Minabang ed Panangigiya nen Jehova

DUGAN DESISYON DIAD POLAND

“SAY taon ko et 15 nen abautismoan ak, tan kayari anemiran bulan et nan-auxiliary payunir ak. Kayari na sakey taon, nan-aplay ak ya regular payunir. Kapan-graduate kod haiskul, nan-aplay ak ya manlingkor ed lugar ya mas baleg so pankaukolan. Labay koy makaarawi ed binalegan kon lugar tan ed si baik ya kaibak ed abung ya aliwan Tasi nen Jehova. Agaylay ermen ko nen imbaga na manangasikaso na sirkito ya say asainmin ko et diad mismon lugar ya binalegan ko! Agko impaamtad sikatoy naliliknak. Basta tinmuek ak, linma ak la, tan sankanonot koy imbaga to. Imbagak ed partner kon payunir: ‘Pakaliknak et singa ak si Jonas. Balet linma lanlamang si Jonas ed Ninive. Kanian, manlingkor ak met ed asainmin ko.’

“Apat taon ak la natan ya manpapayunir ed baley mi, tan anengneng kon duga so itumbok ed instruksion. Say problema manaya et say ugalik. Natan et malikeliket ak la. Diad kada bulan, 24 so iyaaralan ko na Biblia. Salamat ed si Jehova ta anggan si baik ya datin kontra ed pananisia tayo et iyaaralan ko lay Biblia.”

MALIKET YA RESULTA DIAD FIJI

Walay sakey ya iyaaralan na Biblia ya kaukolan toy manpili no kasin onatendi ed kombension odino milad si asawa to diad birthday na kanayon da. Inmabuloy so asawa to ya onla nid kombension insan ontumbok la. Balet kasempet to kayari na kombension, naisip ton mas maong no agla onla pian agnapeligro so espiritualidad to, kanian aglinma.

Imbaga na asawan laki ed saray kanayon da ya ontumbok lanlamang si asawa to kayari na “asemblea na saray Tasi,” balet imbaga na saray kakanayon to, “Agdia man onla ta agmanbi-birthday iray Tasi nen Jehova!”a

Makakaliket so asawan laki ed desisyon na asawan to ya unoren iray papanisiaan tan konsiensia to. Lapud pananisia tan katooran na asawan bii, apulongan toy asawa to tan saray arum ni. Antoy resulta? Nampaiyaral na Biblia so asawan laki tan akila met lad Kingdom Hall.