Igeba so Amin ya Panagkatunongan a Sumpad Kakabatan Nipaakar ed Dios!

1. Anton pasakbay so insulat nen apostol Pablo parad saray alanaan ya Kristiano?

“AGKAYO la manpapaimpluensya ed sayan sistema na mundo,” so impasakbay nen apostol Pablo. (Roma 12:2) Insulat itan nen Pablo parad saray Kristiano nen inmunan siglo. Akin et ontan kapuersa so bilin to ed saray lalaki tan bibii ya dedikado ed Dios tan alanaan na masanton espiritu?​—Roma 1:7.

2-3. Antoy gagawaen nen Satanas pian ibeneg tayoy Jehova, balet panon tayon ekalen iray bengatlan “malmalet ya akaletneg” ed nonot tayo?

² Naaburido si Pablo lapud wala ray Kristiano ya naimpluensyaan na makapuy ya panagkatunongan tan pilosopiya ya ibabangat na mundo nen Satanas. (Efe. 4:17-19) Posiblin nagawa met itan ed sikatayo. Si Satanas so dios na sayan sistema na mundo, tan talagan labay to ya ibeneg tayoy Jehova, kanian nanduruma so uusaren ton pakana. Singa bilang, no walay makasarilin ambisyon tayo odino labay tayoy magmaliw ya sikat, anamoten to itan. Nayarin usaren to ni ingen iray apasalan tayo, kultura, odino edukasyon tayo pian naalig tayoy panagnonot to.

³ Kasin sarag tayon ekalen ed nonot tayo iray bengatlan “malmalet ya akaletneg”? (2 Cor. 10:4) Imanoen so ebat nen Pablo: “Igegeba mi ray panagkatunongan tan amin ya atagey a bengatla a sumpad kakabatan nipaakar ed Dios, tan dadaegen mi so balang kanonotan pian magmaliw itan a matulok ed Kristo.” (2 Cor. 10:5) On, sarag tayon ekalen iray makapuy ya panagkatunongan odino ugali tayo diad tulong nen Jehova. No panon ya say tambal et sarag ton ekalen so epekto na samal, say Salita na Dios et makatulong pian naekal tayod nonot tayo so makasamal ya impluensya na mundo nen Satanas.

‘PANGUMAN ED PANAGNONOT YO’

4. Anto ran pananguman so ginawa na dakel ed sikatayo nen inawat tayoy katuaan?

⁴ Isipen pa iray pananguman ya ginawam nen inawat moy katuaan ya walad Salita na Dios tan nandesisyon kan manlingkor ed si Jehova. Intunda na dakel ed sikatayo iray makapuy ya kagagawa. (1 Cor. 6:9-11) Misalsalamat tayo ed si Jehova ta tinulongan to tayon nitunda iratan!

5. Anton duaran bengatla so ibabaga na Roma 12:2 ya gawaen tayo?

⁵ Balet, agtayo komon magmamaliw ya kampante. Anggano intunda tayo lay manggawa na seryoson kasalanan ya datin gagawaen tayo antis tayon nampabautismo, kaukolan tayo nin siansia so mansagpot pian agtayo natukson pawilen iratan. Anto sirin so gawaen tayo? Imbaga nen Pablo: “Agkayo la manpapaimpluensya ed sayan sistema na mundo, noagta manpasimbalo kayo diad panguman yo ed panagnonot yo.” (Roma 12:2) Kanian walay duaran bengatla ya nepeg tayon gawaen. Unona, ‘agtayo la manpapaimpluensya’ ed sayan mundo. Komadua, ‘manpasimbalo tayo’ diad panguman ed panagnonot tayo.

6. Antoy naaralan tayo ed samay imbaga nen Jesus ya walad Mateo 12:43-45?

⁶ Say pamasimbalo ya tutukoyen nen Pablo et aliwa labat ya panguman ed itsura. Lalanoren na satan so interon inkatoo tayo. (Nengnengen so kahon ya “Nampasimbalo o Mankunkunwari?”) Kaukolan tayon umanen so panagnonot tayo​—saray panmoria, liknaan, tan pilalek tayo. Kanian tepetan tayoy sarili tayo, ‘Kasin saray pananguman ya gagawaen ko pian naalig koy Kristo et samay nanengneng labat na arum, odino talagan uumanen ko so pusok tan nonot ko?’ Nanengneng ed samay imbaga nen Jesus ya walad Mateo 12:43-45 no antoy nepeg ya gawaen. (Basaen.) Walay importantin naaralan tayo ed satan ya imbaga to: Agtayo labat ekalen so mauges iran kanonotan; nepeg tayon salatan iratan na kanonotan ya labay na Dios.

“PASIMBALOEN SO PARAAN NA PANAGNONOT YO”

7. Panon tayon umanen so inkatoo tayo?

⁷ Kasin sarag tayon umanen so inkatoo tayo? Ibabaga na Salita na Dios: “Nepeg yon itultuloy a pasimbaloen so paraan na panagnonot yo, tan nepeg yon isulong so balon personalidad a pinalsa unong ed linawa na Dios tan mitunosan ed saray kakaukolanen na tuan inkatunong tan katooran.” (Efe. 4:23, 24) Sarag tayo sirin ya umanen so inkatoo tayo, balet aliwa iyan mainomay. Agtayo labat nepeg ya labanan iray mauges ya pilalek tan kagagawa, noagta nepeg tayon umanen so “paraan na panagnonot” tayo. Kaibad satan so panguman ed saray pilalek, ugali, tan motibo tayo. Kaukolan ya tuloytuloy tayon gawaen itan.

8-9. Panon ya idadanet na eksperiensya na sakey ya brother ya kaukolan tayon umanen so inkatoo tayo?

⁸ Imanoen tayo so alimbawa na sakey a brother ya datin bayolenti. Sikatoy mainum na alak tan lanang ya manaanap na laban. Balet intunda to la iratan ya kagagawa tan nagmaliw ya kualipikado parad bautismo. Baleg itan ya pantasi ed lugar da. Balet sakey ya labi ag-abayag kayari na impanpabautismo to, sikatoy nipaarap ed subok ya agto inilaloan. Walay abuek ya laki ya linmad abung to tan aangaten ton milaban iyan brother. Nen unaan, akontrol na brother so liknaan to. Balet nen binalaw na laki si Jehova, agla akontrol na brother so sanok to. Sikatoy pinmaway tan binugbog to may laki. Akin et ontay agawa? Tua, akatulong so impanaral to na Biblia pian nakontrol toy tendensia to ya milaban, balet agto ni nauman so paraan na panagnonot to. Diad arum ya salita, agto ni nauman so inkatoo to.

⁹ Balet agsinmuko iyan brother. (Pro. 24:16) Diad tulong na saray elder, nantultuloy ya inmaligwas. Sinmabi panaon, sikatoy nagmaliw ya elder. Insan sakey ya labi, diad paway na Kingdom Hall et sikatoy nipaarap lamet ed parehon subok. Walay abuek ya laki ya labay ton bugbogen so sakey ed saray elder diman. Antoy ginawa to may brother? Sikatoy mapaabeba tan mauyamo ya akitongtong ed samay lakin abuek, pinakalma to, tan tinulongan to ni ingen ya makasempet. Akin et duma lay reaksion to? Inuman la na brother so paraan na panagnonot to. Nauman so inkatoo to​—talagan nagmaliw lan mikakareenan tan mapaabeba. Angiter itan na dayew ed si Jehova!

10. Antoy kaukolan pian nagawaan tayo irayan pananguman?

¹⁰ Sarayan pananguman et aliwan automatiko odino tampol ya nagawa. Kaukolan tayon gawaen so “anggaay nayarian” tayo, nayarin diad loob na dakel ya taon. (2 Ped. 1:5) Agmet itan akadepende ed kabayag tayo la ed katuaan. Kaukolan ya mansagpot tayon maong pian nauman so inkatoo tayo. Wala ray pigaran makatulong ed sikatayo. Konsideraen tayo iratan.

NO PANON TAYON UMANEN SO PARAAN NA PANAGNONOT TAYO

11. Panon ya makatulong so pikakasi pian nauman tayoy paraan na panagnonot tayo?

¹¹ Say unona ya makatulong ed sikatayo et say pikakasi. Kaukolan tayon ipikasi imay singa kinerew na salmista: “Gawam pan malinis so pusok, O Dios, tan ikdan mo ak na sakey a balo tan mapekder ya espiritu.” (Sal. 51:10) Nepeg tayon bidbiren ya kaukolan tayon umanen so paraan na panagnonot tayo tan kerewen tayoy tulong nen Jehova. Akin et makaseguro tayo ya tulongan itayo nen Jehova ya manguman? Napaseseg tayo ed samay insipan nen Jehova ed saray benger ya Israelita diad panaon nen Ezequiel: “Ikdan ko ra na nankakasakey a puso, tan iyan kod sikara so balon espiritu . . . tan ikdan ko ray anlemek a puso, [salanti, sakey a puson matulok ed panangiwanwan na Dios].” (Eze. 11:19; paimanod leksab) Labalabay nen Jehova ya tulongan iraman ya Israelita ya manguman, tan labalabay to tayo met ya tulongan.

12-13. (a) Base ed Salmo 119:59, antoy nepeg tayon dalepdepen? (b) Anto ray nepeg mon itepet ed sarilim?

¹² Say komadua ya makatulong et say panagdalepdep. Legan tayon babasaen so Salita na Dios kada agew, kaukolan tayon dalepdepen odino isipen a maong no anto ran kanonotan tan liknaan so nepeg tayon umanen. (Basaen so Salmo 119:59; Heb. 4:12; Sant. 1:25) Usisaen tayoy sarili tayo no kasin naimpluensyaan tayo la na saray pilosopiya na mundo. Kaukolan tayon bidbiren ya wala ray kakapuyan tayo tan mansagpot tayon ekalen iratan.

¹³ Singa bilang, tepetan moy sarilim: ‘Kasin walay anggan daiset ya ibeg odino imon ed pusok?’ (1 Ped. 2:1) ‘Kasin say pakaliknak et mas maong ak nen say arum lapud nanlapuan ko, atagey so inaral ko, odino lapud mainaway bilay ko?’ (Pro. 16:5) ‘Kasin abebbeba so pakanengneng kod arum ya duma so kipapasen da ed bilay odino duma so lahi ra?’ (Sant. 2:2-4) ‘Kasin nasasagyat ak ed saray iyoopresi na mundo nen Satanas?’ (1 Juan 2:15-17) ‘Kasin labalabay ko iray imoral tan marawal ya panagligliwaan?’ (Sal. 97:10; 101:3; Amos 5:15) Say ebat mo ed saratan a tepet et makatulong pian naamtaan mo no anto ray nepeg mon umanen. No mansagpot tayon ekalen iray kanonotan tan liknaan a “malmalet ya akaletneg” ed puso tayo, napaliket tayo so Ama tayo ed tawen.​—Sal. 19:14.

14. Akin et importante so pampili na saray maong a kaulop?

¹⁴ Say komatlo ya makatulong et say pampili na saray maong a kaulop. Balanglan nalilikas tayo o andi, baleg so impluensya na saray pipiulopan tayo. (Pro. 13:20) Diad trabaho odino diad eskuelaan, nayarin apaliberan tayo na saray totoo ya agmakatulong ed sikatayon mannonot ed paraan ya labay na Dios. Balet makalmo tayo na sankamaongan iran kakaaro diad saray Kristianon pantitipon. Ditan itayo napapakiwas ya “mangaro tan manggaway maabig iran kimey.”​—Heb. 10:24, 25, paimanod leksab.

MANSIANSIA YA “MALET ED PANANISIA”

15-16. Panon ya sasalien nen Satanas ya umanen so panagnonot tayo?

¹⁵ Balet tandaan ya determinadoy Satanas ya umanen so panagnonot tayo. Uusaren to so amin a klase na panagkatunongan pian deralen so maong ya epekto na Salita na Dios ed panagnonot tayo.

¹⁶ Anggad natan et siansia nin itetepet nen Satanas imay singa intepet tod si Eva diad hardin na Eden: “Talaga ta’n imbaga na Dios ya . . . ?” (Gen. 3:1) Diad sayan mundo ya kokontrolen nen Satanas, mabetbet tayon narerengel iray tepet ya nayarin pansengegan na panduaruwa tayo, singa say: ‘Talaga ta’n aglabay na Dios so pankasal na parehon laki o parehon bii? Talaga ta’n aglabay na Dios ya selebraan yoy Krismas tan birthday? Talaga ta’n ibabawal na Dios yo so pampasaksak na dala? Talaga ta’n igaganggan ed sikayo na maaron Dios ya agyo piulopan so adispelo ya kapamilya odino kaaro yo?’

17. Antoy nepeg tayon gawaen ed saray importantin tepet ya nayarin pansengegan na panduaruwa tayo, tan antoy magmaliw a resulta ya singa nabasa ed Colosas 2:6, 7?

¹⁷ Kaukolan ya kombinsido tayo ed saray papanisiaan tayo. No agtayo anapen iray ebat ed saray importantin tepet nipaakar ed saray papanisiaan tayo, ompan pansengegan itan na panduaruwa tayo. Tan kalkalna ya napikewet so panagnonot tayo tan onkapuy so pananisia tayo. Anto sirin so nepeg tayon gawaen? Ibabagad sikatayo na Salita na Dios ya umanen tayoy panagnonot tayo, pian paneknekan tayod sarili tayo so “maong tan makapaliket tan ayadyarin linawa na Dios.” (Roma 12:2) No regular tayon manaral, napaneknekan tayod sarili tayo ya tua iray nanaaralan tayo ed Biblia tan magmaliw tayon kombinsido ya duga iray estandarte nen Jehova. Diad ontan et mansiansia tayon “malet ed pananisia,” a singa kiew ya aralem a nilamot.​—Basaen so Colosas 2:6, 7.

18. Antoy ontulong ed sikatayo pian naekal ed nonot tayo iray makasamal ya impluensya na mundo nen Satanas?

¹⁸ Anggapoy arum ya mansagpot parad sika pian mansiansian malet so pananisiam, noagta sikan mismo. Kanian tuloytuloy mon pasimbaloen so paraan na panagnonot mo. Manpikasi kan naynay; kerew moy tulong na espiritu nen Jehova. Mandalepdep ka tan tuloytuloy mon usisaen so panagnonot mo tan motibom. Pilim iray maong a kakaaro; miulop kad saramay makatulong ed sika ya nauman so panagnonot mo. No gawaen mo iratan, naekal mod nonot mo iray makasamal ya impluensya na mundo nen Satanas tan segurado ya nigebam iray “panagkatunongan tan amin ya atagey a bengatla a sumpad kakabatan nipaakar ed Dios.”​—2 Cor. 10:5.