Sarag Moy Mansiansian Mapaabeba Anggano Nasusubok

1-3. Antoy ag-agawaan na propetan nanlapud Juda, tan antoy resulta? (Nengnengen so litratod gapo na artikulo.)

AMINSAN, legan na uley nen Arin Jeroboam, angibaki si Jehova na propeta ya nanlapud Juda pian pasakbayan iyan apostatan ari na Israel. Impasabi na mapaabeban propeta so amin ya mensahe nen Jehova, tan sikatoy prinotektaan To pian agnapatey nen Jeroboam.—1 Ara. 13:1-10.

² Nen pasempet la imay propeta, agto inilaloan ya naabet toy sakey a masiken ya nanlapud Bethel. Imbaga na masiken ya sikatoy sakey ya propeta nen Jehova. Pinalikdo toy mas ugaw ya propeta pian agto natulok so malinew ya instruksion nen Jehova ya sikatoy ‘agmangan na tinapay odino oninum na danum ed Israel’ tan ‘ag-ompawil ed samay dinalan to.’ Ag-aliketan si Jehova ed propeta to. Kanian nen pasempet la, sikatoy sinabat tan pinatey na leon.—1 Ara. 13:11-24.

³ Akin et nagmaliw ya mapalakbat so datin mapaabeban propeta tan apalikdo na masiken ya mila ed sikato? Anggapoy ibabaga na Biblia. Balet posiblin alingwanan to ya kaukolan toy ‘mapaabeban manakar a kaibay Dios.’ (Basaen so Miqueas 6:8.) Diad Biblia, say kabaliksan na panakar a kaibay Jehova et panmatalek ed sikato, pansuporta ed inkasoberano to, tan itulok ed panangigiya to. Say mapaabeban too et sankanonot ton sarag ton konsultaen tan nepeg ya naynay ton konsultaen so maaro tan makapanyarin-amin ya Ama. Sarag komon na samay propeta so mantepet ed si Jehova tan linewen iray instruksion To, balet anggapoy nabasad Biblia ya ginawa to itan. No maminsan, wala met iray mairap ya dedesisyonan, tan nayarin aliwan malinew no antoy nepeg tayon gawaen. Maabig no mapaabeba tayon kerewen so panangigiya nen Jehova pian napaliisan tayoy makagawa na ambelat ya lingo.

4. Antoy aralen tayod sayan artikulo?

⁴ Diad apalabas ya artikulo, naaralan tayo no akin ya importante nin siansia ed saray Kristiano so inkamapaabeba tan no antoy labay ya ibaga na satan. Balet, anto ray situasyon ya nayarin nasubok so inkamapaabeba tayo? Tan panon tayon napaaligwas iyan balibalin kualidad pian mansiansia tayon mapaabeba anggano nasusubok tayo? Pian naebatan iraya, aralen tayoy taloran situasyon ya nayarin nasubok so inkamapaabeba tayo, tan amtaen tayo no panon so dugan ikiwas ed kada situasyon.​—Pro. 11:2.

NO MANGUMAN SO SIRKUMSTANSYA TAYO

5, 6. Panon ya impanengneng nen Barzilai so inkamapaabeba?

⁵ Nayarin nasubok so inkamapaabeba tayo no manguman so sirkumstansya o asainmin tayo. Nen ipipila nen David so 80 taon lan si Barzilai pian manayam ed palasyo, seguradon apagalangan si Barzilai. No awaten toy imbitasyon nen David, naynay ton nakaiba so ari. Balet agto itan inawat. Akin? Lapud masiken la, imbaga tod si David ya agto labay so magmaliw ya pabelat ed ari. Kanian inrekomenda nen Barzilai ed si David si Kimham, a posiblin sakey ed saray anak to.—2 Sam. 19:31-37.

⁶ Akatulong ed si Barzilai so inkamapaabeba pian makapanggaway makatunongan ya desisyon. Agto inawat so imbitasyon nen David aliwan lapud agto labay so nawalaay responsabilidad odino labay to lay manrelaks ta masiken la. Imbes, binidbir tan inawat to so impanguman na sirkumstansya to pati saray limitasyon to. Agto labay ya awaten so sakey ya responsabilidad no amta ton agto nasarag. (Basaen so Galacia 6:4, 5.) No say sankanonot tayo et posisyon, inkaprominente, odino dayew, pansengegan labat itan na inkamapaatagey tan kompetisyon ya mansumpal ed pakadismaya. (Gal. 5:26) Balet no mapaabeba tayo, say pampokusan tayo et say pankimey a saniiba parad kigloriaan na Dios tan panulong ed arum.—1 Cor. 10:31.

7, 8. Panon a makatulong so inkamapaabeba pian agtayo manmatalek ed sarili tayo?

⁷ No naaruman so responsabilidad tayo, naaruman met so autoridad tayo tan nayarin lapud satan et nasubok so inkamapaabeba tayo. Nen abalitaan nen Nehemias so mairap ya situasyon na saray walad Jerusalem, sikatoy impapuson nampikasi ed si Jehova. (Neh. 1:4, 11) Inebatan nen Jehova so pikakasi to, tan sikatoy tinuro nen Arin Artaxerxes ya magmaliw a gobernador ed satan ya lugar. Balet anggano atagey so posisyon, mayaman, tan walay autoridad nen Nehemias, agnanmatalek ed saray eksperiensya tan abilidad to. Sikatoy nanakar a kaiba na Dios. Tuloytuloy ton kinerew so panangigiya nen Jehova diad impanbasa tod Ganggan na Dios. (Neh. 8:1, 8, 9) Agpinabelatan nen Nehemias iray totoo; imbes, inusar toy biskeg tan kuarta to pian panlingkoray arum.—Neh. 5:14-19.

⁸ Nanengneng ed alimbawa nen Nehemias no panon a makatulong so inkamapaabeba pian agtayo manmatalek ed sarili tayo no manguman so asainmin tayo o makaawat tayoy kaaruman iran responsabilidad. Alimbawa, no say sakey ya elder et manmatalek ed sarili ton eksperiensya, ompan agla manpikasi ed si Jehova antis ton asikasoen iray kimey tod kongregasyon. Ompan say arum et mandesisyon ni insan da ipikasi ya bendisyonan nen Jehova so desisyon da. Balet kasin inkamapaabeba itan? No mapaabeba so sakey ya too, sankanonot ton naynay no antoy kipapasen tod arap na Dios tan say betang tod organisasyon na Dios. Aliwan saray abilidad tayo so importante. Paliisan tayoy manmatalek ed sarili tayo lalo la no kabisado tayo la ray situasyon o problema. (Basaen so Proverbio 3:5, 6.) Lapud kabiangan itayo na sankaabungan na Dios, sankanonot tayo ya gagawaen tayo ray responsabilidad tayo bilang membro na pamilya odino kongregasyon, aliwan pian nawalaay rangko o atagey a posisyon.—1 Tim. 3:15.

NO WALAY MANKRITIKO ODINO MANGIRAYEW

9, 10. Panon itayon natulongan na inkamapaabeba no wala ray mankritiko ed sikatayo?

⁹ Ompan agtayo nakontrol so liknaan tayo no walay mankritiko ed sikatayo. Naynay ya onaakis si Hana lapud agmanundan panagbalaw na karibal ton si Penina. Inad-aro nen Elkana si Hana, balet ta agmakaanak. Aminsan, nen manpipikasi si Hana ed tabernakulo, say abaloan na Atagey ya Saserdote ya si Eli et abuek. Kaskasian! Balet anggano ontan so impantrato dad sikato, mapaabebay Hana kanian kinontrol toy liknaan to tan marespetoy ebat tod si Eli. Akasulat ed Biblia so balibalin pikakasi to. Imbalikas toy pananisia, panangidayew, tan pisasalamat tod si Jehova.—1 Sam. 1:5-7, 12-16; 2:1-10.

¹⁰ Natulongan itayo met na inkamapaabeba pian ‘nitultuloy tayon daegen so mauges diad panamegley na maong.’ (Roma 12:21) Mauges so mundo nen Satanas kanian nepeg tayon kontrolen so liknaan tayo pian ag-itayo onsyodot ed saray mauges a totoo. (Sal. 37:1) No walay onlesan problema tayod agagi, ompan mas nasakitan tayo. Balet say mapaabeban too et aligen toy Jesus. Ibabaga na Biblia: “Sanen sikatoy iinsultoen da, agto ra met ininsulto . . . , noagta inmatalek toy sarili to ed samay matunong ya ukom.” (1 Ped. 2:23) Amta nen Jesus ya si Jehova so manepeg ya ombales. (Roma 12:19) Papasesegen met iray Kristiano ya magmaliw iran mapaabeba tan ‘agda babalesen na mauges so mauges.’—1 Ped. 3:8, 9.

11, 12. (a) Panon itayon natulongan na inkamapaabeba anggano naynay itayon kokomendaan o irarayew? (b) Panon tayon nipatnag so inkamapaabeba diad panangawes, panag-ayos, tan ugali tayo?

¹¹ Nasubok met so inkamapaabeba tayo no naynay itayon kokomendaan o irarayew na arum. Imanoey makapadinayew ya reaksion nen Ester ed nantutumbokan ya pananguman ed bilay to. Magangganan maong tan dinmalan ed sakey taon ya proseso na pampaganggana. Inagew-agew ton kaulop so dakel ya mamarikit ya nanlalapud interon Empiryo na Persia ya mankokompetensya pian naala day atension na ari. Balet nansiansian marespeto tan mareen si Ester. Agnagmaliw ya mapasirayew odino paimportante anggano nen pinili la na ari ya magmaliw a reyna to.—Est. 2:9, 12, 15, 17.

¹² Makatulong so inkamapaabeba pian say panangawes, panag-ayos, tan kakikiwas tayo et naynay ya desente tan marespeto. Amta tayon ag-itayo nagustoan na arum no manpasirayew odino no alaen tayoy atension da. Mas nagustoan da tayo no “mareen tan maulimek” itayo. (Basaen so 1 Pedro 3:3, 4; Jer. 9:23, 24) No walad puso tayo so inkamapasirayew, ompaway lanlamang itan ed kiwas tayo. Singa bilang, ompan ipalikas tayon wala ray espisyal ya pribilehyo tayo, wala ray amta tayon impormasyon ya ag-amta na arum, odino wala ray kaaro tayon walaan na responsabilidad ed organisasyon. Odino ompan no walay ipapaliwawa tayo et singa sikatayo labat so nanlapuan na amin ya ideya, anta diad tua et piga-pigaray nantutulongan ed satan. Balibalin alimbawa lamet si Jesus ed saya. Maslak ed saray imbaga to et inala odino imbase tod Hebreon Kasulatan. Ontan so mapaabeban ginawa to pian naamtaan na saray ondedengel ya nanlapud si Jehova iray ibabangat to tan aliwan sarili ton karunongan o kakabatan.—Juan 8:28.

NO AGTAYO KONTROLADOY NAGAWA

13, 14. Panon itayon natulongan na inkamapaabeba ya makapanggaway maabig iran desisyon?

¹³ Say sakey nin pakasubokan na inkamapaabeba tayo et no wala ray dedesisyonan. Singa bilang, legan ya walad Cesarea si apostol Pablo, imbaga nen propeta Agabo ya no ituloy toy onlad Jerusalem, sikatoy arestoen da. Ompan pateyen da ni ingen. Lapud natatakot iray agagi, akikasi ran agla onla si Pablo, balet agda apigilan. Aliwan lapud sobray talek tod sarili to odino anggapoy tatakotan to, noagta sikatoy nanmatalek ed si Jehova tan akaparaan ya manumpal ed asainmin to, anggan iner so pangusaran ed sikato. Nen naamtaan day rason to, mapaabeban nirespeto na agagi so desisyon nen Pablo ya onlad Jerusalem.—Gawa 21:10-14.

¹⁴ Natulongan itayo met na inkamapaabeba pian makapanggawa tayo na maabig iran desisyon anggano agtayo sigpot ya amta odino kontroladoy pansumpalan. Singa bilang, no onloob tayod full-time ya panaglingkor, panon to no mansakit tayo? Panon to no kaukolan na maedad lan atateng tayo so tulong tayo? Panon tayon naasikasoy sarili tayo no matatken tayo la? Anggano panoy pampikasi o pan-research tayo, anggapoy naromog tayon eksakton ebat ed saratan. (Ecl. 8:16, 17) Balet no walay talek tayod si Jehova, agtayo labat bidbiren iray limitasyon tayo noagta awaten tayo met iratan. Kanian kayari tayon man-research, mantepet ed arum, tan manpikasi, kaukolan tayon tumboken so panangigiya na espirituy Dios. (Basaen so Eclesiastes 11:4-6.) Diad ontan et iikdan tayoy pankanawnawa si Jehova ya bendisyonan itayo, odino maaro to tayon igiya ed dugan direksion.—Pro. 16:3, 9.

PAALIGWASEY INKAMAPAABEBA

15. Akin ya makatulong so pandalepdep ed si Jehova pian mansiansia tayon mapaabeba?

¹⁵ Lapud maabig so mansiansian mapaabeba, panon tayon napaaligwas itan? Pantongtongan tayoy apatiran paraan. Unona, magmaliw tayon mas mapaabeba tan mapasakop ed si Jehova no dalepdepen tan apresyaen tayoy makapadinayew iran kualidad to tan atagtagey ya autoridad to. (Isa. 8:13) Tandaan ya manaakar tayon kaiba na Makapanyarin-amin a Dios, aliwan anghel o too. No naynay tayon isipen itan, napakiwas itayon ‘manpaabeba ed silong na mabiskeg a lima na Dios.’—1 Ped. 5:6.

16. Akin ya makatulong so pandalepdep ed panangaro na Dios pian napakiwas tayon manpaabeba?

¹⁶ Komadua, makatulong so pandalepdep ed panangaro nen Jehova pian napaaligwas tayoy inkamapaabeba. Insulat nen apostol Pablo ya “mas papagalangan” nen Jehova iray kabiangan na laman tayo ya iisipen tayon daiset so kagalangan da. (1 Cor. 12:23, 24) Mipadpara, iyaansakit nen Jehova so kada sakey ed sikatayo anggano wala ray limitasyon tayo. Agto tayo ikokompara ed arum tan inaro to tayo nin siansia anggano nalingo tayo. Lapud panangaro nen Jehova, agtayo napapagaan anggano antoy betang tayo ed sankaabungan to.

17. Antoy epektod sikatayo no say imanoen tayo et say kaabigan na arum?

¹⁷ Komatlo, mas napabli tayoy betang tayod organisasyon no aligen tayoy Jehova ya say iimanoen to et say kaabigan na arum. Imbes ya man-ambisyon tayon magmaliw ya prominente odino naynay tayon diktaan so arum, mas maabig no mapaabeba tayon kerewen so simbawa na arum tan awaten so suhestion da. (Pro. 13:10) Miliket tayod sikara no akaawat iray pribilehyo. Tan idayew tayoy Jehova legan tayon nanenengneng ya bebendisyonan toy ‘amin ya agagi tayo ed interon mundo.’—1 Ped. 5:9.

18. Panon tayon nipasal so konsiensia tayo pian magmaliw tayon mas mapaabeba?

¹⁸ Komapat, magmaliw tayon mas mapaabeba no ipasal tayoy konsiensia tayo base ed saray prinsipyo na Biblia. Onaligwas so pakatebek tayo no mapaabeba tayon aralen tan aligen so panmoria nen Jehova. Diad panamegley na regular a panagaral, panagpikasi, tan pangiyaplika ed saray nanaaralan tayo, mas nipasal tayoy konsiensia tayo. (1 Tim. 1:5) Naaralan tayon iyunay pankaabigan na arum. No ontan so gawaen tayo, impromisa nen Jehova ya “sumpalen toy pangipapasal tod sikatayo,” tan tulongan to tayon magmaliw ya mas mapaabeba tan napaaligwas iray arum nin balibalin kualidad.—1 Ped. 5:10.

19. Antoy makatulong pian mansiansia tayon mapaabeba?

¹⁹ Anggano aminsan labat a nagmaliw ya mapalakbat imay propeta ya nanlapud Juda, abalang toy bilay to tan say maong ya relasyon tod Dios. Balet, posiblin makapansiansia tayon mapaabeba anggano wala ray subok. Agawaan la itan na saray nanmatoor nensaman tan saray mapaabeban agagi tayo natan. No kapigan mas ombabayag so panaakar tayon kaibay Jehova, lalo itayon magmamaliw ya mas mapaabeba. (Pro. 8:13) Anggan antoy betang tayo natan, say panakar ya kaiba si Jehova et makapaliket tan agnaparaan a pribilehyo. Pablim itan ya kagalangan, tan gawam so anggaay nayarian mo ya mapaabeban manakar a kaiba si Jehova diad andi-angga.