No Walay Graben Sakit Mo

“Nen naamtaan ko ya walay lung tan colon cancer ko, amtak ya agla ombayag so bilay ko. Balet kasempet kod abung manlapud doktor, inisip ko, ‘Tua, agko ’ya iilaloan, pero kaukolan koy manggaway paraan pian nasarag ko iya.’”—Linda, mantaon na 71.

“Walay graben sakit ko ya apektado iray nerve na kawigin lupak tan manotot. No maminsan, grabe so sakit to kanian na-depress ak. Aminpigan aliknak ya bukbukor ko tan inisip ko ni ingey manbikkel.”—Elise, mantaon na 49.

Lakin mansasakit ya aka-wheelchair ya kaiba to ray inad-aro to

NO A-DIAGNOSE ka odino say inad-arom na makapatey ya sakit, antam ya talagan makapaaburido itan. Likud ed samay sakit ya mismo, apektado met so emosyon. Lalo kan natatakot tan napagaan lapud makapanerbiyos iran appointment ed doktor, mairap so makalmoy paraan tan ibayar ed pampatambal, odino aliwliway epekto na saray tambal. No naynay ya nonoten so graben sakit, makapakapuy itan.

Iner so pangalaan tayoy tulong? Dakel so aligliwan maong lapud pampipikasi rad Dios tan pambabasa day makaligliwa iran mensahe ya walad Biblia. Makatulong met so panangaro tan suporta na kapamilya tan kakaaro.

NO ANTOY GINAWA NA ARUM

“Manmatalek kad Dios,” so kuan nen Robert ya mantaon na 58, “tan tulongan to ka pian nasarag mo itan. Manpikasi kad si Jehova. Ibagam ed sikatoy naliliknam. Kerew kay masanton espiritu. Patulongan kad sikato ya magmaliw kan positibo tan makapabiskeg ed pamilyam tan mansiansian kalmado legan mon aanosan so sakit mo.

“Baleg so nitulong na pamilyam no wadtan ira parad sika pian tulongan da kad emosyonal a paraan. Kada agew, makakaawat ak na sakey odino duaran tawag tan itepet da, ‘Kumusta ka la?’ Napapabiskeg ak met na saray kaarok ya walad nanduruman lugar. Onliligsa ak, tan ontutulong itan pian agak onsuko.”

No ompasyar kad kaarom ya mansasakit, tandaan mo ’yay imbaga nen Linda: “Seguradon say labay na pasyente et normal nin siansiay bilay to ya singa dati tan ompan agto labay ya naynay ya pantongtongan so sakit to. Kanian say itongtong mo et saramay kaslakan ya pantotongtongan yo.”

Diad tulong na Dios tan ligliwan manlalapud Biblia, kaiba lay suporta na maaron kapamilya tan kakaaro, makaseguro tayo ya walay kana na bilay, anggano walay graben sakit tayo.

Saray Bersikulo ed Biblia ya Makatulong

Manmatalek ed Dios.

“Tinmupleg ak ed si Jehova, tan inebatan to ak. Imbulos to ak ed amin a pakatatakotan ko. Sayan pakaskasi et tinmawag, tan nadngel nen Jehova.”—Salmo 34:4, 6.

Inkuan nen Linda ya abitla niman: “Agkon balot ipipikasi ya, ‘Paabig yo ak la.’ Say lanang kon ipipikasi et, ‘Pabiskeg yoy liknaan ko tan tulongan yo ak ya nasarag koy sakit ko.’”

Basaen so Biblia pian napabiskeg ka.

“Anggapoy manaayam ditan a mangibagay: ‘Mansasakit ak.’”—Isaias 33:24.

Manilalo ed makapabiskeg iran promisa na Dios ya nagawad arapen.

Patulongan kad kapamilyam tan kakaarom.

“Say tuan kaaro et mangaaro ed amin a panaon, tan sakey ya agi a nailaloan diad panaon na gonigon.”—Proverbio 17:17.

“Agmo iyaarawi so sarilim,” so imbaga nen Elise ya abitla niman. “Patulongan kad saray kakaarom. Ompan wala ray panaon ya say pakaliknam et bukbukor mo tan agka dedengelen na Dios, balet agmo iyaarawi so sarilim.”