No Akin ya Nepeg Tayon Magmaliw a Masanto

1. Panon itayon natulongan na libron Levitico?

DIAD amin ya librod Biblia, say Levitico so sankarakelan ya pakabasaan na nipaakar ed inkamasanto. Sayan kualidad et nepeg ya ipanengneng na amin ya mandadayew ed si Jehova. Nepeg tayo sirin ya talosan tan apresyaen so Levitico ta ontulong itan pian magmaliw tayon masanto.

2. Anto ray pigaran makapainteres ed Levitico?

² Say libro na Levitico ya insulat nen Moises et kabiangan na “interon Kasulatan” ya mausa-usar ed panagbangat. (2 Tim. 3:16) Diad kada kapitulo na satan a libro et manga samploran beses ya nabasa so ngaran nen Jehova. No natalosan tayo so Levitico, napaseseg itayon paliisan so antokaman ya mangiter na pakabalawan ed ngaran na Dios. (Lev. 22:32) Ditan et mabetbet ya nabasa iray salitan “Siak si Jehova” ya mangipanonot ed sikatayon nepeg tayon unoren so Dios. Diad sayan artikulo tan ed onsublay, aralen tayo ray mabmablin katuaan ed Levitico. Regalo itan na Dios ya ontulong pian mansiansia itayod masanton panagdayew.

KAUKOLAN SO INKAMASANTO

3, 4. Antoy irerepresenta na impanguras ed si Aaron tan ed saray ananak to? (Nengnengen so litratod gapo na artikulo.)

³ Basaen so Levitico 8:5, 6. Pinili nen Jehova si Aaron ya manlingkor bilang atagey ya saserdote na Israel, tan saray ananak to et manlingkor bilang saserdote. Irerepresenta nen Aaron si Jesu-Kristo tan irerepresenta na saray ananak to iray alanaan ya papatumbok nen Jesus. Kasin samay impanguras ed si Aaron et irerepresenta toy panlinis ed si Jesus? Andi, ta anggapoy kasalanan nen Jesus tan “ag-arutakan,” kanian agto kaukolay nalinisan. (Heb. 7:26; 9:14) Balet ontutukoy imay impanguras ed si Aaron ed malinis tan matunong ya kipapasen nen Jesus. Anto sirin so irerepresenta na impanguras ed saramay ananak nen Aaron?

⁴ Say impanguras ed saramay ananak nen Aaron et mangirerepresentad panlinis ed saray apilin magmaliw ya saserdote diad tawen. Kasin say tutukoyen na satan et say impanpabautismo na saray alanaan? Andi, ta ag-ekalen na bautismo so kasalanan. Isisimbolo na bautismo so impangidedika na sakey ya too ed interon bilay to ed si Jehova. Say impanlinis ed saray alanaan et panamegley na “salita na Dios,” tan kaukolan ya interon puso dan iyaplika so amin ya bangat nen Kristo ed bilay da. (Efe. 5:25-27) Diad ontan et masanto tan malinis ira. Say ‘arum a karnero’ balet ey?​—Juan 10:16.

5. Akin ya nibagan say arum a karnero et alinisan panamegley na Salita na Dios?

⁵ Ag-irerepresenta na saray ananak nen Aaron so “baleg ya ulop” na arum a karnero nen Jesus. (Apo. 7:9) Balet kasin nibagan sarayan bautismadon indibidual et apasanto tan alinisan met panamegley na Salita na Dios? On! Nen abasa da ed Biblia so kaimportantian tan kakanaan na dala nen Jesus, anisia rad satan tan ‘manlilingkor irad Dios ed agew tan labi.’ (Apo. 7:13-15) Lapud tuloytuloy ya panlilinis ed saray alanaan tan ed arum a karnero, ‘napansiasiansia ray maabig ya ugali ra.’ (1 Ped. 2:12) Seguradon naliliketan si Jehova diad pakakanengneng tod inkalinis tan pankakasakey na saray alanaan tan arum a karnero, ya ondedengel tan matoor ya ontutumbok ed Pastol dan si Jesus!

6. Anton panangusisa so makagunggona?

⁶ Say ganggan nen Jehova ya nepeg ya malinis iray saserdote ed Israel nensaman et walaan na kabaliksan ed saray lingkor to natan. Naiimano na saray iyaaralan tayoy Biblia ya malinis iray lugar ya pantitiponan tayo, tan talagan malinis tan masimpit so panangawes tayo. Anggaman ontan, say inkalinis na saray saserdote nensaman so mangipanonot ed sikatayo ya siopaman a labay ton dayewen si Jehova et nepeg ya walaan na “maralus [“malinis,” NW] a puso.” (Basaen so Salmo 24:3, 4; Isa. 2:2, 3.) Legan tayon manlilingkor ed Dios, nepeg ya aliwan say laman tayo labat so malinis noagta pati kanonotan tan puso tayo. Kaukolan sirin ya usisaen tayon lanang so sarili tayo, ya ompan wala ray kaukolan tayon umanen pian magmaliw tayon masanto. (2 Cor. 13:5) Singa bilang, no say sakey ya bautismado et gagagalaen toy onnengneng ed pornograpiya, nepeg ton tepetay sarili to, ‘Kasin nipapanengneng kon masanto ak?’ Insan kaukolan toy onkerew na tulong pian nitunda to itan ya mauges ya bisyo.​—Sant. 5:14.

IPANENGNENG MON MASANTO KA DIAD KATUTULOK MO

7. Anton alimbawa so impanengneng nen Jesus ya miparad saray saserdote, singa nabasad Levitico 8:22-24?

⁷ Nen inggapo so inkasaserdote ed Israel, say dala na kalakian ya karnero et inyan ed kawanan ya layag, tangan na kawanan ya lima, tan tangan na kawanan ya sali na Atagey a Saserdoten si Aaron tan ananak to. (Basaen so Levitico 8:22-24.) Ipapanengneng na satan ya saray saserdote et magmaliw ya matulok tan gawaen day anggaay nayarian dan sumpaley kimey da. Mipadpara, impanengneng na Atagey ya Saserdoten si Jesus so perpekton alimbawa parad saray alanaan tan arum a karnero. Say layag to et dinmengel ed panangigiya na Dios. Saray lima to et inusar tod panggawa na linawa nen Jehova, tan saray sali to et agbalot pinmaliis ed dalan na inkamasanto.​—Juan 4:31-34.

8. Antoy nepeg ya gawaen na amin ya mandadayew ed si Jehova?

⁸ Nepeg ya aligen na saray alanaan ya Kristiano tan arum a karnero so katooran na Atagey a Saserdote da. Amin ya mandadayew ed si Jehova et kaukolan ya ontulok ed saray ganggan ya walad Biblia pian agda napaermen so masanton espiritu. (Efe. 4:30) Nepeg dan ‘pansiansiaen ya maptek so dadalanen na saray sali ra.’​—Heb. 12:13.

9. Antoy imbaga na taloran brother ya akatrabaho na saray membro na Mananguley ya Ulop, tan panon kan natulongan na imbaga ra pian nitultuloy mon nipanengneng ya masanto ka?

⁹ Nengnengen so impapuson imbaga na taloran brother ya say ilalo ra et manbilay ed dalin tan pigaran dekada ran akatrabaho iray membro na Mananguley ya Ulop. Oniay inkomento na sakey ed sikara: “Tua, nikadkaduman pribilehyo so maapit ya pikimey ed sikara, balet lapud satan et wala ray panaon ya nanengneng mon agmet ira perpekto anggano alanaan ira. Anggaman ontan, sakey ed saray determinasyon ko diad inlalabas na taon et say itulok ed saray mangidadaulo.” Oniay imbaga na komaduan brother: “Saray teksto ya singa say 2 Corinto 10:5 nipaakar ed ‘katutulok ed Kristo’ so tinmulong ed siak ya magmaliw ya matulok tan mitulongan ed saray mangidadaulo. Nanlapud puso so katutulok ko.” Oniay inkuan na komatlon brother: “No talagan inarom so aaroen nen Jehova tan kabusol mo ray bubusolen to, tan no labay mon kerewen ya lanang so panangigiya to tan gawaey makapaliket ed sikato, nepeg ya matulok kad organisasyon to tan ed saray uusaren to pian nasumpal so gagala tod dalin.” Naamtaan na sayan brother ya si Nathan Knorr, ya nagmaliw ya membro na Mananguley ya Ulop et mabulos ya angawat ed saray punton walad 1925 ya Watch Tower ed artikulon “Birth of the Nation” anggano kinuestion itan na arum. Pandinayewan na brother so katutulok nen Brother Knorr. No dalepdepen mo so imbaga na sarayan taloran brother, natulongan kan magmaliw ya matulok pian nipanengneng mon masanto ka.

SIGPOT YA KATUTULOK ED GANGGAN NA DIOS ED DALA

10. Panon kaimportante so pangunor tayod ganggan na Dios ed dala?

¹⁰ Basaen so Levitico 17:10. Ingganggan nen Jehova iray Israelita ya ag-ira mamangan na ‘anggan anton nengneng [o klase] na dala.’ Ingganggan met ed saray Kristiano ya arawian day dala na ayep o too. (Gawa 15:28, 29) Agtayo labay ya ‘onsumpa so Dios ed sikatayo’ tan ekalen to itayod kongregasyon to. Inaro tayo so Dios tan labay tayon tuloken. Anggano napepeligro ni bilay tayo, determinado itayon manmatoor anggano mikasi ni o piliten itayo na saray totoon agda kabat si Jehova tan agmalabay ya ontulok ed sikato. On, amta tayon balawen itayo na arum lapud iyaarawi tayod dala, balet mas pilien tayoy ontulok ed Dios. (Jud. 17, 18) Antoy makatulong pian determinado tayon agmangan na dala o agmanpa-blood transfusion?​—Deu. 12:23.

11. Akin ya nibaga tayon say tinaon ya Agew na Pananakbong et aliwa labat ya ritual?

¹¹ Pian natalosan tayoy panmoria na Dios ed dala, amtaen tayo no panon ya uusaren na atagey a saserdote ed Israel nensaman so dala na ayep diad tinaon ya Agew na Pananakbong. Wala labat so espisyal ya usar na dala. Sakbongan na satan iray kasalanan na totoon onkekerew na panamerdona nen Jehova. Say dala na kalakian a baka tan kanding et iwalsik na atagey a saserdote ed sakob na kaban na sipanan tan ed arap na sakob. (Lev. 16:14, 15, 19) Satan so paraan pian perdonaen nen Jehova so kasalanan na saray Israelita. Sakey ni, ingganggan nen Jehova ya no say too et mamakger na ayep pian kanen to, kaukolan ton iyibung so dala na satan tan tabonan toy dabok, “ta say bilay na amin a laman [et] say dala to.” (Lev. 17:11-14) Kasin ritual labat iratan ya anggapoy kaimportantian to? Andi. Say usar na dala diad Agew na Pananakbong tan say ganggan ya iyibung so dala diad dalin et mikonektaan ed samay akauna lan ganggan nen Jehova ed si Noe tan saray ilalak to nipaakar ed dala. (Gen. 9:3-6) Insebel nen Jehova so pangan o pangusar na dala pian nasustuni so bilay. Antoy kabaliksan na satan ed saray Kristiano?

12. Panon ya impankonektaan nen Pablo so dala tan kaperdona diad samay sulat tod saray Hebreon Kristiano?

¹² Nen sinulatan nen apostol Pablo iray Hebreon Kristiano nipaakar ed pakayari na dala ya manlinis, impaliwawa to: “Diad Ganggan, amin lawarin bengatla et nalilinisan ed panamegley na dala, tan no anggapo so niibung a dala, agnaperdona iray kasalanan.” (Heb. 9:22) Indanet met nen Pablo ya anggano wala met so kana na saray ayayep ya imbagat nensaman, impanonot labat na saratan ed saray Israelita ya makasalanan ira tan wala ni mas kaukolan da pian talagan naandi kasalanan da. On, say Ganggan et ‘mangiyaanino ed saray maabig ya onsabi, balet aliwa nin satan so peteg ya bengatla.’ (Heb. 10:1-4) Panon ya nagmaliw ya posible so kaperdona na saray kasalanan?

13. Antoy naliliknam ed impangipresenta nen Jesus ed bili na dala to ed si Jehova?

¹³ Basaen so Efeso 1:7. Say masakripisyon impatey nen Jesu-Kristo nen ‘inter toy inkasikato parad sikatayo’ et makabaliksan ed amin ya mangaarod sikato tan ed Ama to. (Gal. 2:20) Anggaman ontan, samay ginawa nen Jesus kayari impatey tan inkioli to so talagan angibulos ed sikatayo, kanian posible lan naperdona iray kasalanan tayo. Ginawa nen Jesus imay gagawaen na atagey a saserdote diad Agew na Pananakbong. Diad satan ya agew, say dala na ayayep ya imbagat et awiten na atagey a saserdote ed Sankasantosan diad tabernakulo tan sinmabi panaon et diad templo nen Solomon. Ipresenta to itan diad arapan nen Jehova, ya singa no wadman ya mismo si Jehova. (Lev. 16:11-15) Singa ontan so ginawa nen Jesus sanen pinmawil ed tawen tan impresenta tod si Jehova so bili na dala to bilang too. (Heb. 9:6, 7, 11-14, 24-28) Agaylay pisalsalamat tayo ya naperdona la ray kasalanan tan nalinisan so konsiensia tayo lapud pananisia tayod dala nen Jesus!

14, 15. Akin ya importantin talosan tan unoren so ganggan nen Jehova nipaakar ed dala?

¹⁴ Kasin mas natatalosan mo la natan no akin ya ingganggan nen Jehova ya agtayo mangan na ‘anggan anton nengneng [o klase] na dala’? (Lev. 17:10) Kasin malinew lad sika no akin ya diad panmoria na Dios et sagrado so dala? On, diad pakanengneng na Dios, say dala et bilay. (Gen. 9:4) Parad sika, kasin nepeg ya ontan met so panmoria tayod dala tan unoren tayoy ganggan na Dios ya onarawid satan? Makapikareenan tayo labat ed Dios no walay pananisia tayod dondon bagat nen Jesus tan bidbiren tayo ya say dala et walaan na espisyal ya kabaliksan ed Amalsa.​—Col. 1:19, 20.

¹⁵ Anggan siopad sikatayo et ompan bigbiglan naproblema ed isyu nipaakar ed dala. Odino agtayo iilaloan ya walay kapamilya o kaaron kaukolan toy mandesisyon no kasin manpa-blood transfusion o andi. Diad ontan iran situasyon, kaukolan met so pandesisyon nipaakar ed saray blood fraction tan paraan na pampatambal. Kanian importantin maong ya man-research itayo tan manparaan la parad saray posiblin emergency. No ontan so gawaen tayo tekep na pikakasi, magmaliw ya malet so desisyon tayo tan agtayo mikompromiso. Agtayo labay ya napaermen so puso nen Jehova diad pangawat tayod bengatla ya isesebel na Salita to! Ibabaga na dakel a doktor tan arum nin onsusuportad blood transfusion ya mangidonasyon na dala iray totoo pian nisalbay bilay. Balet bibidbiren na saray masanton lingkor nen Jehova ya say Amalsa so walaay kanepegan ya mangibaga no panon so pangusar ed dala. Parad si Jehova, ‘anggan anton nengneng [o klase] na dala’ et sagrado. Nepeg sirin ya determinado tayon unoren so ganggan to ed dala. Panamegley na masanton ugali tayo, ipanengneng tayod sikato ya aapresyaen tayon maong so dala nen Jesus​—satan labat ya dala so basiyan na pakaperdonay kasalanan tayo tan makapangiter na andi-anggaan a bilay.​—Juan 3:16.

NO AKIN YA IILALOAN NEN JEHOVA YA MAGMALIW TAYON MASANTO

16. Akin ya nepeg a masanto iray lingkor nen Jehova?

¹⁶ Nen imbulos na Dios iray Israelita ed panangaripen na Ehipto, inkuan tod sikara: “Siak si Jehova ya angipaway ed sikayo ed dalin na Ehipto pian magmaliw ak a Dios yo, tan nepeg kayon magmaliw a masanto, lapud masanto ak.” (Lev. 11:45, NW) Masanto si Jehova, kanian iilaloan ton masanto iray Israelita. Lapud Tasi itayo nen Jehova, nepeg ya masanto tayo met. Malinlinew itan ed libro na Levitico.

17. Anto lay nibagam natan ed libro na Levitico?

¹⁷ Talagan agunggonaan itayo ed impanaral tayod pigaran bersikulo na Levitico. Seguradon lalom ya naapresya iyan pinuyanan a libro. Diad impandalepdep mod saray mabmablin impormasyon ed Levitico, mas atalosan mo no akin ya nepeg tayon magmaliw a masanto. Balet, anto ni arum ya espiritual ya kayamanan ya naromog tayo ed Levitico? Anto ni ray naaralan tayo ed satan a libro nipaakar ed masanton panaglingkor ed si Jehova? Aralen tayo iratan diad onsublay ya artikulo.