Kasin Nanonotan Yo?

Binasam ta iray agano nin isyu na Say Panag-bantayan tan The Watchtower? Salim pa sirin ya ebatan irayan tepet:

Akin ya inabuloyan nen Jehova iray guerra ed Israel nensaman?

Si Jehova et maaro. Balet wala ray panaon ya inyabuloy toy piguerra no nipeligro iray totoo to lapud kaugsan tan panagpairap. Say Dios labat so makapandesisyon no siopa ray miguerra tan kapigan.—w15-E 11/1, p. 4-5.

Anto ray importantin nagawaan na atateng pian nipasal da ray tinedyer ya ananak dan manlingkor ed si Jehova?

Importante ya aroen na atateng iray tinedyer ya ananak da tan ipanengneng dad alimbawa ra ya mapaabeba ira. Importante met ya walay pakatebek na atateng tan gawaen day anggaay nayarian dan talosan iray ananak da.—w15 11/15, p. 9-11.

Akin ya agnepeg ya ipasen a say papa so sinmalat ed si Pedro?

Ag-ibabaga na Mateo 16:17, 18 ya si apostol Pedro so magmaliw ya ulo na Kristianon kongregasyon. Say ibabaga na Biblia et aliwan si Pedro so walaan na manunan betang, noagta si Jesus so magmaliw ya bato ed suyok odino ulo na kongregasyon. (1 Ped. 2:4-8)—w15-E 12/1, p. 12-14.

Anto ray nepeg tayon nonoten antis ya mansalita?

Pian maabig so pangusar tayod dila tayo, nepeg tayon tandaan (1) no kapigan so dugan panaon na pansalita (Ecl. 3:7), (2) no antoy ibaga tayo (Pro. 12:18), tan (3) no panoy pansalita tayo (Pro. 25:15).—w15 12/15, p. 19-22.

Anto ray kagagawan aliwan matua ya nepeg a paliisan na saray Kristiano?

Papaliisan na saray tuan Kristiano so pantila tan panagpauges. Ag-ira mangibabaga na aliwan tua tan mauges iran salita ya maneral ed arum, tan agmet ira mansasaol tan mantatakew.—wp16.1, p. 5.

Siopa ray “manunan saserdote” ya abitlad Biblia?

Mapatnag a saray “manunan saserdote” et ontutukoy ed manunaan iran membro na saserdote, kaiba iray datin atagey a saserdote ya inekal ed posisyon.—wp16.1, p. 10.

Antoy nepeg ya pantrato tayo ed saramay mibibiang ed saray emblema ed Memoryal?

Ag-iyaatagey na saray Kristiano iray mibibiang ed saray emblema. Say tuan alanaan et agto labay so niyatagey tan agto labay ya ibagbaga ed arum so pribilehyo tod arapan na Dios. (Mat. 23:8-12)—w16.01, p. 23-24.

Antoy naaralan tayod impagmaliw nen Abraham ya kaaro na Dios?

Inaral nen Abraham so nipaakar ed Dios, nayarin diad panamegley nen Shem. Tan akaaral si Abraham ed paraan na impideneng na Dios ed sikato tan ed pamilya to. Sarag tayo met ya gawaen itan.—w16.02, p. 9-10.

Panon ya awalaan na saray kapitulo tan bersikulo so Biblia?

Si Stephen Langton ya pari nen koma 13 siglo et inapag-apag toy Biblia diad saray kapitulo. Antis na satan, saray Judion managkopya et angiyan la na saray bersikulo diad Hebreon Biblia, tan nen koma 16 siglo, ontan met so ginawa na scholar ya si Robert Estienne ed Griegon Kasulatan.—wp16.2, p. 14-15.

Kasin literal ya inyakar nen Satanas si Jesus diad templo pian tuksoen to?

Agtayo itan nasegurado. Nayarin say labay ya ibaga na Mateo 4:5 tan Lucas 4:9 et niyakar si Jesus diman diad sakey ya pasingawey odino sikatoy inmalagey diad sakey ya atagey a pasen ed templo.—w16.03, p. 31-32.

Panon a say ministeryo tayo et singa linaew?

Say linaew et kalkalnan natitipon, makaparepresko, tan mangiiter na bilay. Bendisyon itan ya nanlapud Dios. (Deu. 33:13) Mipara ed satan so impaniiban sagpot na totoo na Dios diad ministeryo.—w16.04, p. 4.