Amin a Bengatla et Posible ed si Jehova

MANTRATRABAHO MANLAPUD PALBANGON ANGGAD MANSIRUNGET

Niyanak ak nen 1937 diad kolkhoz, odino uma ya dadalusan na kooperatiba, ya asingger ed Tokmok, Kyrgyzstan. Say lahi na pamilya mi et Kyrgyz, tan say lenguahe mi et Kyrgyz. Dumaralos iray ateng ko, tan mantratrabaho irad kolkhoz manlapud palbangon anggad mansirunget. Saray miuupan trabahador et walay regular a suplay na naakan da, balet say kuartan sueldo ra et iiter labat ya maminsan ed sakey taon. Nairapan si Nanay ya mangasikaso ed siak tan ed agik ya bii. Limay taon ak labat ya nan-eskuela, insan nantrabaho ak la ed kolkhoz.

Mair-irap so bilay diad lugar mi, tan makapakesaw so trabaho ya parad pambilay mi. Bilang kabataan, agko iisipen no antoy gagala na bilay odino no antoy nagawad arapen. Agkon balot naisip ya saray balibalin katuaan nipaakar ed si Jehova a Dios tan say gagala to so makapanguman ed bilay ko. Makapadinayew no panon ya akasabi ed Kyrgyzstan itan ya mensahe. Ginmapo itan ed lugar ya binalegan ko diad northern Kyrgyzstan.

SARAY DATIN INAWIT ED ARUM A BANSA ET IMPAAMTA DAY KATUAAN DIAD KYRGYZSTAN

Nen dekada 1950, tinmubo so katuaan nipaakar ed si Jehova a Dios diad Kyrgyzstan. Balet kaukolan ya daegen na katuaan so ideolohiya na saray komunista. Akin? Ta nensaman et kabiangan na Union of Soviet Socialist Republics (USSR) so Kyrgyzstan. Diad interon USSR, saray Tasi nen Jehova et neutral ed politika. (Juan 18:36) Kanian, apasegsegang ira ta impasen iran kalaban na gobiernon Komunista. Balet anggapoy ideolohiya ya makapatunda ed isabi na Salita na Dios diad puso na saray manaanap na katuaan. Kanian say sakey ed saray sankaimportantian ya naaralan kod bilay, “amin a bengatla et posible” ed si Jehova.​—Mar. 10:27.

Say panamasegsegang ed saray Tasi nen Jehova et nanresulta laingen ed indakel da diad Kyrgyzstan. Panon? Kaiba ed USSR so rehyon na Siberia, a ditan aawiten iray kalaban na gobierno. Nen imbulos iraya, dakel so linma ed Kyrgyzstan, tan arum ed sikara et innabang da so katuaan. Sakey ed sikara si Emil Yantzen, ya inyanak ed Kyrgyzstan nen 1919. Si Emil et imbakin mankimey ed kampo tan akabat to ray Tasi diman. Inawat toy katuaan tan pinmawil ed bansa to nen 1956. Sikatoy nanayam diad asingger ed Sokuluk, diad lugar ya panaayaman ko. Diad Sokuluk aporma so unaan ya kongregasyon ed Kyrgyzstan nen 1958.

Kayari na sakey taon, si Victor Vinter et linmad Sokuluk. Sayan matoor a brother et aminpigan apairap. Amiduan asentensiaan ya napriso na taloy taon lapud nansiansian neutral, insan apriso lamet na samploy taon, tan inawit ed arum a bansa diad loob na limay taon. Balet ag-apatunda na panamasegsegang so inlaknab na dugan panagdayew.

AKASABI ED BALEY MI SO KATUAAN

Nen 1963, manga 160 so Tasi diad Kyrgyzstan tan dakel ed sikara et nanlapud Germany, Ukraine, tan Russia. Kaiba ed sikara si Eduard Varter ya abautismoan ed Germany nen 1924. Nen dekada 1940, sikatoy inyakar na saray Nazi ed panamairapan a kampo, tan kayari pigaran taon, sikatoy inawit na saray Komunista ed USSR diad arum a bansa. Nen 1961, sayan matoor ya brother et inmalis ed Kant, ya asingger ed baley mi.

Si Elizabeth Fot, sakey ya matoor ya lingkor nen Jehova, et nanayam met ed Kant. Say anapan to et managdait na kawes. Lapud marundunong ya mandait, saray manpaparait ed sikato et propesyonal a singa saray doktor tan mamaestra. Sakey ed saray kustomer to si Aksamai Sultanalieva, ya asawa na sakey ya abogado na gobierno. Si Aksamai et oonlad si Elizabeth pian manparait balet dakel so itetepet to nipaakar ed gagala na bilay tan kipapasen na saray inatey. Inusar nen Elizabeth so Biblia pian ebatan iray tepet to. Si Aksamai et nagmaliw ya maseseg ya managpulong na maong a balita.

Diad saman a panaon, si Nikolai Chimpoesh, ya tagad Moldova, et aturo bilang manangasikaso na sirkito tan nansiansia ed satan ya asainmin to ed ngalngali 30 taon. Sikatoy aglabat ombibisita ed saray kongregasyon, noagta oorganisaen to met so pamawalay kopya tan pangibunog ed saray literatura tayo. Naamtaan na saray autoridad so gagawaen to. Kanian oniay imbilin ed sikato nen Eduard Varter: “No tepetan ka na saray autoridad, ipatuam ya say pangaalaan tayo ray literatura et diad headquarters ed Brooklyn. Mimataan ka ed saray KGB. Agka dapat ontatakot.”​—Mat. 10:19.

Kayari na sayan impantongtong da, impatawag si Nikolai diad headquarters na KGB diad Kant. Imbaga to no antoy sinmublay ya agawa: “Tinepetan ak na membro na KGB no iner so pangaalaan tayo na saray literatura tayo. Imbagak ed sikato ya manlalapud Brooklyn. Agto la amtay ibaga to. Pinaalis to ak la tan agto ak lan balot impatawag.” Saray ontan ya makpel a Tasi et nantultuloy ya maalwar a nampulong ed maong a balita diad baley mi ed northern Kyrgyzstan. Nen naamtaan na pamilya mi so mabmablin katuaan nipaakar ed si Jehova nen dekada 1980, say asawak ya si Mairambubu so unaan ya akaamta.

ATEBEK A TAMPOL NEN ASAWAK SO KATUAAN

Si Mairambubu et tagad Naryn, sakey a rehyon ed Kyrgyzstan. Sakey agew nen Agosto 1974, sikatoy pinmasyar ed abung na agik ya bii, tan diman kami akapankabat. Agustoan kon tampol si Mairambubu, tan nankasal kami ed saman ya mismon agew.

Nen Enero 1981, legan ya akalugan ed bus si Mairambubu paonlad tindaan, nadngel to so tongtongan ya abitlad gapo. Labay nen asawak so makaaral ni, kanian tinepet toy ngaran tan address na samay bii. Imbaga ton Apun so ngaran to, balet maalwar ta sebel so kimey na saray Tasi anggad nen dekada 1980. Imbes ya iter toy address tod si asawak, inala nen Apun so address mi. Eksayted ya sinmempet si asawak.

“Wala ray balibalin naamtaan ko,” kuan nen Mairambubu. “Walay biin angibaga ya onsabi panaon et anggapo lay ompatey. Tan anggan saray masibeg ya ayep et onamo la.” Pero singa mairap kon panisiaan itan. “Sige, alagaren tayon onla dia pian ipaliwawa to,” so kuan ko.

Kayari taloy bulan, binisita kami nen Apun. Insan aminpigapiga to kami lamet ya binisita, kanian akabat mi arum ed saray unaan ya Tasi ya kapara min Kyrgyz. Impaamta ed sikami na sarayan sister iray makapakelaw a katuaan nipaakar ed si Jehova tan say gagala to parad totoo. Imbangat dad sikami so Biblia panamegley na libron From Paradise Lost to Paradise Regained.a Saksakey so kopya na satan a libro ed lenguahen Tokmok, kanian manu-mano min kinopya itan.

Say sakey ed saray unaan ya naaralan mi et say propesiya diad Genesis 3:15. Sayan propesiya et nasumpal panamegley nen Jesus bilang Mesianikon Ari ya tinuro na Dios. Importante itan a mensahe a nepeg ya naamtaan na amin! Atan so amakiwas ed sikamin mibiang ed panagpulong. (Mat. 24:14) Ag-abayag, inuman na katuaan so bilay mi.

SEBEL IRAY ARAL TAN BAUTISMO

Inimbitaan kami na sakey a brother ed Tokmok ya onatendi ed kasal. Naimano min tampol nen asawak ya duma iray Tasi. Anggapoy alak ed ponsia, tan mauk-uksoy so okasyon. Aliwan singa saray naatendian min bansal, ya saray bisita et mabetbet ya abuek, magulo, tan manaayew.

Akaatendi kami met ed pigaran aral na kongregasyon diad Tokmok. Gagawaen iya diad saray kakiewan, no marakep so tiempo. Amta na saray agagi ya mamanmanan kami na saray pulis, kanian wala ray bantay ya inyasain na saray brother. No panaoy winter, gagawaen iray aral diad sakey ya abung. Aminpigan linma ditan iray pulis tan labay dan amtaen no antoy gagawaen mi. Nen Hulyo 1982, sanen nampabautismo kami nen Mairambubu diad Chüy River, kaukolan mi manalwar. (Mat. 10:16) Sandaraiset ya sinmabi iray agagi tan nantitipon kamid kakiewan. Angansion kami na Kingdom song tan dinmengel na paliwawa parad bautismo.

SINAMBOT MI PANKANAWNAWAN PALAKNABEN SO MINISTERYO MI

Nen 1987, imbaga na sakey a brother ya bisitaen koy sakey ya interesadon manaayam ed baley na Balykchy. Manlapud abung mi, apat oras iman ya biahe panamegley na tren. Kayari na aminpigan impanpulong mid Balykchy, dakel so nalmo min interesado. Pankanawnawa mi iman pian palaknaben so ministeryo mi.

Lanang kamin oonla nen Mairambubu diad Balykchy. Mabetbet ya no weekend et agkami la onsesempet, wala kamid ministeryo, tan mangidadaulo na saray pantitipon. Dakdakel so manaanap na saray publikasyon tayo. Aawiten mi ray publikasyon manlapud Tokmok panamegley na mishok, sako ya uusaren pian nibiahe iray patatas. Kulang so duaran sako ya literatura parad sakey bulan. Anggan diad tren paonla tan papawil ed Balykchy et napupulongan mi ray pasahero.

Nen 1995, aporma so sakey a kongregasyon ed Balykchy​—waloy taon kayari na samay inmunan imbisita mi ditan. Magastos so pigaran taon ya impanbiahe mi manlapud Tokmok paonlad Balykchy. Aliwan malaem so kuarta mi, pero panon min agawaan iratan? Walay brother a regular ya mangiiter na kuarta pian walay gastosen mi. Anengneng nen Jehova so pilalek min palaknaben so ministeryo mi, tan nilukasan to “iray puerta na danum ed tawen” parad sikami. (Mal. 3:10) Talagan amin a bengatla et posible ed si Jehova!

BUSY ED PAMILYA TAN MINISTERYO

Nen 1992, aturo ak bilang sankaunaan ya elder a Kyrgyz diad bansa mi. Diad kongregasyon mid Tokmok, nilukas iray balon paraan na panaglingkor. Dakel ya kabataan a Kyrgyz ya inyaralan mi na Biblia et manaaral ed kolehyo. Sakey ed sarayan kabataan ya inyaralan mi et manlilingkor la natan bilang membro na Branch Committee, tan duara ni ed sikara et espisyal payunir. Tutulongan mi met iray arum ya onaatendi ed saray aral. Diad gapo na dekada 1990, Russian so lenguahen uusaren ed saray publikasyon tan ed saray aral. Balet dinmakel iray onaatendi ed kongregasyon ya mansasalitay Kyrgyz. Kanian iyi-interpret ko itan pian mas natalosan da so katuaan.

Kaukolan mi met ya asikasoen nen Mairambubu so ombabaleg ya pamilya mi. Aawiten mi ray anak mi diad panagpulong tan diad saray aral. Say anak min bii ya si Gulsayra​—ya 12 taon to ni labat ed saman—​et labalabay ton itongtong so nipaakar ed Biblia ed saray ondadalan diad karsada. Labalabay met na saray anak mi so man-memorize na saray teksto. Akatulong iya ed saray anak mi, pati ed saray apo mi, pian aktibo iran mibiang ed saray aktibidad na kongregasyon. Diad 9 ya anak mi tan 11 ya apo mi ya mabilay, 16 so manlilingkor ed si Jehova odino onaatendi ed saray aral kaibay atateng da.

MAKAPADINAYEW IRAN PANANGUMAN

Saray pinablin agagi ya angigapo ed kimey nen Jehova diad lugar mi nen dekada 1950 et seguradon mandinayew no nanengneng da ray pananguman ya naeksperiensya mi. Singa bilang, manlapu nen dekada 1990, bulos kami lan makapanpulong na maong a balita tan makaatendi ed baleg iran pantitipon.

Nen 1991, inmatendi kami nen asawak diad sankaunaan ya kombension ed Alma-Ata, ya kabkabat natan ya Almaty, diad Kazakhstan. Tan nen 1993, diad unonan pankanawnawa, saray agagi ed Kyrgyztan so angorganisa na kombension ed Spartak Stadium ed Bishkek. Antis na kombension, sakey simba ya nilinisan na saray agagi so istadyum. Manbilib so direktor na istadyum kanian impausar to ya libre so pasilidad.

Nen 1994, niyimprinta so sankaunaan iran publikasyon diad lenguahen Kyrgyz. Natan saray literatura et regular lan ipapatalos ed lenguahen Kyrgyz na translation team diad branch office ed Bishkek. Tan nen 1998, say kimey na saray Tasi et legal ya binidbir diad Kyrgyzstan. Dinmakel so bilang na saray manangipalapag, tan masulok la natan ya 5,000. Natan et wala lay 83 ya kongregasyon tan 25 ya grupo ed Chinese, English, Kyrgyz, Russian, Russian Sign Language, Turkish, Uighur, tan Uzbek. Sarayan pinablin agagi ya nanlapud nanduruman bansa et mankakasakey ya manlilingkor ed si Jehova. Ginawa nen Jehova ya posible irayan amin ya makapadinayew a pananguman.

Inuman met nen Jehova so bilay ko. Binmaleg ak ed mairap a pamilya na miuupan trabahador tan limay taon ak labat ya nan-eskuela. Balet tinulongan ak nen Jehova ya manlingkor bilang elder tan ibangat so mablin katuaan ed Biblia ed saray totoon mas atagey so aral da nen say siak. Talagan gagawaen nen Jehova ya posible iray bengatlan imposible. Say mismon eksperiensyak so mamapakiwas ed siak ya matoor ya mantasi nipaakar ed si Jehova, ya diad sikato et “posible so amin a bengatla.”​—Mat. 19:26.