EBAT ED SARAY TEPET ED BIBLIA
Naandi ni kasi paniirap?
Antoy gawaen na Dios pian Manampot so Kairapan ed Mundo?—Mateo 6:9, 10.
Kada taon, dakel so ompapatey ed malnutrisyon tan sakit lapud irap na bilay. Anggan wala ray bansa ya mayayaman, dakel balet so totoon agaylay irap na bilay da. Ipapaamta na Biblia ya abaybayag lan problema so kairapan na bilay.—Basaen so Juan 12:8.
Kaukolan so sakey ya gobierno ed interon mundo pian naandi so kairapan. Nepeg ya sarag na satan a gobierno ya iyapag ya parepareho iray kaukolan na totoo tan napatunda iray guerra, ya manunan lapuan na kairapan. Impromisa na Dios ya walay ontan ya gobierno.—Basaen so Daniel 2:44.
Siopa so makaekal na kairapan?
Pinili na Dios so Anak to, si Jesus ya manuley ed interon mundo. (Salmo 2:4-8) Tulongan nen Jesus iray mairap-bilay tan panampoten toy paniirap tan krimen.—Basaen so Salmo 72:8, 12-14.
Bilang “Prinsipe na Kareenan,” ipawil nen Jesus so kareenan tan seguridad ed mundo. Insan amin a totoo et wala lay sarilin abung da, makapaliket ya trabaho, tan dakel lay naakan.—Basaen so Isaias 9:6, 7; 65:21-23.