Siopay Panlalapuan na Paniirap Tayo?

No say paniirap tayo et agmanlalapud Dios, akin et walay graben eras, pinasyan irap na bilay, brutal ya panlalaban, makapatey iran sakit, tan kalamidad? Ipapaamta na Salita na Dios, say Biblia, so taloran manunan panlalapuan na paniirap na saray totoo:

1. Inkamakasarili, Inkaagum, tan Pambusol. “Say too et uuleyan toy kapara ton too diad pankaugsan to.” (Eclesiastes 8:9) Dakel so maniirap lapud biktima ira na totoon aliwan perpekto, makasarili, odino maruksa.

2. Panaon tan Saray Ag-iilaloan a Nagawa. Kaslakan ya maniirap iray totoo lapud “say panaon tan saray ag-iilaloan a nagawa et onsasabid sikaran amin.” (Eclesiastes 9:11) Labay ton ibaga, saray totoo et nibanbanan walad lugar ya walay agawan mauges odino aksidente, odino ag-ira nanalwar odino alingo ra.

3. Say Mauges ya Manuley ed Mundo. Malinew ya ipapaamta na Biblia so manunan panlalapuan na paniirap na totoo. Inkuan to: “Say interon mundo et walad pakayari na samay mauges.” (1 Juan 5:19) Say tutukoyen ya “samay mauges” et si Satanas a Diablo, makapanyarin espiritun pinalsa ya datin anghel balet “agnansiansia ed katuaan.” (Juan 8:44) Wala ray arum ya espiritun pinalsa ya kinmampi ed si Satanas tan nanrebelde rad Dios pian nagawaan day makasarilin pilalek da, kanian pinagmaliw day sarili dan demonyo. (Genesis 6:1-5) Manlapu lad impanrebelde da, si Satanas tan saray demonyo to et uusaren day mabiskeg tan maruksan impluensya ra ed mundo. Mas sankapatnagan itan diad panaon tayo. Natan et agaylay pasnok na Diablo ya “mangibabalang ed interon mundo” kanian ‘pakaskasi lay dalin.’ (Apocalipsis 12:9, 12) Talagan brutal ya diktador si Satanas. Panliliketan toy paniirap na totoo. Si Satanas—aliwan say Dios—so rason no akin ya maniirap iray totoo.

ISIPEN PA: Sakey ya andiay panangasi tan brutal ya managgaway mauges labat so panlapuan na paniirap na inosentin totoo. Kabaliktaran itan ed ibabaga na Biblia ya: “Say Dios et aro.” (1 Juan 4:8) Lapud maar-aro, “agbalot manggaway mauges so tuan Dios, agbalot manggaway aliwa so Makapanyarin-amin!”—Job 34:10.

Pero natural met labat ya isipen mo, ‘Anggad kapigan ya abuloyan na Makapanyarin-amin a Dios so maruksan uley nen Satanas?’ Singa naamtaan tayo la, kabusol na Dios so kaugsan tan sikatoy nasasakitan a maong ed paniirap tayo. Niarum ni, oniay ipapaseseg na Salita to: “Ipaawit yod sikato so amin a kapagaan yo, lapud iyaansakit to kayo.” (1 Pedro 5:7) Inaro itayo na Dios tan walay pakapanyari ton ekalen so amin ya paniirap tan ag-inkahustisya, a singa ipaliwawa ed onsublay ya artikulo.a