“Nagmaliw Ak ya Amin a Bengatla ed Amin a Klase na Totoo”

UGAW ak ni et interesado ak lan naamtaan so katuaan ya walad Biblia. Wala ray publikasyon nen nanay ya base ed Biblia, tan labalabay ko iraman, lalo la ray litrato. Aglabay nen tatay ya ibagad siak nen nanay iray nanaaralan to. Balet mausisa tan matepet ak, kanian iyaaralan ak nen nanay no anggapod abung si tatay. Kanian ag-abayag et nandesisyon ak met lan idedikay bilay kod si Jehova. Abautismoan ak ed Blackpool, England nen 1943, nen samploy taon ko.

NANLINGKOR AK ED SI JEHOVA

Manlapu lad saman, regular kami la nen nanay ya manpupulong. Pian nipasabi so mensahe na Biblia, manguusar kami na ponograpo. Angkakabaleg tan manga 4.5 kilo iratan. Imadyin mo pa, anta melmelag ak ni et ontan kabelat so awit ko!

Nen 14 ko, labay ko lay manpayunir. Imbaga nen nanay ya mitongtong ak nid manangasikaso na sirkito. Say kuan balet na manangasikaso et mas maong no manaral ak ni trabahon makasuportad pampayunir ko. Kanian ontan so ginawak. Kayari duay taon ya impantrabahok, tinepetan koy sananey ya manangasikaso na sirkito nipaakar ed pampayunir ko. Say kuan to, “Sige, ayos ’tan!”

Kanian nen Abril 1949, impakerew tan inlako mi nen nanay iray gamit mid rerentaan min abung tan inmalis kamid Middleton, ya asingger ed Manchester, tan ditan kami ginmapon nampayunir. Kayari apat bulan, nampili ak na brother a nakaibak ya manpayunir. In-suggest na branch office ya onalis kami ed balon kongregasyon diad Irlam. Si nanay et nampayunir ed sananey ya kongregasyon kaibay sakey a sister.

Anggano 17 ko ni labat ed saman, siak tan samay partner ko so niyasain ya mangidaulo ed saray aral ta dagdaiset ni ray kualipikadon brother ed saman ya balon kongregasyon. Ag-abayag et inyalis da ak ed Buxton Congregation ya dagdaiset so publisher tan mankaukolan na tulong. Parad siak, saraman ya asainmin et panangipasal parad saray onsublay ya asainmin ko.

Nen 1951, nan-aplay ak ya manaral ed Watchtower Bible School of Gilead. Balet, nen Disyembre 1952 et impanreport ak na gobierno pian mansundalo. Kinmerew ak na exemption ta sakey ak ya full-time minister, balet ag-itan inawat na korte tan asentensiaan ak ya napriso na anem bulan. Legan ya akapriso ak, naawat koy imbitasyon parad koma 22 ya klase ed Gilead. Kanian nen Hulyo 1953, linmugan ak ed barkon Georgic ya paarap ed New York.

Kasabik diman, akaatendi ak ed 1953 New World Society Assembly. Kayari to, nan-tren ak paonlad South Lansing, New York, a ditan so kawalaan na eskuelaan. Lapud kakkapaway kod prisoan, anggapoy kuartak. Nen linmugan ak ed bus ya paonlad South Lansing, binmayes ak ed sakey ya pasahero na 25-cent ya pasahek.

ASAINMIN KOD ARUM YA BANSA

Baleg so nitulong na impanaral kod Gilead School pian ‘magmaliw ak ya amin a bengatla ed amin a klase na totoo’ diad panmisionerok. (1 Cor. 9:22) Talora kamin imbaki ed Pilipinas—si Paul Bruun, Raymond Leach, tan siak. Nanalagar kami na pigaran bulan parad visa mi; insan kami linmugan ed barko ya dinmalan ed Rotterdam, Mediterranean Sea, Suez Canal, Indian Ocean, Malaysia, tan Hong Kong—47 agew kamid dayat! Akasabi kamin siansia ed Manila nen Nobyembre 19, 1954.

Kaukolan mi man-adjust ed balon totoo, balon bansa, tan balon lenguahe. Balet, diad unaan et inyasain kamin talo ed kongregasyon diad Quezon City ya dakdakel so mansasalita na English. Kanian anem bulan mi la et dagdaiset ni amta min Tagalog. Pero, akatulong so sinmublay ya asainmin mi.

Sakey ya agew, nen Mayo 1955, kasabi min nampulong nen Brother Leach, wala ray asabian min sulat ed kuarto mi. Naamtaan min niyasain kami bilang manangasikaso na sirkito. Mantaon ak ni labat na 22 ed saman, balet akatulong iman ya asainmin ko pian lalon naaralan koy ‘magmaliw ya amin a bengatla ed amin a klase na totoo.’

Singa bilang, say sankaunaan ya paliwawak bilang manangasikaso na sirkito et diad maawang ya arapan na sakey ya gareta. Naamtaan ko lanlamang ya diad Pilipinas nensaman, no imbagam ya publikon paliwawa et talagan diad publikon lugar! Diad imbisitak ed saray nanduruman kongregasyon na sirkito, nampaliwawa ak ed saray plaza, tindaan, arap na munisipyo, basketbolan, parke, tan mabetbet et diad karsada. Aminsan, nen wala ak ed San Pablo City, agaylay kasil na uran. Agak makapanpaliwawa ed tindaan, kanian imbagak ed saray responsablin brother ya dia lad Kingdom Hall. Kayari na paliwawak, tinepet da no nayarin ireport ya publikon pantitipon ta aliwan diad publikon lugar so akagawaan to!

Naynay ya diad abung na agagi so pampupundoan ko. Anggano simpli labat so abung da, malinis balet. Say lanang ya dukolan ko et ikamen ya imbilkag ed datal. Kaslakan ya diad paway so panag-amesan, kanian inaral koy manames ya agmakaopendid arum. Onlulugan ak ed jeep tan bus, tan no arum et manbaloto ak paonlad saray isla. Diad interon bilay ko et agko asali so awalaan na kotse.

Baleg so nitulong na panagpulong tan panagbisita ed saray kongregasyon pian naaralan koy Tagalog. Agak pormal ya nanaral na lenguahe, balet akaaral ak diad idedengel kod saray agagi diad panagpulong tan no aral. Tinulongan ak na saray agagi, tan pisalsalamatan koy anos tan prangkan komento ra.

Legan ya onlalabas so panaon, kaukolan ko ni man-adjust ed saray balon asainmin. Nen 1956 et binmisitay Brother Nathan Knorr, tan niyasain ak ed public relations diad national convention. Anggapo ni eksperiensyak ed saman, kanian maan-anos ak ya imbangat na arum. Anggapo ni sakey taon, wala lamet so sananey ya national convention ya niyuksoy tan binmisitay Brother Frederick Franz a nanlapud world headquarters. Diad panlilingkor ko bilang convention overseer, akaaral ak ed si Brother Franz no panon so mibagay ed saray totoo. Manliket iray agagi nen anengneng day Brother Franz ya akasulong na barong Tagalog nen nampaliwawa.

Kaukolan ko lamet so man-adjust nen niyasain ak bilang manangasikaso na distrito. Diad saman ya panaon, ipapabantay mi so The Happiness of the New World Society. Kaslakan ya diad publikon lugar so pampapabantayan mi, kanian no maminsan et amayamay so insekto. Labalabay dan asinggeran so liwawa na projector tan agla ra makaalis. Kanian medyo mairap ya linisan so projector! Aliwan mainomay ya iyuksoy so pampabantay, balet makapalikliket ya nanengneng so reaksion na totoo no nanaamtaan day internasyonal ya organisasyon nen Jehova.

Pinilit na saray Katolikon papari iray arum ya opisyal na gobierno ya agda tayo ikdan na permit ya man-asemblea. Odino batingtingen da ray kampana na simbaan ya asingger ed pana-asembleyaan pian agnarengel na totoo so paliwawa. Balet, siansian inmaligwas so kimey, tan dakel ya totoo ed saraman ya lugar so manlilingkor la natan ed si Jehova.

PAN-ADJUST ED ARUM NIN ASAINMIN

Nen 1959, akaawat ak na sulat ya mangibabagan manlingkor ak ed branch office. Kanian mas dinmakel so eksperiensyak. Ag-abayag, nibaki ak ya man-zone visit ed arum ya bansa. Diad sakey ya impanbiahek, lalok ya akabat si Janet Dumond, sakey ya misionera ed Thailand. Nansulatan kami tan agnambayag et nankasal kami. Malikeliket kami ed 51 taon lan saniban panlilingkor mi bilang sanasawa.

Ami-amin et abisitak iray agagi ed 33 ya bansa. Talagan misalsalamat ak ta akatulong iramay asainmin ko nensaman pian napibagayan ko ray nanduruman klase na totoo! Diad saratan ya imbisitak et mas linmaknab so panmoriak tan mas anengneng ko ya inaro nen Jehova so amin a klase na totoo.—Gawa 10:34, 35.

SIANSIA NIN MANA-ADJUST

Talagan panliliketan koy manlingkor a kaiba iray agagid Pilipinas! Say bilang na manangipalapag et maminsamplo lan mas dakel no ikomparad samay nen kakkasabik dia. Manlilingkor kami ni nen Janet diad Philippines branch office ed Quezon City. Anggano masulok ya 60 taon ko lad Pilipinas, kaukolan ya akaparaan ak nin siansia ya man-adjust no antoy kerewen nen Jehova. Lapud saray agano nin pananguman ed organisasyon, kaukolan ya mabulos kamin man-adjust ed panaglingkor mid Dios tan ed saray agagi.

Mabulos min inawat so amin ya panlabayan nen Jehova, kanian nibaga min maliket tan kontento kamid bilay mi. Nansagpotan mi so man-adjust tan impapuson manlingkor ed saray agagi. Talagan determinado kamin gawaey linawa nen Jehova tan ‘magmaliw ya amin a bengatla ed amin a klase na totoo.’