MANUNAN ARTIKULO | SIOPA IRAY TASI NEN JEHOVA?
Iner so Panlalapuan na Pundo Mi?
Kada taon, minilyon ya Biblia tan publikasyon ya base ed Biblia so iyiimprinta tan ibubunog mi. Diad interon mundo, manpapaalagey kami ray branch office tan wala ray imprintaan mi. Manguusar kami na simpli balet balibali ran lugar ya pandadayewan, ya say tawag et Kingdom Hall. Balet, iner so panlalapuan na pundo mid saratan?
Amin a kimey mi et susuportaan na boluntaryon donasyon. (2 Corinto 9:7) Nen 1879, insulat ed komaduan isyu na sayan magasin: “Manisia kamin say manusuporta ed ‘Zion’s Watch Tower’ [datin ngaran na sayan magasin] et si JEHOVA, tan lapud satan, agbalot iya mipayabol odino mikasi ed totoo parad suporta.” Ag-itan anguman anggad natan.
Saray donasyon et ipepelag ed donation box diad saray Kingdom Hall odino direktan ipapawit iratan ed saray branch office mi. Balet agkamin balot mangaala na koleksion, kakaplo, o manpapabayar na serbisyo mi tan ed iiter mi ran babasaen. Anggapoy sueldo mid pampupulong mi, pambabangat ed kongregasyon, odino pampapaalagey na pandadayewan mi. On, ta imbaga nen Jesus: “Inawat yon anggapoy bayar, iter yon anggapoy bayar.” (Mateo 10:8) Amin ya ministro ed saray branch office tan world headquarters mi, kaiba la ray membro na Mananguley ya Ulop na Saray Tasi nen Jehova, et agmansusueldo.
“Amin ya gagawaen na saray Tasi nen Jehova et pupundoan na boluntaryon donasyon, akauley so sakey no pigaray iter to tan no panon kabetbet ya mangiter na ‘donasyon.’”—European Court of Human Rights, 2011
Uusaren mi met iray donasyon pian ontulong no wala ray kalamidad. Saray Kristiano nensaman et maliket ya angiter na tulong ed saray maniirap. (Roma 15:26) Tutulongan mi met iray apektado na kalamidad ya ipaalagey lamet so abung da, lugar ya pandadayewan da, tan iikdan mi ray naakan, kawes, tan tulong ed medikal.