EBAT ED SARAY TEPET ED BIBLIA
Posible kasin nawalaan tayoy saksakey a gobierno parad interon mundo?
Panon a napankasakey na saksakey a gobierno ed interon mundo iray totood amin ya bansa? Isaias 32:1, 17; 54:13
Isipen pa labat no panon a minabang ed saksakey a gobierno iray totood interon mundo. Dakel natan so maniirap, mayamyaman balet so arum. Balet seguroen na maong a gobierno parad interon mundo ya nitaryay amin ya kaukolan na totoo. Parad sika, makagawa kasi iray totoo na ontan ya gobierno?—Basaen so Jeremias 10:23.
Manlapu la nensaman, agnaaasikaso na saray gobierno iray sakop da, lalo la ray mairap bilay. Maruksa ni ingen so arum ya gobierno. (Eclesiastes 4:1; 8:9) Balet insipan na Makapanyarin-amin a Dios ya mangitaryay gobiernon onsalat ed amin ya gobierno natan. Say Manuley ed satan et talagan asikasoen to iray totoo.—Basaen so Isaias 11:4; Daniel 2:44.
Antoy nagawaan na Panarian na Dios?
Amili si Jehova na sankamaongan ya Manuley ed mundo—say Anak to, si Jesus. (Lucas 1:31-33) Nen wadiad dalin, labalabay nen Jesus ya tulongan iray totoo. Bilang Ari, pankasakeyen to ray totoo ed amin ya bansa tan ekalen toy amin ya paniirap da.—Basaen so Salmo 72:8, 12-14.
Kasin awaten na amin si Jesus bilang Manuley? Andi. Balet ta maan-anos si Jehova. (2 Pedro 3:9) Iikdan toy pankanawnawa iray totoo ya awaten si Jesus bilang Manuley. Magano lan ekalen nen Jesus iray mauges ed mundo tan gawaen ton mareen tan maligen so interon dalin.—Basaen so Miqueas 4:3, 4.