Antoy Gawaen Mo Pian Nawalaan Kay Sankaabigan ya Bilay?

ALIWAN onian klase na bilay so labay na Dios parad sikatayo. Ginawa toy dalin pian napano na totoon manrerespeto ed inkasoberano na Amalsa, manpapaigiya ed sikato, tan mangaalig ed panangaro tan arum nin balibalin kualidad to. Labay na Dios ya maliket iran mantutulongan legan dan aasikasoen iray pamilya da, didiskobrien iray balon bengatla, tan pagmamaliwen ya paraiso so interon dalin.

INSIPAN NA DIOS YA SUMPALEN TOY GAGALA TO PARAD DALIN

• “Papatundaen to ray guerra diad interon dalin.”​—Salmo 46:9.

• “Sinmabi so aturon panaon . . . pian deralen iramay manederal ed dalin.”​—Apocalipsis 11:18.

• “Anggapoy manaayam ditan a mangibagay: ‘Mansasakit ak.’”​—Isaias 33:24.

• “Sigpot a panliketan na saray pinilik so kimey na saray lima ra.”​—Isaias 65:22.

Panon ya nasumpal irayan propesiya? Tinuro na Dios so Anak ton si Jesus pian magmaliw ya Ari ed perpekton gobierno ed tawen ya manuley ed interon dalin. Satan ya gobierno et tinawag na Biblia ya Panarian na Dios. (Daniel 2:44) Oniay ibabaga na Biblia nipaakar ed si Jesus: “Iter nen Jehova a Dios ed sikato so trono . . . , tan sikatoy manuley ya andi-anggaan bilang Ari.”​—Lucas 1:32, 33.

Nen wadiad dalin si Jesus, sikatoy nanggawa na dakdakel ya milagro pian ipanengneng ya sarag ton ikdan na sankaabigan ya bilay iray totoo no sikato la so Manuley.

IMPANENGNENG NEN JESUS IRAY GAWAEN TO PARAD MAUNOR YA TOTOO

• Pinaabig toy amin ya klase na sakit pian ipanengneng no panon ton ekalen so amin ya sakit na totoo.​—Mateo 9:35.

• Pinadeen toy dayat pian ipanengneng ya protektaan to ray totoo diad pangontrol to ed kalikasan.​—Marcos 4:36-39.

• Pinakan to iray nilibon totoo pian ipanengneng ya itarya toy amin ya pankaukolan na totoo.​—Marcos 6:41-44.

• Pinagmaliw ton alak so danum diad sakey a bansal pian ipanengneng ya tulongan to ray totoon magmaliw ya maliket.​—Juan 2:7-11.

Antoy gawaen mo pian niwalad sika so bilay ya labay na Dios parad saray totoo ya mangaaro ed sikato? Walay “dalan” ya kaukolan mon naromog. Imbaga na Biblia ya “makisir so dalan ya ompugta ed bilay, tan daiset so makakaromog ed satan.”​—Mateo 7:14.

NO PANON MON NAROMOG SO DALAN YA MAMAARAP ED SANKAABIGAN YA BILAY

Anto so dalan ya ompugta ed bilay? Imbaga na Dios: “Siak si Jehova a Dios mo, say mangibabangat ed sika pian nagunggonaan ka, say mangiwawanwan ed sika diad dalan a nepeg mon panakaran.” (Isaias 48:17) No unoren mo iray ganggan na Dios, niwalad sika so sankaabigan ya bilay.

Imbaga nen Jesus: “Siak so dalan tan say katuaan tan say bilay.” (Juan 14:6) Kaukolan mon panisiaan iray katuaan ya imbangat nen Jesus tan nepeg mon aligen so alimbawa to pian onapit ka ed Dios tan nagunggonaan ka.

Panon mon naromog so dalan ya ompugta ed bilay? Amayamay so relihyon, balet angiter na pasakbay si Jesus: “Aliwan balang sakey ya ontatawag ed siak na, ‘Katawan, Katawan,’ et makaloob ed Panarian na tawen, noagta saman labat so manggagawa ed linawa nen Amak a walad tawen.” (Mateo 7:21) Imbaga to met: “Nabidbir yo ra ed saray bunga ra.” (Mateo 7:16) Natulongan ka na Biblia ya nabidbir so dugan panagdayew tan nibiig so palson panagdayew.​—Juan 17:17.

Panon kan makapanakar ed dalan ya ompugta ed bilay? Kaukolan mon kabaten so Angiter na bilay: Siopa? Antoy ngaran to? Anto ray ugali to? Antoy gagawaen to? Antoy labay ton gawaen tayo?a

Labay na Dios ya saray totoo et aglabat mantrabaho, mangan, manggalaw, tan manpamilya. Sarag tayon kabaten so Amalsa ed sikatayo tan magmaliw ya kaaro to. Nipanengneng tayon sikatoy inaro tayo no gawaen tayo ray panlabayan to. Imbaga nen Jesus: “Saya so mankabaliksay bilay ya andi-anggaan, a kabaten da ka, say saksakey a tuan Dios.”​—Juan 17:3.

SAY UNONA YA NEPEG MON GAWAEN

No naamtaan mo ray panlabayan na Dios, nayarin wala ray kaukolan mon umanen ed bilay mo. Ompan singa mairap iratan. Balet diad tua et makapaliket iratan ta atan so unona ya nepeg mon gawaen pian makapanakar ka ed dalan ya ompugta ed bilay. Pian naamtaan moy ebat ed saray importantin tepet nipaakar ed Dios, mangiyoopresi iray Tasi nen Jehova na libren panagaral na Biblia diad oras tan pasen ya labay mo. Sarag mo kamin kontaken diad panamegley na website mi ya www.jw.org/pag.