalipsis kapitulo 17, ya ditan et nabasa so nipaakar ed “atap ya ayep” ya “wala nensaman, balet anggapo la, ingen ta magano lan ompaway manlapud kaaralman.” (Apo. 17:8, 11) Impaliwawa nen Brother Knorr ya say “atap ya ayep” et say League of Nations ya angangga so kimey to nen 1939. Impropesiya na Biblia ya walay onsalat ed satan tan temporaryon niwala so kareenan. Agawa itan nen 1945 nen anampot so Sankamundoan a Guerra II tan pinmawil so “ayep” bilang United Nations. Diad satan et pinalaknab na Saray Tasi nen Jehova so pampupulong da diad interon mundo, tan manlapu lad saman et agaylay indakel tayo!

Satan ya propesiya so akatulong ed siak ya nanengneng so nagawad arapen. Nen inyanunsio ya onggapo lay Gilead School diad ontumbok ya taon, diman ko alikna ya labay koy man-misionero. Nen 1943, niasain ak ya manpayunir ed Portland, Oregon. Diad saman ya panaon, manguusar kami na phonograph pian iparengel iray sermon ed saray householder diad puertay abung da, insan kami mangiyopresi literaturad Biblia nipaakar ed Panarian na Dios. Diad loob na sakey taon, sankanonot kon lanang so panlingkor ya misionero.

Nen 1944, agaylay liket ko ta akaawat ak na imbitasyon ya manaral ed Gilead kaibay kaarok ya si Evelyn Trabert. Limay bulan kamin imbangat na saray instruktor mi no panon ya magmaliw a maliket ed panaral na Biblia. Panbiliban mi inkamapaabeba da. No maminsan et sikara so waiter no mamangan kami. Nan-graduate kami nen Enero 22, 1945.

SAY ASAINMIN KO BILANG MISIONERO

Kaibak si Evelyn, tan sanasawan Leo tan Ester Mahan ya sinmabid asainmin mi ed El Salvador nen Hunyo 1946. Anengneng mi ya say uma et ‘amputi la parad panag-ani.’ (Juan 4:35) Nanengneng ed samay inistoryak ed gapo ya talagan mansyodot iray papari. Manga sakey simba antis na saman, agaway sankaunaan ya sirkiton asemblea mi ed Santa Ana. Inkampanya mi imay publikon paliwawa tan malikeliket kami ta ngalngali 500 so inmatendi. Imbes ya nataktakot kami, lalon determinado kamin ag-onalis tan tulongan iray matuan impanpuson totoo. Anggano sinebelan na papari iray membro da ya manbasay Biblia tan daiset labat so makasaliw na Biblia, dakel so narasan ed katuaan. Apresyaen day pansasagpot min manaral na Spanish pian nibangat mi ra nipaakar ed tuan Dios ya si Jehova, tan say mablin sipan to ya ipawil so Paraison dalin.

Say sakey ed saray sankaunaan ya inyaralan koy Biblia et si Rosa Ascencio. Kagapo to ni ya manaaral, akisian ed lakin kaamong to. Balet nanaral met na Biblia imay laki. Nankasal ira, insan ira abautismoan, tan nagmaliw iran maseseg ya Tasi nen Jehova. Si Rosa so sankaunaan ya payunir ed Santa Ana.b

Walay garita nen Rosa. No onlan manpulong, ikapot toy garita to lapud matalek ya itarya nen Jehova so pankaukolan to. No kasempet to tan lukasan to lamet so garita to, mansasbi ray mangaliw. Talagan apaneknekan to imay kuan na Mateo 6:33 tan nanmatoor anggad impatey to.

Aminsan et binisita na pari imay lakin akanggawa ed abung ya rerentaan min anemiran misionero tan tinaktakot to ya no agto kami paalisen, ekalen da ra nen asawa to ya membro na simbaan. Balet dati lan agnagugustoan na sayan kabkabat ya negosyante iray kagagawa na saray papari kanian agnampaimpluensya. Imbaga to ni ingen ed samay pari ya ayos labat anggano naekal irad simbaan. Impaseguro tod sikami ya sarag mi manayam diman anggad labay mi.

NAGMALIW YA TASI SO SAKEY YA RERESPETOEN A TOO

Diad capital city ya San Salvador, walay biin misionero ya mangiyaaral na Biblia ed asawa na enhinyeron si Baltasar Perla. Sayan maomaong a laki et nakal so pananisia tod Dios ta naoobserbaan toy pansimpisimpitan na saray lider na relihyon. Nen asabi panaon ya ipaalagey so branch office, anggano aliwa nin Tasi si Baltasar et inyopresi ton sikatoy mandesinyo tan mangipaalagey ed satan, ya libre serbisyo to.

Kayari ton akalimog iray Tasi legan na proyekto, akombinse si Baltasar ya aromog to lay tuan relihyon. Sikatoy abautismoan nen Hulyo 22, 1955, tan ag-abayag et tinmumbok met so asawa ton si Paulina. Say duaran anak da et matoor ya manlilingkor ed si Jehova. Say anak ton si Baltasar, Jr. et 49 taon lan manlilingkor ed Brooklyn Bethel, ya ditan et susuportaan toy onlalaknab ya panagpulong ed interon mundo tan manlilingkor bilang membro na United States Branch Committee.c

Nen asabi panon ya diad San Salvador la ray kombension mi, tinmulong si Brother Perla pian naabuloyan kamin usaren so baleg ya gym. Nen unaan, melag labat ya seksion so nauusar mi; balet lapud bendisyon nen Aman Jehova, tinaon kamin ondarakel ya anggad napno lay gym tan agkami la onduga! Diad saraman ya maliket ya okasyon, napipinengnengan ko iramay inyaralan koy Biblia. Agaylay liket ko no ikabat da ak ed saray “apok”—saray balon bautismado ya inyaralan da!

Diad sakey ya asemblea, inasinggeran ak na sakey ya brother tan imbaga ton walay labay ton ipatua. Agko abidbir kanian mankelaw ak no anto tay ipatua to. Inkuan to: “Sakey ak ed saramay ugugaw ya anupak ed sikayo diad Santa Ana.” Natan et kaibak lan manlilingkor ed si Jehova! Agaylay liket na pusok. Lapud satan et lalok ya apaneknekan a say panlingkor ya full-time so sankaliketan ya gawaen ed bilay.

AGKO PAGBABAWIAN IRAY DESISYON KO

Ngalngali 29 taon ya misionero ak ed El Salvador, unona et diad Santa Ana, insan diad Sonsonate, diad Santa Tecla, tan say sampot et diad San Salvador. Nen 1975, kayari na dakel ya pikakasi, nandesisyon ak ya ontundan misionero tan onsempet ed Spokane. Kaukolan na saray matoor tan maedad lan atateng ko so panangasikasok.

Nen inatey si Tatay nen 1979, inasikasok si Nanay ya kalkalnan kinmapuy anggad agda la sarag ya asikasoey sarili da. Waloy taon ni ran nambilay ya anggad impatey da nen 94 años da. Diad saraman ya mairap a panaon, kinmapuy so laman tan emosyon ko. Kanian nansakit ak na tatawagen ya shingles. Balet panamegley na pikakasi tan maaron panangasikaso nen Jehova, naanosan ko iratan ya subok. Singa ibabaga ed siak nen Jehova ya ‘anggad magmaliw lan ubanan so ulom, awiten tan tulongan tan iliktar ta ka.’—Isa. 46:4, NW.

Nen 1990, inmalis ak ed Omak, Washington. Diman ko lamet alikna ya makatulong ak ed teritoryan mansasalitay Spanish, tan pigarad saray inyaralan ko so abautismoan. Kasabi Nobyembre 2007, agko la naasikasoy abung kod Omak kanian inmalis ak ed apartment diad asingger ya baley na Chelan, Washington. Manlapud saman, aasikasoen ak ya maong na Spanish congregation dia, tan agaylay pisasalamat kod satan. Lapud siak labat so maedad ya Tasi dia, impasen ak na saray agagi ya “bai” ra.

Anggano nandesisyon ak ya agmiasawa tan manpamilya pian mas makapanpokus ak ed ministeryo “ya anggapoy makasbel,” dakel so espiritual ya ananak ko. (1 Cor. 7:34, 35) Parad siak, diad sayan bilay et agmo naalan amin so labay mo. Kanian inyunak so mas importante—say dedikasyon kon lingkoran si Jehova diad interon pusok. Diad balon mundo, dakel so panaon tayo parad amin ya makapaliket ya gawaen ed bilay. Say paboritok ya teksto et Salmo 145:16 ya mangipapaseguron ‘peneken nen Jehova so pilalek na amin a mabilay.’

Natan et 91 años ko la, tan medyo mabiskeg ak met ni kanian itutuloy koy pampapayunir ko. Baleg so nitutulong na pampapayunir ko pian mansiansian maligsa so pusok tan walaan na gagala so bilay ko. Nen kakkasabik ed El Salvador, onggagapo ni labat so panagpulong a kimey. Anggano agmanunday isusumpa nen Satanas, wala la natay masulok ya 39,000 ya publisher ed satan a bansa. Talagan apabiskeg na satan so pananisiak. On, mapatpatnag ya say masanton espiritu nen Jehova so onsusuportad pansasagpot na saray lingkor to!