Ikompara so Papanisiaan Mo ed no Antoy Ibabangat na Biblia

KASIN Kristiano ka? No on, sakey kad saray masulok ya duaran bilyon ya totoo ed interon mundo ya mangibabagan ontutumbok ed Kristo. Diad panaon tayo, nilibon nanduruman sekta odino relihyon so tatawagen ya Kristiano, balet nandurumay doktrina tan papanisiaan da. Kanian ompan duma iray sisiaen mo ed sisisiaen na arum nin mangibabaga ya Kristiano ira. Talaga kasin importante no antoy papanisiaan mo? On importante, ta seguradon labay mon aligen imay tuan Inkakristiano ya ibabangat a mismo na Biblia.

Saramay disipulo nen Jesus nensaman et tinawag ya “Kristiano.” (Gawa 11:26) Agla kaukolan ya tawagen irad arum nin ngaran ta diad saman et saksakey labat so relihyon ya Kristiano. Amin ya Kristiano nensaman et nankakasakey dan tutumboken iray bangat tan bilin na Angigapo ed Inkakristiano, si Jesu-Kristo. Say relihyon mo balet ey? Kasin kombinsido ka ya say ibabangat na satan et samay imbangat nen Kristo tan pareho ed saray papanisiaan na saray disipulo to nensaman? Panon mon naseguro? Walay saksakey labat ya paraan—nengneng moy ibabaga na Biblia.

Isip mo pa: Rerespetoen a maong nen Jesu-Kristo so Kasulatan ta amta ton Salita itan na Dios. Kabusol to iramay mas tutumboken day tradisyon na too nen say ibabangat na Biblia. (Marcos 7:9-13) Duga labat sirin ya ibaga tayon saray tuan disipulo nen Jesus et ibabase day papanisiaan da ed Biblia. Kanian importantin itepet na kada Kristiano ed sarili to, ‘Kasin parehoy ibabangat na relihyon ko ed ibabangat na Biblia?’ Pian naebatan itan, mas maabig no ikomparam so ibabangat na relihyon mo ed no anton talagay ibabaga na Biblia.

Imbaga nen Jesus ya kaukolan tayon dayewen so Dios diad katuaan, tan satan ya katuaan et walad Biblia. (Juan 4:24; 17:17) Imbaga nen apostol Pablo ya pian niliktar itayo nepeg ya walaan itayo na “suston kakabatan ed katuaan.” (1 Timoteo 2:4) Kanian importantin saray papanisiaan tayo et akabase ed suston katuaan na Biblia. Akadepende ed saya so mismon bilay tayo!

IKOMPARA IRAY PAPANISIAAN TAYO ED IBABAGA NA BIBLIA

Pibasam pa irayay anemiran tepet tan imanoen so ebat na Biblia ed saratan. Lukasan mod Bibliam iray bersikulo tan nonot mon maong iray ebat. Insan mo tepetay sarilim, ‘Kasin parehoy ibabangat na relihyon ko ed ibabangat na Biblia?’

Makatulong iyan antikey ya quiz pian nikomparam iray papanisiaan mo ed no antoy ibabangat na Biblia. Seguradon labay mon gawaen itan. Maliket iray Tasi nen Jehova ya tulongan kan aralen so malinew ya katuaan a walad Biblia. Tan marakep no paiyaralan kay Biblia ed sakey ya Tasi nen Jehova, libre itan. Odino sarag mo met ya nengnengen so website mi ya jw.org/pag.