Bebendisyonan nen Jehova Iramay “Mabulos so Puso Ra”

PINAGALANGAN itayo na Amalsa diad impangiter tod sikatayo na mabmablin regalo—sarag tayoy manggaway sarili tayon desisyon. Tan dakel ya bendisyon so iiter to ed saramay mabulos dan uusaren itan ya regalo parad dugan panagdayew tan ed saramay mansasagpot pian napasanto so ngaran to tan suportaan so gagala to. Aglabay nen Jehova ya onunor tayo labat lapud obligasyon tayo itan o napipilitan tayo. Say labay to et mabulos tayon mandayew ed sikato lapud inar-aro tayo tan papablien tayoy amin ya gagawaen to.

Singa bilang, nen walad kalawakan na Sinai iray Israelita, ingganggan ira nen Jehova ya manpaalagey na pasen ya pandayewan da. Inkuan to: ‘Mangala kayo na iyapay yod kinen Jehova; siopaman a mabulos so puso to, sikato komon et mangiyakar na iyapay ed si Jehova.’ (Exo. 35:5) Kada Israelita et makapangiter na sarag ton iter, tan kada boluntaryon apay—antokaman itan odino panon karakel—et nausar pian nasumpal so pagagawa nen Jehova. Antoy resulta ey?

Saray Israelitan ‘dinagdag na puso ra’ et boluntaryon angiter na kontribusyon, ya balang sakey et “mabulos so puso” to. Saray lalaki tan bibii et mabulos ya angawit na nausar ed panggaway tabernakulo: balitok ya sara, ikaw, singsing, balitok, pilak, gansa, asul a tinebey, kolor-ube ya abel, ambalbalangan tinebey, marakep a linen, bagoy kanding, katat na kalakian a karnero a kinoloran na ambalanga, katat na poka, kiew na acacia, ankablin bato, balsamo, tan larak. Say atipon ya kontribusyon et ‘masulok lan onkana ed kimey tan dakel a tuloy.’—Exo. 35:21-24, 27-29; 36:7.

Balet say talagan panliketan nen Jehova et aliwan saramay inter da, noagta say inkamabulos dan suportaan so dugan panagdayew. Apakiwas met iran usaren so panaon tan biskeg da. “Amin a marunong a bibii et nanlaga na tinebey diad panamegley na lima ra,” so kuan na salaysay. On, “amin a marunong a bibii a dinagdag na puso ra et nanlaga na bagoy kanding.” Ontan met, inikdan nen Jehova si Bezalel na “karunongan, pakatalos, tan kakabatan ed amin a klase na kimey.” Diad tua, inikdan na Dios si Bezalel tan Oholiab na abilidad ya gawaen so amin ya pagagawa tod sikara.—Exo. 35:25, 26, 30-35, NW.

Nen ingganggan nen Jehova iray Israelita ya mangiter na donasyon, sikatoy mataletalek ya “siopaman a mabulos so puso to” et onsuportad dugan panagdayew. Lapud satan, mabulos to met iran benendisyonan na panangigiya tan agnasabaan ya liket. Impanengneng sirin nen Jehova ya no bendisyonan toy inkamabulos na saray lingkor to, seguradoen ton ag-ira onkulang na anggan anton bengatla tan ikdan to ray abilidad pian nasumpal so linawa to. (Sal. 34:9) No iter moy anggaay nayarian mo ed si Jehova, seguradon bendisyonan to ka lapud inkamabulos mo.

NO PANON A MANGIITER NA KONTRIBUSYON SO ARUM PARAD SANKAMUNDOAN A KIMEY

Singa ed panaon nen apostol Pablo, dakel natan so ‘mangibibiig,’ odino mangibabadyet na kuarta tan ipepelag da itan ed contribution box ya amarkaan na “Worldwide Work.” (1 Cor. 16:2) Binulan ya ipapawit na kada kongregasyon so atugyop ya kontribusyon diad branch office a makansakop ed bansan kawalaan da. Sarag yo met ya direktan ipawit so donasyon yo diad korporasyon ya uusaren na Saray Tasi nen Jehova diad lugar yo. Pian naamtaan no antoy manunan korporasyon ya uusaren na Saray Tasi nen Jehova ed bansa yo, ipangasin kontaken so branch office ya makansakop ed bansan kawalaan yo. Saray address na branch office et naromog ed www.jw.org/pag. Niraya so klase na donasyon a sarag yon ipawit:

DIREKTAN PANGIDONASYON

Donasyon panamegley na electronic bank transfer, debit card, o credit card. Diad arum ya branch, posible met iya panamegley na jw.org odino arum nin apilin Web site.
Pandonasyon na kuarta, alahas, odino arum nin mablin kayarian. Mangilaktip na sulat a mangibabagan say kuarta odino kayarian et idodonasyon yo.

DONASYON A WALAAY KONDISYON

Pangidonasyon iya na kuarta a say kondisyon et naala itan na samay angidonasyon no kaukolan to.
Mangilaktip na sulat a mangibabagan say donasyon et walaan na kondisyon.

CHARITABLE PLANNING

Likud ed pangidonasyon na kuarta tan mabli iran kayarian, wala ni arum a paraan na panagdonasyon a makatulong ed kimey na Panarian ed interon mundo. Nabasa itan ed ontumbok iran parapo. Antokaman so paraan a labay yon usaren, ipangasin ontawag nin unona ed branch office ya akansakop ed lugar yo pian naamtaan no anto ran paraan na panagdonasyon so nayari ed bansa yo. Lapud nanduruma iray legal a totontonen ontan met ed babayaran a buis, importantin onkonsulta ed kualipikadon tax tan legal adviser antis a manpili na sankaabigan a paraan na pandonasyon.

Insurance: Sarag yon gawaen ya beneficiary na life insurance policy odino retirement/pension plan yo so korporasyon ya uusaren na Saray Tasi nen Jehova.

Saray Bank Account: Saray bank account, certificate of deposit, odino individual retirement account et nayarin imatalek odino ingaran ed korporasyon ya uusaren na Saray Tasi nen Jehova depende ed requirement na bangko yo.

Saray Stock tan Bond: Sarag iyan idonasyon ed korporasyon ya uusaren na Saray Tasi nen Jehova bilang regalo odino panamegley na dokumento ya mangibabagan iyalis itan ed ngaran na korporasyon no say sakey et naandi lad bilay.

Lote tan Abung: Say lote tan abung a nayarin ilako et sarag ya idonasyon ed korporasyon ya uusaren na Saray Tasi nen Jehova bilang regalo. No residential itan, nayarin manggaway kasulatan imay angidonasyon ya manayam ditan anggad mabilay ni.

Gift Annuity: Say kuarta odino saray stock tan bond et nayarin idonasyon ed korporasyon ya uusaren na Saray Tasi nen Jehova tan samay angidonasyon odino siopaman a pangipiyaan to et makaawat na espisipikon annuity payment kada taon legay bilay to. Say angidonasyon et makaalay income-tax deduction diad samay taon a niyareglo so gift annuity.

Saray Testamento tan Trust Fund: Saray kayarian odino kuarta so nayarin ipatawir ed korporasyon ya uusaren na Saray Tasi nen Jehova panamegley na legal a testamento, odino pangingaran ed satan a korporasyon bilang beneficiary na trust agreement. Lapud satan, nayarin nabawasan iray babayaran yon buis.

Ipapatnag na terminon “charitable planning” a kaukolan ya manplanon maong so mandonasyon no dinan ed saraya so pilien to. Pian natulongan iray malabay a mandonasyon ed sankamundoan a kimey na Saray Tasi nen Jehova panamegley na charitable planning, walay brosyur diad English tan Spanish ya Charitable Planning to Benefit Kingdom Service Worldwide. Sayan brosyur et im-publish pian mangiter na impormasyon ed nanduruman paraan na panagdonasyon, ya iter natan odino ipatawir sano ompatey imay akanggawa. Saray impormasyon a nabasad sayan brosyur et nayarin ag-onaplikad amin ya situasyon lapud ganggan ed panagbuis odino arum nin ganggan ed bansa yo. Kanian, kayari yon basaen iyan brosyur, nepeg ya onkonsulta ed saray legal odino tax adviser. Panamegley na sarayan paraan na panagdonasyon, dakel so onsusuportad sankamundoan a kimey tayo tan ed itutulong tayod saray mankaukolan. Makakaala met iray diskuento ed babayaran dan buis. No wala iyan brosyur ed bansa yo, sarag yoy onkerew na kopya ed sekretaryo na kongregasyon yo.

Parad kaaruman ya impormasyon, kontaken so branch office a makansakop ed bansan kawalaan yo.