Sikayo Ran Kabataan​—Kasin Akaparaan Kayo Lan Manpabautismo?

1, 2. (a) Antoy mamapaliket ed saray totoo na Dios natan? (b) Panon ya natulongan na saray Kristianon atateng tan saray elder iray kabataan pian natalosan day labay ya ibaga na pampabautismo?

“KABAT ta ka la manlapu nen inyanak ka,” so imbaga na sakey ya elder ed 12 años ya si Christopher, “tan malikeliket ak ta labay mo lay manpabautismo. Balet walay tepet kod sika, ‘Akin et labay moy manpabautismo?’” Walay rason no akin ya intepet itan na elder. Siempre, malikeliket tayo ya nanengneng so nilibon kabataan a manpapabautismo ed kada taon diad interon mundo. (Ecl. 12:1) Balet, labay ya naseguro na saray Kristianon atateng tan saray elder ed kongregasyon ya sarayan kabataan et ag-apilitan ya nandesisyon tan mabiskeg so rason na satan a desisyon da.

² Ipapabitar na Biblia ya diad dedikasyon tan bautismo et onggapon makaawat iray Kristiano na saray bendisyon manlapud si Jehova tan isusumpa manlapud si Satanas. (Uli. 10:22; 1 Ped. 5:8) Kanian, ipapanaon na saray Kristianon atateng ya ibangat ed saray anak da no antoy kaukolan pian magmaliw ya disipulo na Kristo. Balet saray kabataan ya aliwan Kristiano iray ateng da et maaron tutulongan na saray elder ed kongregasyon pian naamtaan da no anto ray kaukolan ed pagmaliw ya disipulo. (Basaen so Lucas 14:27-30.) Kaukolan so pamplano pian nasumpal so pampaalagey na sakey a bilding. Ontan met, kaukolan so pamparaan pian makapanlingkor a matoor ed si Jehova “anggad anggaan.” (Mat. 24:13) Balet, antoy gawaen na saray kabataan pian magmaliw iran determinadon manlingkor ed si Jehova legay bilay da? Nengnengen tayo.

3. (a) Antoy naaralan tayod imbaga nen Jesus tan Pedro nipaakar ed kaimportantian na bautismo? (Mat. 28:19, 20; 1 Ped. 3:21) (b) Anto ran tepet so aralen tayo, tan akin?

³ Kasin sakey kan kabataan tan plaplanoen mo lay manpabautismo? No ontan, nakomendaan ka! Baleg ya pribilehyo so nabautismoan bilang sakey ed Saray Tasi nen Jehova. Sakey ni, kaukolan ya saray Kristiano et nabautismoan, tan importante itan pian nisalba ira. (Mat. 28:19, 20; 1 Ped. 3:21) Lapud labalabay mon tooren so isipan mo ed si Jehova, seguroen mon akaparaan ka parad sayan importantin gawaen mo. Kanian, makatulong no nonoten mo irayan taloran tepet pian nasegurom no kasin akaparaan ka lan manpabautismo: (1) Kasin “matatken” ak la pian makapandesisyon ya manpabautismo? (2) Kasin siak ya mismo so nandesisyon ya manpabautismo? (3) Natatalosan ko kasi no antoy labay ya ibaga na pangidedika na bilay ed si Jehova? Aralen tayo iratan ya tepet.

NO “MATATKEN” KA LA

4, 5. (a) Akin ya say bautismo et aliwan para labat ed saramay wala lad edad? (b) Panon a nibagan say sakey a Kristiano et matatken la?

⁴ Anggapoy ibabaga na Biblia ya say bautismo et para labat ed saramay wala lad edad odino aliwa lan menor de edad. Oniay nabasa tayod Uliran 20:11: “Anggan say ugaw ipakabat to so inkasikato ed panamegley na saray gawa to, no say kimey to sikato so malinis, tan no sikato so maptek.” On, anggano say sakey et ugaw ni, sarag to lan natalosan no antoy labay ya ibaga na panggaway duga tan pagmaliw ya dedikado ed Dios ya amalsa ed sikato. Kanian, say pampabautismo et importante tan matukoy parad sakey ya kabataan ya ipapanengneng to lay inkatatken tan indedika to lay bilay to ed si Jehova.​—Uli. 20:7.

⁵ Panon a nibagan say sakey et “matatken” la? Say pagmaliw a matatken et aliwa labat lan base ed edad. Ibabaga na Biblia ya saramay matatken la et “manguusar ed pakayari ran mantalos tan lapud saya et nipasal itan a mangibiig ed duga tan aliwa.” (Heb. 5:14) Kanian, say toon matatken la et amta to no antoy duga ed pakanengneng nen Jehova tan determinado ton gawaen itan. Lapud satan, agmainomay ya naimpluensyaan ya manggaway aliwa, tan agmet kaukolan ya dagdagen a lanang pian manggaway duga. On, say sakey a kabataan a manpabautismo et iilaloan ya unoren to ray ganggan na Dios anggano agto kaibay atateng to odino arum nin wala lad edad.​—Ikompara so Filipos 2:12.

6, 7. (a) Anto ray subok ya inarap nen Daniel diad Babilonia? (b) Panon ya impanengneng nen Daniel so inkatatken?

⁶ Sarag kasin ipanengneng na saray kabataan so inkatatken? On. Isipen pay alimbawa nen Daniel diad Biblia. Nayarin tinedyer ni nen sikatoy inyarawi ed saray ateng to tan inawit ed Babilonia. Saray totoo diman et dumay pakatalos da ed no antoy duga tan aliwa. Insan wala ni sakey ya subok ed si Daniel: Espisyal so panagtrato dad sikato diad Babilonia. Diad tua, sikatoy kaiba ed saray pigaran kabataan ya maalwar a pinili pian manlingkor ed ari! (Dan. 1:3-5, 13) Kanian singa wala ray marakep ya pankanawnawa parad si Daniel ed Babilonia ya nayarin agton balot asali ed Israel.

⁷ Antoy reaksion nen kabataan ya Daniel ed saratan? Kasin naingganyo ya magmaliw a sikat odino kabkabat ed Babilonia? Kasin pinaulyanan ton nauman so inkatoo to odino onkapuy so pananisia to lapud impluensya na saray walad kaliberliber to? Andin balot! Ibabaga na Biblia ya legan a walad Babilonia, si Daniel et determinado ya agto dutakan so sarili to na anggan anton bengatla ya alaokan na palson panagdayew. (Dan. 1:8) Balibali so impanengneng nen Daniel ya alimbawa na inkatatken!

8. Antoy naaralan mo ed alimbawa nen Daniel?

⁸ Antoy naaralan mo ed alimbawa nen Daniel? Say sakey ya kabataan ya ipapanengneng toy inkatatken et agmanguman-uman ed papanisiaan to. Sikatoy aliwan singa samay ayep ya chameleon odino angga, ya manguman-uman so kolor to depende ed kaliberliber to. Agto onkiwas a singa kaaro na Dios no walad Kingdom Hall balet kaaro na mundo no walad eskuelaan. Imbes ya niyanor-anor, sikatoy mansiansian matoor anggano nasusubok so pananisia to.​—Basaen so Efeso 4:14, 15.

9, 10. (a) Panon a makatulong ed sakey a kabataan no nonoten to so impangarap tod saray agano nin subok ed pananisia to? (b) Antoy labay ya ibaga na bautismo?

⁹ Siempre, anggapoy toon perpekto. Saray kabataan, ontan met ed saray maedad la et nalilingo. (Ecl. 7:20) Balet no plaplanoen moy manpabautismo, maabig no usisaen moy pusom no panon kabiskeg so determinasyon mon unoren iray ganggan nen Jehova. Panon mon naamtaan so kabiskeg na determinasyon mo? Tepetay sarilim, ‘Anto la ray agawaan ko diad panguunor kod saray ganggan na Dios?’ Isipen no panon mon inarap iray agano nin subok ed pananisiam. Apruebaan mo la kasi ya sarag mo lan ibiig so duga ed aliwa? Panon to no espisyal so pantrato ed sika na arum diad mundo nen Satanas, a singa impantratod si Daniel? Sarag mo kasin ‘tebeken no anto so linawa nen Jehova’ anggano onkontra itan ed labay mon gawaen?​—Efe. 5:17.

¹⁰ Akin et kaukolan iratan ya prangkan tepet? Ontulong iratan pian duga so pakatalos mo ed bautismo. Singa abitla ed gapo, isisimbolo na bautismo so impapuson sipan mo ed si Jehova. Insipan mo ya diad interon pusom et sikatoy aroen tan panlingkoran mo ya anggapoy anggaan. (Mar. 12:30) Kada sakey ya manpabautismo et kaukolan ya determinado ton tooren so sipan to.​—Basaen so Eclesiastes 5:4, 5.

KASIN SIKAN MISMO SO NANDESISYON YA MANPABAUTISMO?

11, 12. (a) Antoy nepeg ya seguroen na sakey a manplaplanon manpabautismo? (b) Antoy makatulong ed sika pian duga so pakatalos mo ed uksoyan nen Jehova nipaakar ed bautismo?

¹¹ Ibabaga na Biblia ya saray totoo nen Jehova, kaiba la ray kabataan, et “iyapay da so inkasikara a mabulbulos” ya manlingkor ed sikato. (Sal. 110:3) Kanian no plaplanoen na sakey so manpabautismo, kaukolan ton seguroen ya desisyon ton mismo itan. Kaukolan mon usisaen so sarilim. Akin ey? On ta nayarin mas maabig so kipapasen mo bilang kabataan lapud pinabaleg ka ed katuaan.

¹² Diad ilalabas na taon, nayarin dakel lay anengneng mon nampabautismo—kaiba la ray kakaarom tan ompan pati saray agagim. No ontan so situasyon mo, antoy nepeg mon panalwaran? Agmo iisipen ya say pampabautismo et singa sakey ya kustombre ya no susto lay edad mo et kaukolan mo lan gawaen tan nepeg met ya tumboken na amin ya kabataan. Antoy gawaen mo pian nasegurom ya duga so pakatalos mo ed uksoyan nen Jehova nipaakar ed bautismo? Maabig no nonoten mon lanang iray rason no akin ya importante so pampabautismo. Diad tua, nanengneng mod sayan artikulo tan diad onsublay so dakel ya maabig a rason.

13. Panon mon naamtaan no kasin say desisyon mon manpabautismo et nanlapud pusom?

¹³ Wala ray paraan pian naamtaan mo no kasin say desisyon mon manpabautismo et nanlapud pusom. Singa bilang, napatnagan ed saray pikakasim ya talagan labay moy manlingkor ed si Jehova. Nanengneng ya maapit so relasyon mod si Jehova no lanang kan manpipikasi tan espisipiko iray ipipikasim. (Sal. 25:4) Say sakey ya importantin paraan no panon ya eebatan nen Jehova iray pikakasi tayo et diad pangipapaimano tod Salita to. Kanian, say panaaral tayoy Biblia et sakey nin pakapatnagan ya labalabay tayoy onapit ed si Jehova tan impapuson manlingkor ed sikato. (Jos. 1:8) Tepetay sarilim: ‘Kasin espisipiko iray pikakasik? Regular kasi so personal ya panagaral koy Biblia?’ Tan no walay Panagdayew na Pamilya yo, tepetay sarilim: ‘Kasin agak napipilitan ya mibiang ed satan ya uksoyan na pamilya mi?’ Saray ebat mo ed saratan a tepet so ontulong pian naamtaan mo no kasin say desisyon mon manpabautismo et desisyon mon mismo tan agka napipilitan.

SAY LABAY YA IBAGA NA DEDIKASYON

14. Antoy pandumaan na dedikasyon tan bautismo?

¹⁴ Nayarin aliwan malinew ed arum so pandumaan na dedikasyon tan bautismo. Singa bilang, ibabaga na arum ya kabataan ya indedika da lay bilay dad si Jehova balet agni ra akaparaan ya manpabautismo. Duga kasi itan? Say pangidedika na bilay ed si Jehova et say pangibaga ed sikato ya labay mo lan panlingkoran ya anggapoy anggaan. No manpabautismo so sakey ya too, ipapanengneng tod arum ya indedika to lay bilay to. Kanian, say bautismo et pangipaamta ed totoo ya indedikam lay bilay mo ed si Jehova panamegley na pikakasi. Antis kan manpabautismo, kaukolan mon seguroen ya natatalosan mo so labay ya ibaga na dedikasyon.

15. Antoy labay ya ibaga na dedikasyon?

¹⁵ No idedikam so bilay mod si Jehova, agka la manbilay parad sarilim. Isipan mo ed si Jehova ya unaen mo lad bilay mo so panggawa na linawa to. (Basaen so Mateo 16:24.) Kaukolan ya gawaen tan sumpalen so anggan anton promisa tayo, agta mas lalo lad promisa tayo ed si Jehova a Dios? (Mat. 5:33) Kanian panon mon nipanengneng ya talagan agka la manbibilay parad sarilim tan kayarian ka la natan nen Jehova?—Roma 14:8.

16, 17. (a) Iyilustra so labay ya ibaga na pangiter moy bilay mod si Jehova. (b) No idedika na sakey so bilay to, antoy singa ibabaga to?

¹⁶ Bilang ilustrasyon, isipen pa ya walay kaarom ya angiregalo ed sika na kotse. Inderew tod sikay papeles tan inkuan to: “Iter kod sika yan kotse.” Insan to balet ibaga: “Siak so mangiyatol na tombok. Tan siak so manmaneho, aliwan sika.” Antoy nibagam ed satan ya “regalo” ey? Tan antoy nibagam ed samay angiter?

¹⁷ Natan, nonot mo pa no antoy iilaloan nen Jehova ed sakey a toon angidedika na bilay to tan imbaga ton: “Iter ko lad sikay bilay ko. Sika lay akanggawa ed siak.” Balet panon to no satan ya too et doble panagbilay to, ompan isesekreto toy pikakarawan tod sakey ya aliwan Tasi? Panon to no awaten toy trabaho ya apektadoy panaglingkor tod ministeryo odino pipiaral to? Agta singa itan imay agpangiter na tombok na kotse? No idedika la na sakey a too so bilay tod si Jehova, singa to ibabagan: “Sika lay akanggaway bilay ko, aliwan siak. No bilang ta duma so labay mo ed labay ko, say unoren kon lanang et say labay mo.” Mipara itan ed panagnonot nen Jesus, ya nen wadia ni ed dalin et imbaga ton: “Linmeksab ak manlapud tawen pian gawaen ko so linawa na samay angibaki ed siak, aliwan say linawak.”​—Juan 6:38.

18, 19. (a) Panon ya napatnagan ed imbaga di Rose tan Christopher ya say pampabautismo et sakey a pribilehyon panlapuan na saray bendisyon? (b) Antoy nibagam ed pribilehyon pampabautismo?

¹⁸ On, say bautismo et sakey a seryoson desisyon ya agtayo nepeg ya leglemewen. Ontan met, baleg ya pribilehyo so pangidedika tayoy bilay tayo tan pampabautismo. Saray kabataan ya inaro day Jehova tan natatalosan da so labay ya ibaga na dedikasyon et mabulbulos iran manpabautismo, tan agdan balot pagbabawian itan ya desisyon da. “Inar-arok si Jehova tan anggapo lay mas makapaliket ed siak nen say panlingkor ed sikato,” so imbaga nen Rose, sakey a tinedyer ya abautismoan la. “Say sankaseguradoan ya ginawak ed bilay ko et say desisyon kon manpabautismo.”

¹⁹ Kumusta balet si Christopher ya abitla ed gapo na sayan artikulo? Kasin talagan walay mabiskeg ya rason na desisyon ton manpabautismo nen 12 años to? Malikeliket si Christopher no nanonotan toy impangidedika tod bilay to tan impanpabautismo to. Sikatoy nan-regular payunir nen 17 años to tan nagmaliw ya ministeryal a lingkor nen 18 to. Natan et Bethelite la. Inkuan to: “Duga so desisyon kon manpabautismo. Say bilay ko et napno na makapnek iran kimey parad si Jehova tan parad organisasyon to.” No plaplanoen moy manpabautismo, panon kan makapanparaan ed satan? Naebatan itan ed onsublay ya artikulo.