TEPETEPET NA SARAY MANBABASA
Antoy tutukoyen nen Pablo sanen inkuan ton makaawat so kada alanaan a Kristiano na “pakaseguroan” o garantiya tan “tatak” manlapud Dios?—2 Cor. 1:21, 22.
Nensaman, say singsing a panagtatak et itelmer ed pitek odino wax pian paneknekan ya tua so sakey a dokumento
Pakaseguroan o garantiya: Unong ed sakey a reperensya, say Griegon salita ya impatalos a “pakaseguroan” diad 2 Corinto 1:22 et “sakey a termino ya uusaren ed ley tan komersyo a mankabaliksay “paunan bayar, deposito, odino garantiya, ya ibayar pian paunaan so saliwen, tan satan so mangipaseguro a kayarian to la imay sasaliwen, odino pagmaliwen ton legal so kontrata.” No nipaakar ed saray alanaan, makaawat iray pakaseguroan, balet say interon bayar odino tumang ya adeskribe ed 2 Corinto 5:1-5 et tutukoyen toy pangisulong na agkabubulok. Kaiba met ed tumang so pakaawat na imortalidad.—1 Cor. 15:48-54.
Diad modernon Griego, mipadparan balikas so inusar parad singsing na saray nansipanan. Matukoy iyan ilustrasyon parad saramay magmaliw a kaiba ed simbolikon asawa na Kristo.—2 Cor. 11:2; Apo. 21:2, 9.
Tatak: Nensaman, say tatak et uusaren a singa pirma pian ipanengneng no siopay akankayarian, aliwan peke so sakey a bengatla, odino walay paknaan. No nipaakar ed saray alanaan, sikaray “atatakan” odino simbolikon minarkaan na masanton espiritu bilang kayarian na Dios. (Efe. 1:13, 14) Balet, magmaliw labat a permanente itan ya tatak antis ya say sakey ya alanaan et ompatey ya matoor odino antis ya onggapoy baleg ya kairapan.—Efe. 4:30; Apo. 7:2-4.