Panon Tayon Nipanengneng ya Inar-aro Tayoy Jehova?

1, 2. Unong ed si apostol Juan, panon itayon imbangat nen Jehova ya ipanengneng so panangaro tayod sikato?

AMTA tayon mas epektibon nibangat na ama so anak to panamegley na mismon alimbawa to. Insulat nen apostol Juan ya “mangaaro itayo lapud [say Dios] so inmunan angaro ed sikatayo.” (1 Juan 4:19) On, impanengneng nen Jehova so sankaabigan ya alimbawa na panangaro na sakey ya ama pian napakiwas tayon ipanengneng met so panangaro ed sikato.

² Akin ya nibaga tayon say Dios so “inmunan angaro ed sikatayo”? Imbaga nen apostol Pablo: “Ipapatnag na Dios so panangaro to ed sikatayo, ta anggano makasalanan itayo ni et inatey si Kristo parad sikatayo.” (Roma 5:8) Nen inter nen Jehova so mismon Anak to pian nadondon itayo, impanengneng to no anto so tuan panangaro. Diad satan ya ginawa to, imbangat tod sikatayo ya say tuan panangaro et mabulos tan masakripisyo. Panamegley na dondon et posible tayo lan makaapit ed sikato tan nipanengneng tayo met so panangaro ed sikato.​—1 Juan 4:10.

3, 4. Panon tayon nipanengneng ya talagan inar-aro tayoy Dios?

³ Say aro so manunan kualidad nen Jehova. Kampegan oniay imbaga nen Jesus ed samay toon nantepet ed sikato no dinan so sankaimportantian ya ganggan na Dios: “Arom si Jehova a Dios mo ed interon pusom tan ed interon kamarerwam tan ed interon nonot mo tan ed interon biskeg mo.” (Mar. 12:30) Natalosan tayod sayan imbaga nen Jesus ya say manunan nalalanor ed pangaro tayod Dios et say puso tayo. Aglabay nen Jehova so naapag ya puso. Balet imanoen ya kaibad pangaro ed Dios so interon kamarerwa, nonot, tan biskeg. Labay ton ibaga, say tuan panangaro ed Dios et aliwan basta diad emosyon labat. Iilaloan nen Jehova ya ipanengneng tayoy panangaro tayod sikato diad amin ya nononoten tan gagawaen tayo. Unong ed si propetan Miqueas, atan so labay na Dios ya gawaen tayo.​—Basaen so Miqueas 6:8.

⁴ Panon tayon nipanengneng ya talagan inar-aro tayoy Aman Jehova? Nepeg ya kompleto so panangaro tayo. Singa imbaga la nen Jesus, kaukolan ya kaibad satan so interon puso, nonot, tan biskeg. Diad imbeneg ya artikulo, inaral tayo so apatiran paraan no panon ya ipapanengneng nen Jehova so baleg a panangaro to ed ananak to. Aralen tayo met natan iray paraan no panon tayon nipanengneng tan napaaralem so panangaro tayod si Jehova.

APRESYAEN IRAY PROBISYON NEN JEHOVA

5. Antoy manepeg labat ya ibales tayo ed amin ya inter nen Jehova ed sikatayo?

⁵ No walay nanregalo ed sika, antoy gawaen mo? Seguradon misalsalamat kad samay angiregalo. Tan seguradon agmo ibaliwala imay regalo to noagta usaren mo. “Amin a maong a regalo tan amin ya ayadyarin langkap et manlalapud tagey,” so insulat na disipulo ya si Santiago, “ta manlalapu itan ed Ama na saray liwawa ed tawen, tan sikatoy agmanguuman-uman, ya aliwan singa say anino ya onggagalaw.” (Sant. 1:17) Lanang ya itatarya nen Jehova iray nakaukolan tayo pian mantultuloy itayon manbilay tan magmaliw itayon maliket. Agta lapud satan et labay tayon ipanengneng met ed sikato ya inar-aro tayo?

6. Antoy nepeg ya gawaen na saray Israelita pian tuloytuloy iran bendisyonan nen Jehova?

⁶ Maaron inasikaso nen Jehova iray Israelita diad nilasus iran taon, tan dakel so materyal tan espiritual a bendisyon ya inter tod sikara. (Deu. 4:7, 8) Balet pian tuloytuloy iran nabendisyonan, kaukolan dan unoren so ganggan na Dios. Kaibad satan so regular ya pangiyapay dad si Jehova na “sankaabigan ed saray unonan aluton bunga” na dalin da. (Exo. 23:19, NW) No ontan so gawaen na saray Israelita, ipapanengneng dan agda ibabaliwala so panangaro tan bendisyon nen Jehova.​—Basaen so Deuteronomio 8:7-11.

7. Panon tayon nausar ‘iray kaykayarian’ tayo pian nipanengneng tayod si Jehova ya inar-aro tayo?

⁷ Sikatayo balet ey? Tua, ag-itayo la igaganggan nen Jehova ya mangiyapay na literal iran bagat natan. Balet manepeg labat ya ipanengneng tayon inar-aro tayoy Dios diad ‘pangigalang ed sikato panamegley na saray kaykayarian tayo.’ (Uli. 3:9) Panon tayon nagawaan itan? Say sakey ya paraan et diad pangiter tayoy kontribusyon pian nasuportaay kimey parad Panarian ed mismon kongregasyon tayo tan diad interon mundo. Melag man o baleg so sarag tayon iter, say importante et nibabalikas tayoy panangaro tayod si Jehova. (2 Cor. 8:12) Balet, wala ni arum ya paraan pian nipanengneng tayod si Jehova ya sikatoy inar-aro tayo.

8, 9. Panon ya say panmatalek ed si Jehova et mikonektaan ed panangaro tayod sikato? Mangiter na alimbawa.

⁸ Imbangat nen Jesus ed saray patumbok to ya agda pampapagaan so kanen tan isulong da, noagta itultuloy dan anapen nin unona so Panarian. Imbaga to ya amta na Ama no anton talagay nakaukolan tayo. (Mat. 6:31-33) Say kabaleg na talek tayod satan ya sipan et pakapatnagan no kaunongan so kaaralem na panangaro tayod si Jehova. Diad tua, agmo nibagan inarom so sakey no anggapoy talek mod sikato. (Sal. 143:8) Kanian, tepetan tayoy sarili tayo: ‘Kasin nanengneng ed saray planok ed bilay tan ed kabibilay ko natan ya talagan inar-arok si Jehova? Kasin nanengneng ed saray gagawaen ko ed inagew-agew ya manmamatalek ak ya iter toy pankaukolan ko?’

⁹ Ontan ya panangaro tan talek so impanengneng nen Mike. Nen ugaw ni, talagan labalabay to lay manboluntaryo diad arum ya bansa. Anggan nen angasawa la tan wala lay duaran anak to, ag-anguman itan ya pilalek to. Apaseseg si Mike tan say pamilya to ed dakel ya artikulo tan report nipaakar ed pamboluntaryo ed lugar ya baleg so pankaukolan, kanian nandesisyon iran pasimplien so bilay da. Inlako day abung da tan nanayam irad apartment. Pinasimpli met la nen Mike so negosyo da, tan inaral to no panon to itan ya naasikaso panamegley na Internet anggano wala lad arum a bansa. Insan la ra inmalis, tan kayari duaran taon ya impanboluntaryo dad arum a bansa, oniay imbaga nen Mike: “Apaneknekan mi ya talagan tua imay imbaga nen Jesus diad Mateo 6:33.”

IPAPUSO SO KATUAAN YA NANLAPUD DIOS

10. Singa nanengneng tayod alimbawa nen Arin David, antoy epekto ed sikatayo no dalepdepen tayoy katuaan nipaakar ed si Jehova?

¹⁰ Manga 3,000 ya taon lay apalabas, imbalikas nen Arin David so pandinayew tod saray nanenengneng tod tawen. Insulat to: “Iyaabawag na katawenan so gloria na Dios; ipapaamta na saray bengatlan walad tawen so kimey na lima to.” Insan to met imbalikas so panangapresya tod karunongan ya walad Ganggan na Dios. Imbaga to: “Say ganggan nen Jehova et ayadyari, pasimbaloen toy biskeg. Say panonot nen Jehova et napanmatalkan, gawaen ton marunong so andiay kakabatan.” Antoy epekto na satan ya impandalepdep nen David? Intuloy to: “Komon ta saray ibabalikas na sangik tan dadalepdepen na pusok et makapaliket ed sika, O Jehova, say Batok tan say Mananondon ko.” On, nagmaliw ya maap-apit ed Dios si David.​—Sal. 19:1, 7, 14, NW.

11. Panon tayon usaren so kakabatan ya inter na Dios ed sikatayo pian nipanengneng tayon sikatoy inar-aro tayo? (Nengnengen so litratod gapo na artikulo.)

¹¹ Diad panaon tayo, dakdakel so amta tayo nipaakar ed saray palsa nen Jehova tan ed pakakasumpal na gagala to. Ipapaseseg na sayan mundo so pangalay atagey ya edukasyon. Balet dakel lay akaeksperiensya ya nen ontan so ginawa ra, kinmapuy so pananisia ra tan binmetel so panangaro dad Dios. Say ipapaseseg na Biblia et agtayo labat la mangalay kakabatan noagta nawalaan tayo met komon na karunongan tan pakatalos. Labay ton ibaga, kaukolan tayon aralen no panon tayon nausar so kakabatan ya inter na Dios ed sikatayo pian pinabangan tayo itan tan na arum. (Uli. 4:5-7) Linawa na Dios ya “nilaban so amin a klase na totoo tan nawalaan ira na suston pikakabat ed katuaan.” (1 Tim. 2:4) Nipanengneng tayon inar-aro tayoy Jehova no gawaen tayoy anggaay nayarian tayo ya ibagad arum so maong a balita na Panarian tan tulongan tayo ran talosan so gagala na Dios parad totoo.​—Basaen so Salmo 66:16, 17.

12. Antoy alikna na sakey ya ugaw ya sister ed saray espiritual a probisyon nen Jehova?

¹² Anggan saray ugugaw et sarag dan ipanengneng so panangaro rad si Jehova diad pangapresya rad saray espiritual a probisyon to. Nanonotan ni na sakey ya sister ya say ngaran to et Shannon ya nen 11 años to, sikato tan say agi ton 10 años et inmatendid “Godly Devotion” ya Distriton Kombension kaiba iray atateng da. Diad sakey ya sesyon, inyanunsio ya onyurong ed niganan lugar iray ugugaw. Imbaga nen Shannon ya sikatoy mannerbiyos ed saman balet ta linma nin siansia. Insan asurprisa ta kada sakey ed sikara et inikdan na balibalin libro ya Questions Young People Ask​—Answers That Work. Antoy alikna nen Shannon? Imbaga to: “Talagan diman ko aliklikna ya tua si Jehova tan inar-aro to ak ya maomaong.” Intuloy ni nen Shannon: “Talagan malikeliket tayo ta say makapadinayew a Dios tayon si Jehova et iikdan to itayo na ontan iran marakdakep tan perpekton regalo!”

AWATEN SO SIMBAWA TAN DISIPLINA NA DIOS

13, 14. Panon tayon nipanengneng ya inar-aro tayoy Jehova diad panmoria tayod saray simbawa to?

¹³ ‘Say aaroen nen Jehova et babaaten to, singa sakey ya ama a manliket ed anak,’ so kuan na Biblia. (Uli. 3:12) Anto balet so nepeg ya reaksion tayo sano baaten odino disiplinaen itayo nen Jehova? Realistiko labat si apostol Pablo nen insulat to: “Diad panaon a niiter so disiplina et ag-itan makapaliket noagta makapaermen.” Diad satan ya imbaga nen Pablo, agto leleglemewen so kaimportantian na disiplina, ta intuloy to: “Ingen kayari to, saramay nipasal ed satan et manani na mareen a bunga.” (Heb. 12:11) No inaro tayoy Jehova, agtayo onsyodot no simbawaen to tayo odino ibaliwala tayo ray simbawa to. Wala ray arum ya aliwan mainomay ed sikara so mangawat na simbawa. No ontan so situasyon tayo, baleg so nitulong na panangaro tayod Dios.

¹⁴ Diad panaon nen Malaquias, dakel ya Judio so agdinmengel ed simbawa na Dios. Amta ray Ganggan nipaakar ed pangiyapay na saray bagat, balet anggapoy pibabali da anggano makapuy ya klase iray bagat da. Kanian aminpigapigan angiter si Jehova na ambelat a simbawa ed sikara, balet siansia nin ag-ira dinmengel. (Basaen so Malaquias 1:12, 13.) Panon tayon amta ya seryoso iman ya ginawa ra? Oniay imbaga nen Jehova: ‘Ibakik so ayew ed sikayo, tan gawaen kon ayew so bendisyon yo; on, ginawak ya ayew iratan, ta agyo inyan ed puso yo so ganggan ko.’ (Mal. 2:1, 2) Malinlinew ya ag-itayo abobonan nen Jehova no gagagalaen odino lanang tayon ibabaliwala iray maaron simbawa to.

15. Anton ugali na dakel ya totoo natan so agtayo nepeg ya aligen?

¹⁵ Diad panaon tayo, dakel so makasarili tan mapaatagey kanian mairap day mangawat na simbawa tan agda labay so pakorehi. No bilang awaten day simbawa, napipilitan ira labat. Balet nabibilin tayo ran Kristiano ya ‘agtayo aaligen iray paraan na sayan sistema na mundo.’ Imbes, kaukolan tayon talosan tan gawaen so “ayadyarin linawa na Dios.” (Roma 12:2) Uusaren nen Jehova so organisasyon to pian ikdan itayo na nipanpanaon iran simbawa. Singa bilang, napapanonotan itayo nipaakar ed pidedeneng ed agtayo kaparay sekso, panagpili na kaaro, tan panagrelaks. No mabulos tayon awaten tan iyaplika iratan ya simbawa, ipapanengneng tayon aapresyaen tayoy panangigiya nen Jehova tan talagan inar-aro tayo.​—Juan 14:31; Roma 6:17.

MANMATALEK ED PROTEKSION TAN PANANGILIKTAR NEN JEHOVA

16, 17. (a) Akin ya nepeg tayon ikonsideray linawa nen Jehova no mandedesisyon itayo? (b) Panon ya impanengneng na saray Israelita ya kulang so panangaro tan talek dad si Jehova?

¹⁶ No nalilikas na ugugaw ya walay peligro, say tampol ya gawaen da et ombatik irad ateng da. Balet diad ibabaleg da, nanaaralan day mandesisyon ya bukor tan manmatalek ed sarili da. Natural met labat itan. Balet, wala ray ananak ya maap-apit ed atateng da kanian anggano baleg la ra et kekerewen da nin siansiay opinyon tan simbawa na atateng da antis iran mandesisyon. Ontan met ed espiritual ya paraan. Tua, iikdan itayo nen Jehova na espiritu to pian nawalaan itayoy ‘pilalek tan pakayarin gawaen so panlabayan to.’ Balet no mandesisyon tayo ya agtayo ikonsideray linawa nen Jehova, pakapatnagan itan ya kulang so panangaro tan talek tayod sikato.​—Fil. 2:13.

¹⁷ Diad panaon nen Samuel nensaman, wala may aminsan ya atalo iray Israelita diad impilaban dad saray Filisteo. Kakkaukolan na Israel so tulong tan proteksion. Antoy ginawa ra? Imbaga ra: ‘Alaen tayo so kaban na sipan nen Jehova ed Silo, pian satan so mangilaban ed sikatayo ed lima na saray kabusol tayo.’ Balet antoy agawad sikara? Dakel so inatey. Say inatey ya Israelitan sundalo et 30,000. Tan say Kaban na Sipan et asamsam na saray kalaban. (1 Sam. 4:2-4, 10, 11) Say abaloan na saramay Israelita nen inala da may Kaban et tulongan tan protektaan ira nen Jehova. Balet diad tua, agda kinerew so panangigiya to. Imbes, say ginawa ra et no antoy iisipen dan duga, kanian aliway nansumpalan da.​—Basaen so Uliran 14:12.

18. Antoy nepeg ya nalikna tayo sano onkekerew tayoy tulong ed si Jehova?

¹⁸ Oniay insulat na salmistan talagan inar-aro toy Jehova tan nanmatalek ed sikato: “Manalagar ak ed Dios, ta sikatoy idayew ko ni bilang Makapadinayew a Manangiliktar ko. O Dios ko, maer-ermen ak. Kanian sankanonot ta ka.” (Sal. 42:5, 6, NW) Talagan inar-aro toy Jehova! Kasin ontan met so panangarom tan talek mo ed Ama tayod tawen? Nayarin say ebat mo et on, balet sarag mo nin pabiskegen so talek mod sikato, ya singa ibabaga na Biblia: ‘Manmatalek ka ed si Jehova ed simoon a pusom, tan agka onsaral ed dilin pakatalos mo. Diad saray amin a dalan mo et sikato so bidbiren mo, tan itonton to so saray basbas mo.’​—Uli. 3:5, 6.

19. Diad anto ran paraan ya labay mon ipanengneng ed si Jehova ya talagan inar-arom?

¹⁹ On, si Jehova so inmunan angaro ed sikatayo, tan impanengneng to no panon tayo met ya aroen. Lanang tayon nonoten so balibalin alimbawa to. Tan komon et lalo tayon nipanengneng ed sikato ya inar-aro tayo ‘ed interon puso tan ed interon kamarerwa tan ed interon nonot tan ed interon biskeg tayo.’​—Mar. 12:30.