Panon Ak ya Onggapo?

Antoy gawaen mo pian na-enjoy moy manbasa na Biblia tan minabang kan maong? Nia ray limaran suhestion ya akatulong ed dakel.

Manpili na dugan lugar. Mananap na lugar ya mareen. Ekalen iray nayarin makadisturbo pian makapampokus ka. Mas maong no wala kad maliwawa tan preskon lugar pian minabang kan maong ed pambabasam.

Dapat walaan ka na dugan panagnonot. Lapud say Biblia et nanlapud Ama tayod tawen, minabang kan maong no singa ka ugaw ya labalabay toy manpabangat ed maaron ateng to. No wala lay sarilim ya opinyon nipaakar ed Biblia, ekal mo ni itan ed isip mo pian nibangat ka na Dios.—Salmo 25:4.

Manpikasi antis ya manbasa. Saray walad Biblia et kanonotan na Dios, kanian kaukolan tayoy tulong to pian natalosan itan. Ibabaga na Dios ya mangiter na “masanton espiritu ed saramay onkekerew ed sikato.” (Lucas 11:13) Satan ya masanton espiritu so ontulong ed sika ya natalosan so kanonotan na Dios. Diad ilalabas na panaon, lukasan na satan so nonot mo pian natalosan mo “anggan saray aralem a bengatlan nipaakar ed Dios.”—1 Corinto 2:10.

Talosan moy babasaen mo. Aglabat basta manbabasa pian nasumpal mo itan. Nonot mo no antoy babasaen mo. Tepetan moy sarilim na singa onia ran tepet: ‘Anto ray anengneng kon ugali na sayan karakter ya babasaen ko? Panon kon iyaplika iya ed bilay ko?’

Manplano na gawaen mo. Pian nagunggonaan kad pambabasam na Biblia, iplanom la no antoy labay mon naamtaan ya talagan makatulong ed bilay mo. Singa bilang, onia ray nayarin nonoten mon gawaen: ‘Labay kon mas nakabat so Dios.’ ‘Labay koy magmaliw ya mas maong ya too tan mas maong ya asawa.’ Insan manpili na saray basaen mo ya makatulong pian nagawaan mo iraya.a

Makatulong irayan lima pian nigapom so pambasa. Balet panon mon mas na-enjoy so pambasam? Wala ray suhestion diad onsublay ya artikulo.