No Agnanmatoor so Asawam

“Labay ko lay ompatey nen naamtaan kon insalat ak nen asawak ed mas ugaw. Aloko ak, lalo la no nanononotan ko ray sakripisyok parad sikato.”—Maria, Spain.

“Nen biglan tinaynan ak nen asawak, pakaliknak et inateyan ak. Aderal so pangarap mi, ilalo, tan saray plano mi. Wala ray agew ya say amtak et ayos ak la, insan biglan ompawil so sakit ya aliknak.”—Bill, Spain.

TALAGAN ansakisakit no tinaynan ka na asawam. Tua, wala ra may naperdona day magbabawin asawa da tan nipawil lamet so relasyon da.a Balet balanglan nipawil ni odino andi la so relasyon na sanasawa, saramay naamtaan dan agnanmatoor so asawa ra et makaliknay graben ermen tan sakit na liknaan. Panon dan nasarag itan?

SARAY BERSIKULO ED BIBLIA YA MAKATULONG

Anggan ansakisakit so alikna na saray biktiman asawa, dakel ed sikara so aligliwa ed ibabagay Biblia. Naaralan da ya iimanoen na Dios so iyaakis da tan sikatoy mililikna ed sikara.—Malaquias 2:13-16.

“Sanen nadadaeg ak na saray kapagaan, niligliwa tan pinakalma mo ak.”—Salmo 94:19.

“Legan kon babasaen iyan bersikulo, naiimadyin koy Jehova ya papakalmaen toy liknaan ko, singa gagawaen na maar-aron ama,” so nanonotan nen Bill.

“Diad samay matoor et onkikiwas kan matoor.”—Salmo 18:25.

“Agnanmatoor so asawak,” so imbaga nen Carmen, ya say asawa to et nan-bii ed pigay bulan. “Balet napanmatalkan koy Jehova ta matoor. Agto ak balot taynan.”

“Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew . . . tan say kareenan na Dios a palumbasan toy amin a pakatalos so manbantay ed saray puso [yo].”—Filipos 4:6, 7.

“Paulit-ulit kon babasaen irayan bersikulo,” so imbaga nen Sasha. “Kada no manpipikasi ak, iikdan ak na Dios na kareenan na nonot.”

Amin irayan abitla et alikna dan labay da lay onsuko no maminsan. Balet nanmatalek irad si Jehova a Dios tan binmiskeg ira lapud Salita to, say Biblia. Oniay imbaga nen Bill: “Lapud pananisiak, walay direksion na bilay ko anggano singa la aderal itan. Anggano asalik so nanakar ed ‘ambilbilunget a dalan,’ kaibak so Dios.”—Salmo 23:4.

a Parad impormasyon no kasin mamerdona odino andi, nengnengen so serye na “Kapag Nagtataksil ang Isang Kabiyak” diad Gumising! ya Abril 22, 1999.

No Antoy Ginawa na Arum

Dalepdepen iray makaligliwan teksto ed Biblia.

Oniay impaliwawa nen Bill: “Binasak so libron Job insan say Salmo. Ginulisan ko ray salitan dugaruga ed situasyon ko. Atalosan ko ya saray nansulat ed Biblia et akalikna met manaya na onian klase na ermen tan sakit na liknaan ya singa aliknak.”

Mandengel na musika.

“No agak makaugip na labi, ondedengel ak na musika. Makaligliwa iyan maong,” so nanonotan nen Carmen. Imbaga nen Daniel: “Nanaral ak ya man-gitara tan say musika so tinmulong ed siak pian naliknak so deen na nonot.”

Ibagam ed arum so naliliknam.

“Agak apasal ya ibagay naliliknak,” so imbaga nen Daniel. “Balet wala ray maong ya kakaarok, tan inagew-agew ak ya mitotongtong ed sikara. Ibabalikas kod sikara no antoy naliliknak, balanglan diad sulat odino diad personal. Talagan akatulong itan ed siak.” Imbaga nen Sasha: “Baleg so nitulong na pamilyak. Lanang ya wadtan si nanay ko. No labay koy mitongtong, wadtan ya ondengel ed siak. Impalikna met nen tatay ko ya inar-aro da ak, tan tinulongan da ak ya kalkalnan makabangon.”

Manpikasin naynay.

“Naynay ak ya manpipikasi,” so kuan nen Carmen. “Pakaliknak et wala labat ed abay ko so Dios, ya ondedengel tan ontutulong ed siak. Diad sayan mairap a panaon, inmapit so relasyon ko ed Dios.”