‘Mila Kami ed Sikayo’

1, 2. (a) Antoy impasakbay nen Jehova ya nagawad panaon tayo? (b) Anto ran tepet so naebatan ed sayan artikulo? (Nengnengen so litratod gapo na artikulo.)

NIPAAKAR ed sayan panaon a pambibilayan tayo, impasakbay nen Jehova: “Dia ed saman ya agew nagawa naani a samploran lalaki ompeket ira naani, manlapu ed saray amin a pansasalita na saray nasyon, sikara naani ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a say Dios wala ed sikayo.” (Zac. 8:23) Singa saraman ya samploran lalaki, saramay walaay ilalon manbilay ed dalin et ‘ompeket ed saloy na kawes na sakey a Judio.’ Malikeliket iran miulop ed saramay alanaan na masanton espiritu na Dios, say “Israel na Dios,” ta amta ran bebendisyonan nen Jehova iray nilanaan to.​—Gal. 6:16.

² Singa si propetan Zacarias, indanet nen Jesus ya saray totoo na Dios et nawalaay makapaligsan pankakasakey. Tinukoy to ramay manbilay ed tawen bilang “melag a pulok” tan saramay manbilay ed dalin bilang ‘arum a karnero,’ balet imbaga to ya sikaray “sakey a pulok” a walay “sakey a managpastol.” (Luc. 12:32; Juan 10:16) Lapud duaran grupo ira, nayarin isipen na arum: (1) Kaukolan kasin amtaen na arum a karnero so kangaranan na amin ya alanaan natan? (2) Antoy nepeg ya panmoria na saray alanaan ed sarili ra? (3) Antoy nepeg ya reaksion mo no walay kakongregasyon yon onggapon mibiang ed saray emblema ed Memoryal? (4) Nepeg kasin manpaga ka ed idarakel na mibibiang ed Memoryal? Pantongtongan tayo ray ebat ed saratan a tepet.

KAUKOLAN TAYO KASIN AMTAEN SO KANGARANAN NA AMIN YA ALANAAN NATAN?

3. Akin ya imposiblin naseguro tayo no siopa ray magmaliw a kabiangan na 144,000?

³ Kaukolan kasin amtaen na arum a karnero so kangaranan na amin ya alanaan natan? Say simplin ebat et andi. Akin ey? Lapud anggano naimbitaan so sakey ya onlad tawen, imbitasyon labat itan. Naawat to labat so ilalo to no mansiansian matoor. Kanian uusaren nen Satanas iray “palson propeta . . . pian no nayari et nibalang da anggan saramay pinili.” (Mat. 24:24) Anggad agni nandesisyon si Jehova ya say sakey ya alanaan et talagan makanepegan ed ilalo ton onlad tawen, agni segurado no kasin naawat to itan. Si Jehova so mandesisyon tan iter Tod sikatoy permanentin tatak antis ya ompatey ya matoor odino antis ya onggapoy ‘baleg ya kairapan.’ (Apo. 2:10; 7:3, 14) Kanian agla kaukolan ya amtaen natan na saray totoo diad dalin no siopad saray lingkor na Dios so magmaliw a kabiangan na 144,000.^[1]

4. No imposiblin naamtaan so kangaranan na amin ya alanaan ya wadia nid dalin natan, panon tayon “mila” ed sikara?

⁴ No imposiblin naamtaan so kangaranan na amin ya alanaan ya wadia nid dalin natan, panon ya “mila” ed sikara iray arum ya karnero? Imanoen no antoy ibabaga na propesiya nen Zacarias nipaakar ed simbolikon samploran lalaki. Sikaray “ompeket ed saloy na kawes na saman so Judio, a kuan da, Sikami mila kami naani ed sikayo, ta sikami nadngelan mi a say Dios wala ed sikayo.” Anggano saksakey ya Judio so abitla dia, say salitan “sikayo” et ontutukoy ed pigaran totoo. Sayan espiritual ya Judio sirin et ontutukoy ed interon grupo na alanaan, aliwan saksakey a too! Kanian agla kaukolan ya kabaten so kada espiritual ya Judio insan mila ed sikato. Imbes, kaukolan tayon kabaten iraya bilang grupo tan suportaan ti ra bilang grupo. Agbalot ipapaseseg na Biblia ya ontumbok tayod sakey ya too, ta si Jesus so Lider tayo.​—Mat. 23:10.

ANTOY NEPEG A PANMORIA NA SARAY ALANAAN A KRISTIANO ED SARILI RA?

5. Anton pasakbay so nepeg ya seryoson nonoten na saray alanaan, tan akin?

⁵ Nepeg ya nonoten a maong na saramay mangan tan oninum ed saray emblema ed Memoryal so pasakbay ed 1 Corinto 11:27-29. (Basaen.) Antoy punto nen apostol Pablo dia? Say sakey ya alanaan et “agmakanepegan” ed pibiang to no agto apansiansiay maabig ya relasyon tod si Jehova. (Heb. 6:4-6; 10:26-29) Ontulong itan ya pasakbay pian tandaan na saray alanaan a Kristiano ya agni niiter ed sikaray premyo ra. Kaukolan ya itultuloy da ni manggunaet a maong ‘pian naawat day premyo ed panatawag na Dios ed tawen diad panamegley nen Kristo Jesus.’​—Fil. 3:13-16.

6. Antoy nepeg a panmoria na saray alanaan a Kristiano ed sarili ra?

⁶ Apuyanan si Pablo ya mikasi ed saray alanaan a Kristiano: “Onkiwas kayo komon a manepeg ed anawagan ed sikayo.” Panon dan nagawaan itan? Impaliwawa to: “Walaan kayo komon a naynay na kapaabebaan na nonot tan inkaulimek, andukey a panag-anos, ya itepel yoy balang sakey diad aro, a gawaen yoy anggaay nayarian yo pian napansiansia yo so pankakasakey ed espiritu diad bedber na kareenan.” (Efe. 4:1-3) Tutulongan na masanton espiritu nen Jehova iray lingkor to ya magmaliw a mapaabeba, aliwan mapaatagey. (Col. 3:12) Kanian ag-iisipen na saray alanaan ya mas maong ira nen say arum. Bibidbiren da ya pareho labat so masanton espiritun iiter nen Jehova ed sikara tan ed saray agagi ya say ilalo ra et manbilay ed dalin. Ag-ira makakaawat na espisyal ya kakabatan odino pasingawey, ya isipen dan prueba itan ya mas marunong ira nen say arum. Tan agda met ibagad sakey ya agi ya sikatoy alanaan met tan nepeg lan mibiang ed saray emblema. Imbes, mapaabeban bibidbiren da ya si Jehova labat so mangiimbita ed saray totoo ya onlad tawen.

7, 8. Antoy nepeg ya ag-ilaloan na saray alanaan ya Kristiano, tan akin?

⁷ Anggano alay abig ya pribilehyo so naimbitaan ya onlad tawen, ag-iilaloan na saray alanaan a Kristiano ya espisyal so pantrato ed sikara na arum. (Efe. 1:18, 19; basaen so Filipos 2:2, 3.) Say espiritu nen Jehova so personal a nantasi ed sikara. Ag-itan inyanunsio ed interon mundo. Kanian agda pankelawan no wala ray agtampol manisia ya talagan nilanaan ira na masanton espiritu. Amta ray ibabaga na Biblia ya agnepeg a panisiaan a tampol so sakey a toon mangibabaga ya sikatoy inikdan na Dios na espisyal a responsabilidad. (Apo. 2:2) Kanian, agda ibabagad saray nakatongtong da ya alanaan ira. Diad tua, agda ingen bibitlaen itan ed arum pian napaliisay pangipaarap na atension ed sarili ra, tan agda met ipapasirayew so ilalo rad arapen.​—1 Cor. 1:28, 29; basaen so 1 Corinto 4:6-8.

⁸ Ontan met, ag-ipapasen na saray alanaan a Kristiano ya membro ira na sakey ya espisyal ya ulopan. Agda aanapen no siopa ni ray kapara dan alanaan pian sikara so naynay dan piulopan odino sikara labat so maniiban manaral na Biblia. (Gal. 1:15-17) Ta no ontan so gawaen da, niwalay inkaapag-apag ed kongregasyon tan sumlang itan ed masanton espiritu ya ontutulong pian niwalay kareenan tan pankakasakey na saray lingkor na Dios.​—Basaen so Roma 16:17, 18.

ANTOY NEPEG YA REAKSION MO?

9. Akin ya kaukolan moy manalwar ed paraan na pantratom ed saramay mamangan na tinapay tan oniinum na alak ed Memoryal? (Nengnengen so kahon ya “Say Aro et ‘Ag-onkikiwas a Mabanday.’”)

⁹ Antoy nepeg ya pantratom ed saramay mibibiang ed saray emblema ed Memoryal? Imbaga nen Jesus ed saray disipulo to: “Sikayon amin et sanaagi.” Insan to intuloy: “Siopaman a mangiyaatagey ed inkasikato et niyabeba, tan siopaman a mangiyaabeba ed inkasikato et niyatagey.” (Mat. 23:8-12) Kanian makapuy sirin ya ‘iyatagey’ so arum, anggano alanaan ya agagi ira nen Kristo. Nipaakar ed saray elder ed kongregasyon, papasesegen itayo na Biblia ya aligen so pananisia na saramay mangidadaulo, balet agbalot imbaga na satan ya gawaen tayon lider tayo so anggan siopan too. (Heb. 13:7) Tua, ibabaga na Biblia ya wala ray “makanepegan na doblin galang.” Balet makanepegan ira na galang, aliwan lapud alanaan ira, noagta lapud “maabig so panangidaulo ra” tan sikaray “mansasagpot ed panagsalita tan panagbangat.” (1 Tim. 5:17) Kanian no masyadoy panangirayew tan atension ya iter tayod saray alanaan, nababaingan ira. Tan alodloor ni, ompan nairapan iran mansiansian mapaabeba no espisyal so pantrato tayod sikara. (Roma 12:3) Agtayo labay ya natiror so sakey ed saray agagi nen Kristo lapud sikatayo!​—Luc. 17:2.

10. Panon yon nipanengneng ya rerespetoen yo iray alanaan a Kristiano?

¹⁰ Panon tayon nipanengneng ya rerespetoen tayo iramay nilanaan nen Jehova? Agtayo ra tetepetan no panon iran nagmaliw ya alanaan. Personal itan a bengatla kanian anggapoy kanepegan tayon amtaen itan. (1 Tes. 4:11; 2 Tes. 3:11) Agtayo met tetepetan iray atateng, asawa, odino arum nin kapamilya ra no kasin alanaan met ira. Agnatawir iyan ilalo ed saray kapamilya. (1 Tes. 2:12) Agtayo met nepeg ya tepetan so asawa na sakey ya alanaan no antoy nalilikna to no iisipen ton agto nakaibay asawa to ya manbilay na andi-anggaan diad dalin. Paliisan tayoy mantepet na posiblin makapasakit ed sikara. Segurado tayon lukasan nen Jehova so lima to tan ‘peneken to ray pilalek na amin a bengatlan mabilay.’​—Sal. 145:16.

11. Panon tayon naprotektaay sarili tayo no paliisan tayoy ‘pangirayew ed totoo’?

¹¹ No dugay pantrato tayo ed saray alanaan a Kristiano, naprotektaan itayo manlapud agnaliklikas ya kapeligroan. Ibabagad sikatayo na Biblia ya wala ray “palson agagi” ya agnaliklikas ya onloob ed kongregasyon. (Gal. 2:4, 5; 1 Juan 2:19) Ibabaga ni ingen na saratan ya impostor ya alanaan ira. Sakey ni, wala ray alanaan ya nayarin agmansiansian matoor. (Mat. 25:10-12; 2 Ped. 2:20, 21) No paliisan tayoy patit ya ‘pangirayew ed totoo,’ agda tayo naimpluensyaan ya onarawid katuaan; agmet onkapuy so pananisia tayo anggano say sakey ya kabkabat odino abayag lan Kristiano et agmanmatoor.​—Jud. 16.

KASIN NEPEG TAYON MANPAGA ED BILANG NA SARAY MIBIBIANG ED MEMORYAL?

12, 13. Akin ya agtayo nepeg a manpaga ed bilang na saray mamangan na tinapay tan oniinum na alak diad Memoryal?

¹² Diad imbebeneg iran taon et ondarakel so bilang na saray mamangan na tinapay tan oniinum na alak ed Memoryal na impatey nen Kristo. Midumaan itan ed imbebeneg iran dekada ta diad saman et ondadaiset lay bilang na saray mibibiang. Kasin nepeg tayon pampagaan iya? Andi. Imanoen tayo no akin.

¹³ “Kabat nen Jehova iramay kayarian to.” (2 Tim. 2:19) Saramay agagin manbibilang na saray mibibiang ed saray emblema diad Memoryal et agda amta no siopan talaga so walaay ilalon onlad tawen. Kaiba ed bilang iramay mibibiang ya iisipen dan alanaan ira balet andi manaya. Wala ra met so akibiang ed saray emblema balet tinmunda ra lanlamang. Saray arum et nayarin walay problema rad isip odino emosyon tan iisipen dan nakaiba ira nen Jesus ya manuley ed tawen. Kanian, agtayo nibase so eksakton bilang na saray nakekeraan ya alanaan ed dalin diad bilang na saray mibibiang ed Memoryal.

14. Antoy ibabaga na Biblia nipaakar ed bilang na saray alanaan ya wadia nid dalin no onggapo lay baleg ya kairapan?

¹⁴ Saray alanaan et walad nanduruman parte na dalin no onsabi si Jesus pian tiponen ira diad tawen. Nipaakar ed satan ya panaon, oniay ibabaga na Biblia nipaakar ed si Jesus: “Diad maksil a tanol na trumpeta et ibaki to iray anghel to, tan tiponen da iray pinili to manlapud apatiran dagem, manlapud sakey a sampot na tawen angga ed sananey a sampot na satan.” (Mat. 24:31) Ibabaga na Biblia ya legan na kaunoran iran agew, daiset lan nakekeraan ya alanaan so wadia ni ed dalin. (Apo. 12:17) Balet, ag-ibabaga na Biblia no pigarad sikara so wadia ni no onggapo lay baleg ya kairapan.

15, 16. Antoy nepeg tayon natalosan nipaakar ed 144,000 ya pinili nen Jehova?

¹⁵ Si Jehova so mandesisyon no kapigan to pilien iray alanaan. (Roma 8:28-30) Ginmapon nampili si Jehova na saray magmaliw ya alanaan kayari impatey tan inkioli nen Jesus, tan ompatnag ya amin ya kabiangan na Kristianon kongregasyon nen inmunan siglo et alanaan. Manlapu nen inmunan siglo angga ed kagapo na kaunoran iran agew, karaklan ed saramay mangibabagan ontutumbok irad Kristo et palson Kristiano; inyaliling ira nen Jesus ed “saray sisanyas.” Anggaman ontan, kaleganan na saman a panaon, nantultuloy si Jehova ya amili na saray matoor ya magmaliw ya alanaan tan singa ra samay “trigo” ya indeskribe nen Jesus. (Mat. 13:24-30) Legan na kaunoran iran agew, tuloytuloy nin mamipili si Jehova na saray magmaliw a kabiangan na 144,000.^[2] No labay nen Jehova so mamili na saray magmaliw ya alanaan antis ya onsabi anggaan, agtayo nepeg ya panduaruwaan so karunongan to. (Isa. 45:9; Dan. 4:35; basaen so Roma 9:11, 16.)^[3] Nepeg tayon manalwar ya agtayo aaligen so reaksion na saramay komikimey ya nanreklamo nipaakar ed impantrato na katawan da ed saramay nankimey ed koma-labinsakey ya oras.​—Basaen so Mateo 20:8-15.

¹⁶ Aliwan amin ya walaan na ilalon manbilay ed tawen et kaiba ed “matoor tan makabat ya aripen.” (Mat. 24:45-47) Singa nen inmunan siglo, uusaren natan nen Jehova tan si Jesus so pigara pian pakanen so dakel. Pigara labat ya alanaan a Kristiano nen inmunan siglo so inusar a mangisulat ed Kristianon Griegon Kasulatan. Mipadpara met natan, pigara labat ya alanaan a Kristiano so aturo ya mangitarya na espiritual a ‘naakan diad dugan panaon.’

17. Antoy naaralan yo ed sayan artikulo?

¹⁷ Antoy naaralan tayod sayan artikulo? Si Jehova so nandesisyon ya mangiter na duaran ilalo​—pambilay ed tawen parad saray espiritual a Judio tan pambilay ed dalin parad saray simbolikon samploran lalaki. Balet pareho so kakaukolanen nen Jehova ed duaran grupo pian naawat da so ilalo ra—​pareho iran nepeg a mansiansian matoor, mapaabeba, mankakasakey, tan ontulong pian mansiansiay kareenan ed kongregasyon. Legan ya manasingger lay anggaan, komon ta determinado tayon manlingkor bilang saksakey a pulok ya idadaulo nen Kristo.