MANUNAN ARTIKULO | SARAY WALAD TAWEN—IMPAAMTA ED TOO
Tepetepet Nipaakar ed Saray Walad Tawen
Kasin labay mon naamtaan so nipaakar ed tawen tan no siopa ray manaayam ditan? Diad tua, nilibon taon la ya nandurumay iisipen na totoo ed satan. Wala ray manisia ya ditan manaayam iray inatey lan kapamilya o kakanayon ya nepeg ya idayew. Iisipen balet na arum ya satan et maliket tan mareen ya pasen, ya panaayaman na saray anghel tan inaatey ya maong a totoo. Wala met iray manisia ya manaayam ditan iray minilyon ya dirios.
Dakel ya totoo so mangibabagan agtayo naamtaan so nipaakar ed tawen ta anggapon balot so akaonla ditan. Satan a panagkatunongan et aliwa. Si Jesu-Kristo et nanayam ed tawen antis ya linmad dalin. Imbaga ton mismo itan ed saray lider na relihyon nen inmunan siglo: “Linmeksab ak manlapud tawen pian gawaen koy linawa na samay angibaki ed siak, aliwan say linawak.” Kanian base ed eksperiensya to iyan imbaga tod saray apostol to: “Dakel so napanayaman ed abung nen Amak.”—Juan 6:38; 14:2.
Siempre, say Ama nen Jesus et say Dios, ya say ngaran to et Jehova, tan say “abung” nen Jehova et diad tawen. (Salmo 83:18) Kanian say talagan makapangipaliwawa ed satan et si Jehova a Dios tan si Jesu-Kristo. Dakel so impaamta ra nipaakar ed tawen diad saray impanengneng da ed matoor a totoo panamegley na milagro.
Nabasad onsublay ya artikulo iray walad Biblia ya manideskribe no anto ray impanengneng ed saray lalaki panamegley na milagro. Legan mon aaralen iratan, tandaan ya say tawen et agtayo nanengneng odino nadiwit. Kanian imbes ya ipaliwawa iratan na Dios diad paraan ya natalosan labat na saray espiritu, impanengneng to iratan diad paraan ya natalosan tayo pian ipaamta so nipaakar ed tawen. Ontulong iratan pian naamtaan mo so nipaakar ed saray walad tawen, ya ditan et “dakel so napanayaman.”