Sikayo Ran Kabataan, Kasin Akapokus Kayo ed Saray Goal Yod Espiritual?

1-3. (a) Anton subok so nipapaarap ed amin ya kabataan, tan antoy angikomparaan ed satan? (Nengnengen so litratod gapo na artikulo.) (b) Antoy makatulong ed saray Kristianon kabataan pian naarap da iyan subok?

IMADYIN mo pan planom so onlad arawin lugar parad importantin okasyon. Pian makasabi ka, kaukolan moy onlugan ed bus tan andukey so biahe. Kasabim ed istasyon na bus, abigla kad karakel na pasahero tan bus. Maong labat ta akaplano lay gawaen mo​—onlugan ed bus ya onlad laen mo. No basta ka labat onlugan ed anggan dinan ya bus, ompan aliwa laingen so naakar mo.

² Saray kabataan natan et nikompara ed saray pasahero. Onaarap irad andukey ya biahe, balet aliwan panamegley na bus, noagta biahe ed bilay. No maminsan, singa agda la amtay gawaen da lapud karakel na napampilian tan desisyonan da. Sikayo ran kabataan, mas mainomay yoy mandesisyon no wala lay plano yod bilay. Balet, iner so plano yon laen?

³ Satan ya tepet et ebatan na sayan artikulo diad pamaseseg ed saray kabataan ya manpokus diad pamaliket da ed si Jehova. Labay ton ibaga, ipila day Jehova diad amin ya aspekto na bilay da—edukasyon, trabaho, responsabilidad ed pamilya, tan arum ni. Kaibad satan so pankimey pian naabet iray goal ed espiritual. Saray kabataan ya mansiasiansian akapokus ed panlilingkor dad si Jehova et seguradon nabendisyonan tan magmaliw ya maliket so bilay da.​—Basaen so Proverbio 16:3.

AKIN ET KAUKOLAN YA WALAY GOAL MOD ESPIRITUAL?

4. Antoy aralen tayo ed sayan artikulo?

⁴ Maabig no wala lay goal mod espiritual legan ya ugaw ka ni. Akin? Amtaen tayoy taloran rason. Ipanengneng na unona tan komaduan rason ya makatulong so pankimey mon abeten iray goal mod espiritual pian onelet so relasyon mod si Jehova. Idanet na komatlon rason no akin ya makagunggona so pakawalaan na goal ed espiritual legan ya ugaw ka ni.

5. Antoy manunan rason no akin ya importantin walaan tayo na saray goal ed espiritual?

⁵ Say manunan rason no akin ya importantin walaan tayo na saray goal ed espiritual et lapud labay tayon ipanengneng so pisasalamat ed panangaro nen Jehova tan ed amin ya ginawa to parad sikatayo. Oniay imbaga na salmista: “Maabig so pisalamat ed sika, O Jehova . . . Ta paliliketen mo ak lapud saray gagawaen mo, O Jehova; oneeyag ak ed liket lapud saray kimey na limam.” (Sal. 92:1, 4) Bilang sakey ya kabataan, nonot moy amin ya inter nen Jehova ed sika​—say bilay mo, say pananisiam, say Biblia, say kongregasyon, tan say balibalin ilalom diad arapen. No iprayuridad mo ray espiritual a bengatla, ipapanengneng mon misasalamat kad Dios ed saratan ya bendisyon, tan lapud satan et onapit ka ed sikato.

6. (a) Panon ya makatulong iray goal tayod espiritual ed relasyon tayod si Jehova? (b) Anto ran goal so nayarim ya gawaen anggano ugaw ka ni?

⁶ Say komaduan rason, no inggapom lan pankimeyan ya abeten iray goal mo, inggapom met lay manggawa na rekord na maabig iran kimey ed pakanengneng nen Jehova. Kanian mas lalo kan onapit ed sikato. Oniay impromisa nen apostol Pablo: “Say Dios et matunong kanian agto lingwanan so gawa yo tan say aro ya impanengneng yo parad ngaran to.” (Heb. 6:10) Sarag moy manggawa na goal anggano ugaw ka ni. Si Christine et mantaon labat na samplora nen ginawa ton goal ya regular a basaen iray istoryay bilay na saray matoor ya Tasi. Diad edad ya 12, ginawa nen Toby ya goal a basaen so interon Biblia antis ya nabautismoan. Si Maxim et mantaon na 11 tan say agi ton si Noemi et samplora nen abautismoan ira. Pareho dan goal so panlingkor ed Bethel. Pian akapokus irad goal da, impeket dad padir na abung da so application parad Bethel. Agta maabig met ya iplanom no anto ran goal so labay mo, insan pankimeyan mon abeten iratan?​—Basaen so Filipos 1:10, 11.

7, 8. (a) Akin ya mas mainomay moy mandesisyon no wala lay goal mo? (b) Akin ya nandesisyon so sakey ya tinedyer ya agla manaral ed unibersidad?

⁷ Say komatlon rason no akin ya importantin nawalaan na goal legan ya ugaw ni et lapud makatulong itan ed panagdesisyon. Kaukolan ya mandesisyon iray kabataan nipaakar ed edukasyon, trabaho, tan arum ni ra. Say panagdesisyon et nikomparad pampili na dugan dalan no wala ka lad nansangaan. Basta antam no iner so laen mo, agka manproblema no dinan so dugan dalan. Ontan met, no antam iray goal mo, mainomay moy manggawa na dugan desisyon. Ibabaga na Proverbio 21:5: “Saray plano na makuli et seguradon ontalona.” Kanian no ugaw ka ni et wala la ray goal mo ed espiritual, maples met so iyaligwas mo. Ontan so naeksperiensya nen Damaris nen kaukolan toy manggawa na importantin desisyon nen tinedyer ni.

⁸ Ataragey so ­grades nen Damaris nen nan-graduate ed haiskul. Sarag to komon ya awaten so ­scholarship pian mangalay abogasya ed sakey ya unibersidad, balet mas pinili toy mantrabaho ed bangko. Akin? “Ugaw ak ni et labalabay ko lay manpayunir. Kanian part-time labat ya trabaho so kaukolan ko. Tua, nayarin baleg so sueldok no akapansumpal ak na kurso ya law, pero mairap koy makalmo na part-time ya trabaho.” Natan et 20 taon lan payunir si Damaris. Kasin duga imay goal tan desisyon to nen tinedyer ni? “Diad bangko ya pantratrabahoan ko, naynay kon nakakatongtong iray abogado. Parehas kami komon na klase trabaho no akapanaral ak na abogasya. Pero dakel so aliwan maliket ed trabaho da. Akatulong ed siak so desisyon kon manpayunir pian naiwasan iray pakakadismayaan ed sekular ya trabaho, tan nagmaliw ya maliket so bilay ko diad dakel iran taon na panlilingkor kod si Jehova.”

9. Akin ya talagan nakomendaan iray kabataan?

⁹ Talagan nakomendaan iray nilibon kabataan ed nanduruman kongregasyon diad interon mundo. Akasentro so bilay dad si Jehova tan ed saray goal dad espiritual. Nai-enjoy day bilay da legan dan uunoren so panangigiya nen Jehova diad amin ya gagawaen da, kaiba lay edukasyon, trabaho, tan responsabilidad ed pamilya. “Manmatalek ka ed si Jehova diad interon pusom,” so insulat nen Solomon. “Diad amin a dalan mo et sikatoy nonoten mo, tan gawaen ton maptek iray basbas mo.” (Pro. 3:5, 6) Sikayo ran kabataan, inar-aro kayon maong nen Jehova! Mabmabli kayod sikato, sikayoy protektaan, igiya, tan bendisyonan to.

MANPARAAN YA MAONG ED PAMPULONG

10. (a) Akin ya nepeg tayon iprayuridad so panagpulong? (b) Antoy gawaen tayo pian magmaliw tayon epektibo ed panagpulong?

¹⁰ Say sakey ya kabataan ya akapokus diad pamaliket ed si Jehova et manunad bilay to so ministeryo. Indanet nen Jesu-Kristo ya “kaukolan a nipulong nin unona so maong a balita.” (Mar. 13:10) Lapud apuraan lay panagpulong a kimey, nepeg tayon iprayuridad itan. Sarag mo kasin gawaen ya goal so mabetbet ya pibiang ed ministeryo? Sarag mo kasi manpayunir? Panon to balet no agmo nai-enjoy so manpulong? Tan antoy gawaen mo pian magmaliw kan mas epektibo ed panagpulong? Makatulong iyan duaran paraan: Manparaan ya maong, tan agka onsasawa ya ibangat ed arum so nanaaralan mo. Ompan agmo ilaloan so liket ya naliknam no manpupulong ka.

11, 12. (a) Antoy nayarin gawaen na saray kabataan pian akaparaan iran manpulong? (b) Panon ya inusar na sakey ya kabataan so pankanawnawa ton makapampulong ed eskuelaan?

¹¹ Nayarin igapom diad pananap na ebat ed maslak ya itetepet na kaeskuelam singa say tepet ya, “Akin et manisia kad Dios?” Wala ray artikulo ed website tayon jw.org ya makatulong ed saray kabataan pian naamtaan da no panon dan ebatan itan ya tepet. Nengnengen ed BANGAT NA BIBLIA > TINEDYER. Nanengneng mo ditan so worksheet ya “Akin et Manisia Ak ed Dios?” Makatulong itan ya worksheet pian niparaan moy ebat mo. Ditan et walay taloran teksto ya sarag mon usaren no ipaliwawam so papanisiaan mo, saraya et Hebreo 3:4, Roma 1:20, tan Salmo 139:14. No usaren mo irayan worksheet, niparaan moy ebat ed nanduruman tepet.​—Basaen so 1 Pedro 3:15.

¹² No walay pankanawnawam, ibagam ed saray kaeskuelam ya nengnengen da so jw.org ya website tayo. Ontan so ginawa nen Luca. Nen aaralen dad klase ra so nanduruman relihyon, naimano tod libro da ya wala ray aliwan duga ya ibabaga na satan nipaakar ed Saray Tasi nen Jehova. Anggano mannerbiyos, impatanir tod maestra to ya labay ton ipaliwawa no akin ya aliwa iray arum ya akasulat ed libro, tan sikatoy pinayagan da. Aglabat impaliwawa nen Luca iray papanisiaan to, impanengneng to met so website tayod interon klase. Imbaga na maestra ya asainmin na kada estudyante so pambantay ed whiteboard animation ya Taloen so Bully ya Agmilalaban. Malikeliket si Luca ta sikatoy akapampulong ed klase ra.

13. Akin ya importantin agtayo onsusuko no wala ray onsabin subok?

¹³ Agka onsusuko, anggan no maminsan et wala ray mairap ya nadalan mo. (2 Tim. 4:2) No wala ray onsabin subok, itultuloy mo labat ya gawaen iray goal mo. Si Katharina et manedad na 17 nen ginawa ton goal ya pulongan so amin ya katrabaho to. Walay lakin aminpigan nan-insulto ed sikato, balet intultuloy toy goal to. Anggano onman so gagawaen ed sikato, siansian maong so ugalin ipapanengneng to. Naimano itan na sananey nin katrabaho to ya si Hans. Kanian binasa to ray publikasyon tayo, nampaiyaral na Biblia, tan abautismoan. Inmalis lad saman na pantratrabahoan si Katharina kanian agto la amta iman ya agawa. Imadyin mo pa labat so liket to nen kalabas na 13 taon, legan ton kaabay so pamilya to diad Kingdom Hall, impakabat na tsirman so bisitan manpaliwawa—si Hans! Maong labat ta agtinmunda si Katharina ed goal to ya pulongan iray katrabaho to!

MANSIANSIAN AKAPOKUS

14, 15. (a) Antoy nepeg ya tandaan na saray kabataan no walay man-pressure ed sikara? (b) Panon ya nalabanan na saray kabataan so pampre-pressure na arum?

¹⁴ Seguradon apaseseg ka ed sayan artikulo ya ipokus so bilay mod panaglingkor ed si Jehova. Labay ton ibaga, saray goal mod espiritual so magmaliw lan sentro na bilay mo. Saray arum ya kaedad mo et nayarin akapokus ed panliliket, tan posiblin imbitaan da kan milad sikara. Nasabin nasabi ya kaukolan mon ipanengneng ya talagan agmanguman so determinasyon mon gawaen so goal mo. Mansiansian akapokus anggano piliten ka na arum ya gawaen so labay da. Tutal, no isipen mo lamet may ilustrasyon nipaakar ed bus, seguradon agka onlugan ed bus ya anggan iner labat so laen to, lapu labat ta mani-enjoy iray akalugan ditan.

¹⁵ Dakel so paraan pian nalabanan moy pampre-pressure na arum. Singa bilang, iwasan mo ray situasyon ya antam ya natukso ka. (Pro. 22:3) Tan nonot mon lanang iray makapuy ya resulta no miulop kad saramay mauges so impluensya ra. (Gal. 6:7) Makatulong met no aminen mo ya kaukolan mo ray panonot. No mapaabeba ka, mainomay mon awaten iray bilin na atateng mo tan panonot na saray maespiritual ya agagi ed kongregasyon.​—Basaen so 1 Pedro 5:5, 6.

16. Mangiter na eksperiensya a mangipapanengneng ya importante so pagmaliw ya mapaabeba.

¹⁶ Akatulong ed si Christoph so pagmaliw ya mapaabeba pian awaten toy simbawa na arum. Ag-abayag kayari na bautismo to, sikatoy regular ya oonlan man-gym. Sikatoy kokombinsien na arum ya kabataan ditan ya milad sports club da. Intongtong to iya ed sakey ya elder, tan imbaga tod sikato ya antis ya mandesisyon et nonoten to ni ray peligro, a singa say pagmaliw ya makompetensia. Balet akila nin siansia si Christoph ed sports club. Pero anengneng to lanlamang ya marawal itan ya sport, tan mapeligro ni ingen. Sikatoy akitongtong lamet ed pigaran elder, amin da et angiter na simbawa manlapud Biblia. “Angibaki si Jehova na maong iran managsimbawa, tan Sikatoy dinengel ko, anggano medyo pinabayag ko ni.” Kasin mapaabeba ka met ya mangawat na simbawa?

17, 18. (a) Antoy labay nen Jehova parad saray kabataan natan? (b) Anto ray nayarin pagbabawian na arum ya adulto, tan panon iyan naiwasan? Mangiter na alimbawa.

¹⁷ “Manliket ka, O kalangweran a laki [o bii], legan a wala ka nid kalangweran, tan manliket komon so pusom diad saray agew na inkatobonbalom.” (Ecl. 11:9) On, labay nen Jehova ya magmaliw kan maliket legan ya kabataan ka ni. Indanet na sayan artikulo so sakey ya paraan no panon ya nagawa itan. Mansiansia kan akapokus ed saray goal mod espiritual, ipilam si Jehova ed amin ya planom. No ugaw ka ni et gawaen mo la itan, tampol mon naeksperiensya so panangigiya, proteksion, tan bendisyon nen Jehova. Isip mo ray balibalin simbawa ya nabasad Salita na Dios, tan ipapusom iyan bilin: “Nonot mo sirin so Makapadinayew a Manamalsam legan a wala ka nid kalangweran.”​—Ecl. 12:1.

¹⁸ Saray kabataan et ontatken lanlamang. Maples iran magmaliw ya adulto. Makapaermen balet ta dakel ya adulto so magbabawi ta aliway pinili dan goal nen ugaw ni ra, tan say mas makapadismaya ni ingen et anggapon balot so goal da. Balet saray kabataan natan ya mansiasiansian akapokus ed saray goal dad espiritual et maabig so pansumpalan da anggad itatken da lapud dugay desisyon da. Ontan so agawad si Mirjana, ya nen tinedyer ni et talagan marunong ed sports. Sikatoy naimbitaan ni ingen ed Winter Olympic ­Games balet mas pinili toy manlingkor ya full-time. Kalabas na masulok ya 30 taon, siansia nin manlilingkor ya full-time si Mirjana, kaibay asawa to. Imbaga to: “Say inkasikat, dayew, pakayari, tan kayamanan et temporaryo tan ataptapew iran goal ed bilay. Say talagan mabmabli tan manbayag ya goal et say panlingkor ed Dios tan say pibiang diad itulong ed saray totoo ya nakabat day Dios.”

19. Isumaryo iray gunggona no say sakey et akapokus ed saray goal tod espiritual legan ya ugaw ni.

¹⁹ Talagan nakomendaan iray kabataan ed kongregasyon ya mansiasiansian akapokus ed panlilingkor dad si Jehova anggano wala ray subok ya aarapen da. Gagawaen da iya diad pankikimey dan abeten iray goal dad espiritual tan iyuuna dad bilay da so panagpulong a kimey. Sakey ni, determinado iran agmanpaimpluensya ed sayan mundo. Makaseguro iray kabataan ya nabawbawi day pansasagpot da. Susuportaan ira na maaron agagi, tan no imatalek dad si Jehova so antokaman a gawaen da, seguradon nasumpal iray plano da.