TEPETEPET NA SARAY MANBABASA

Panon ya tuturoen iray elder tan ministeryal a lingkor ed kada kongregasyon?

Nen inmunan siglo C.E., imbaga nen apostol Pablo ed saray mamatatken ed kongregasyon na Efeso: “Imano yoy inkasikayon dili tan say interon pulok, a lapud saraya et tinuro kayo na masanton espiritu bilang saray manangasikaso, pian pastolan yo so kongregasyon na Dios, a sinaliw to ed panamegley na dala na mismon Anak to.” (Gawa 20:28) Akin ya nibagan walay betang na masanton espiritu ed panuturo na saray elder tan ministeryal a lingkor natan?

Unona, pinakiwas na masanton espiritu iray angisulat ed Biblia pian irekord no anto ray kualipikasyon parad saray elder tan ministeryal a lingkor. Diad 1 Timoteo 3:1-7, nabasa so 16 ya nanduruman kualipikasyon parad sakey ya elder. Say arum et nabasad Tito 1:5-9 tan Santiago 3:17, 18. Saray kualipikasyon parad ministeryal a lingkor et nabasad 1 Timoteo 3:8-10, 12, 13. Komadua, espisipikon ipipikasi na saray mangirerekomenda tan manuturo ya igiya ira na espiritu nen Jehova legan dan rerepasoen no kasin kualipikado lay sakey a brother base ed Kasulatan. Komatlo, say brother ya irerekomenda et nepeg ton ipatnag so bunga na masanton espiritu na Dios ed bilay to. (Gal. 5:22, 23) Kanian talagan kaiba so espiritu na Dios ed interon proseso na panuro na saray elder tan ministeryal a lingkor.

Balet siopay aktual ya manuro ed saray brother? Dati, amin ya rekomendasyon et ipapawit nid branch office. Ditan et wala ray brother ya inyasain na Mananguley ya Ulop ya manrepaso ed sarayan rekomendasyon tan sikara so manuro. Insan sulatan na branch office so ulop na mamatatken. Saray elder so mangipaamtad brother ya sikatoy aturo lan elder o ministeryal a lingkor, tan tepetan da no kasin mabulos ton awaten itan ya pribilehyo tan no talaga kasin kualipikado. Kayari to, iyanunsio itan ed kongregasyon.

Nen inmunan siglo, no maminsan et saray apostol ya mismo so manuturo parad espisipiko iran responsabilidad, singa nen anuro iray pitoran lalaki ya mangasikasod inagew-agew ya pangibunog na naakan ed saray balo. (Gawa 6:1-6) Anggaman ontan, ag-ipapanengneng na sayan alimbawa ya sikara so manuturo na saray elder tan ministeryal a lingkor, ta saramay pitoran lalaki et nayarin manlilingkor la bilang mamatatken antis da nin inawat itan ya kaaruman ya asainmin. Panon sirin ya tuturoen iray elder tan ministeryal a lingkor nen inmunan siglo?

Anggano aliwan detalyado so Kasulatan nipaakar ed no panon ya tuturoen iray brother nensaman, anggan panon et walay ideya tayo. Nabasa tayon nen pasempet lay Pablo tan Bernabe ed inmunan impanbiahe da bilang misionero, “anuro ra na mamasiken diad kada kongregasyon, tan kayari ran nampikasi tan nanayunal, inmatalek da ra ed si Jehova ya anisiaan da.” (Gawa 14:23) Kalabas na pigaran taon, insulat nen Pablo ed kaiba ton ombiabiahe ya si Tito: “Intilak ta ka ed Creta, pian asikasoen mo iray bengatlan nepeg ya ipetek tan manuro ka na saray mamasiken ed kada syudad, unong ya ingganggan ko la ed sika.” (Tito 1:5) Si Timoteo ya abayag ya akaiba nen apostol Pablo et inikdan met na ontan ya autoridad. (1 Tim. 5:22) Malinew sirin ya saray ombiabiahen manangasikaso so anuro na saray brother, aliwan saray apostol tan mamatatken ed Jerusalem.

Pian naalig iyan ginawa ra nensaman, inuman na Mananguley ya Ulop na Saray Tasi nen Jehova so uksoyan no panon ya turoen iray elder tan ministeryal a lingkor. Manlapud Setyembre 1, 2014, onia lay proseso: Repasoen a maong na kada manangasikaso na sirkito so rekomendasyon na saray elder ed sirkito to. Diad ibisita tod saray kongregasyon, kabaten to iramay inrekomenda, ya no nayari et miulop ed sikara diad ministeryo. Mitongtong so manangasikaso na sirkito ed ulop na mamatatken nipaakar ed rekomendasyon da, insan kayari to et sikato so akanresponsabilidad ya manuro na saray elder tan ministeryal a lingkor ed saray kongregasyon ed sirkito to. Sayan uksoyan et mas miparad samay ginawa nen inmunan siglo.

Siopa ray kaibad sayan proseso? Siempre, say “matoor tan makabat ya aripen” so manunan akanresponsabilidad ya pakanen iray lingkor na sankaabungan. (Mat. 24:45-47) Diad tulong na masanton espiritu et uusisaen day Kasulatan pian makapangiter iray instruksion no panon ya praktikal ya niyaplika iray prinsipyod Biblia ya walay koneksion tod paraan na pangoorganisa ed kongregasyon ed interon mundo. Say matoor ya aripen met so manuturo na amin ya manangasikaso na sirkito tan membro na Branch Committee. Ontutulong so kada branch office pian naunor iray instruksion ya nanlapud Mananguley ya Ulop. Obligasyon na kada ulop na mamatatken ya repasoen a maong iray Makasulatan ya kualipikasyon na saray brother ya irerekomenda da. Seryoson responsabilidad na kada manangasikaso na sirkito ya aralen a maong tekep na pikakasi iray rekomendasyon na saray elder, insan sikato so manuro na saray kualipikadon brother.

No natatalosan tayo no panon ya tuturoen iray elder tan ministeryal a lingkor, mas naapresya tayo so betang na masanton espiritu ed satan ya proseso. Kanian mas ombaleg so talek tan respeto tayod saramay walaan na responsabilidad ed Kristianon kongregasyon.​—Heb. 13:7, 17.

Siopa ray duaran tasi ya abitlad Apocalipsis kapitulo 11?

Nabasad Apocalipsis 11:3 so nipaakar ed duaran tasi ya manpropesiya ed 1,260 ya agew. Insan ibabaga na salaysay ya sikaray “taloen tan pateyen” na atap ya ayep. Balet kayari “talora tan kapalduan agew,” sarayan duaran tasi et bilayen lamet, kanian mankelaw iray makanengneng.​—Apo. 11:7, 11.

Siopa irayan duaran tasi? Nanengneng tayod saray detalye na salaysay no siopa ra. Unona, nabasa tayon sikaray “isisimbolo na duaran kiew ya olibo tan duaran kandelero.” (Apo. 11:4) Nanonotan tayod satan imay kandelero tan duaran kiew na olibo ya adeskribe ed propesiya nen Zacarias. Nibagan saramay kiew na olibo et ontutukoy ed “duara a nilanaan,” si Gobernador Zerubabel tan Atagey a Saserdoten si Josue, ‘a manal-alagey ed abay na Katawan na amin a dalin.’ (Zac. 4:1-3, 14) Komadua, saramay duaran tasi et adeskribe ya manggagawa na saray tandan miparad saray ginawa nen Moises tan Elias.​—Ikompara so Apocalipsis 11:5, 6 ed Numeros 16:1-7, 28-35 tan 1 Arari 17:1; 18:41-45.

Antoy pampaparaan na sarayan salaysay ed Biblia? Tutukoyen da iray nilanaan na Dios ya angidaulo ed panaon na subok. Kanian bilang kasumpalan na Apocalipsis 11, saray alanaan ya agagin angidaulo ed panaon ya niletneg so Panarian na Dios ed tawen nen 1914 et nampulong ‘ya akasulong na sakon abel’ diad talora tan kapalduan taon.

Kayari na impanpulong da ya akasulong na sakon abel, sarayan alanaan et simbolikon pinatey nen sikaray impriso ya agano, diad simbolikon talora tan kapalduan agew. Diad pakanengneng na saray kalaban na totoo na Dios, inatey lay kimey da, kanian manliket iray kalaban.​—Apo. 11:8-10.

Balet, tinmua imay propesiya ta kayari na simbolikon talora tan kapalduan agew, binilay lamet so duaran tasi. Saray alanaan et nibulos ed prisoan, tan saramay nansiansian matoor et inikdan na Dios na espisyal ya pribilehyo panamegley na Katawan da, si Jesu-Kristo. Nen 1919, kaiba ira ed saramay aturon manlingkor bilang “matoor tan makabat ya aripen” ya mangasikasod espiritual ya pankaukolan na totoo na Dios legan na kaunoran iran agew.​—Mat. 24:45-47; Apo. 11:11, 12.

Makapainteres ya sarayan agawgawa et inkonekta na Apocalipsis 11:1, 2 ed panaon ya say espiritual a templo et nasukat odino nausisa. Nabasad Malaquias kapitulo 3 so miparan pan-inspeksion ed espiritual ya templo, ya tumbokay panaon na panaglinis. (Mal. 3:1-4) Panon kabayag iyan pan-inspeksion tan panlinis? Manlapud 1914 anggad bandad gapo na 1919. Kaibad satan imay 1,260 ya agew (42 bulan) tan simbolikon talora tan kapalduan agew ya abitlad Apocalipsis kapitulo 11.

Talagan maliket itayo ya inyuksoy nen Jehova so espiritual ya panaglinis pian saray totoo to et makapanggawa na saray maabig a gawa! (Tito 2:14) Tan aapresyaen tayon maong so alimbawa na matoor iran alanaan ya angidaulo ed panaon na subok tan sikara so nagmaliw ya simbolikon duaran tasi.a