“Bibii a Makulin Mankikimey ed Katawan”
1 Diad saratan a salitan nibaga ed tagey, deneskribe nen Pablo si Trifena tan Trifosa, duaran makukulin agagin bibii ed kongregasyon na Roma. Say sakey ni et si Persis, ya oniay inkuan met nen Pablo nipaakar ed sikato: “Dakel so impansagpot to ed Katawan.” Paborabli met so impanaglawi to ed si Febe bilang “manangiyagel na dakel.” (Roma 16:2, 12) Diad Kasulatan, abitla si Dorcas bilang sakey a “napno na maong a gawa tan payabol a ginagawa to.” (Gawa 9:36) Agaylan bendision iray maespiritual a bibii ed kongregasyon!
2 Kasin papablien tayoray agagin bibii a makulin mankikimey ed kongregasyon tayo? Baleg so nagagawaan da ed panagpulong a kimey, ed panangikondukta na dakel a panangiyaral na Biblia, tan ontutulong ed dakel a balo ni. Malaglaem met so nauusar dan panaon diad panulong ed saray ugugaw pian onaligwas ed espiritual. Gagawaen na Kristianon bibii so betang da diad pamabiskeg ed espirituy aro, gayaga, deen, tan seseg diad loob na kongregasyon. Mitutulongan ira ed dakel a paraan ta pian say kaasawaan da tan arum a membro na pamilya ra so nagkalalon makapanlingkor ed si Jehova.
3 Agagin Bibii ed Sigpot-Panaon a Serbisyo: Kaiba ed saraman so mansasagpot a maong parad Katawan et saray misionaryon agagin bibii, a dakel ed sikara so angigapo na kimey ed arum iran bansa. Diad saray kongregasyon a panlilingkoran na kaasawaan da, saray kaasawaan na saray managbiahen manangasikaso so okupado ed lawak na ministeryo tan mamapaseseg ed dakel ya agagin bibii. Ontan met ed saray agagin bibii ed Bethel, a maseseg a manusumpal ed sagradon serbisyo bilang suporta ed organisasyon nen Jehova. Wadtan met iray regular payunir tayo ya agagin bibii, ya ontutulong ed nilibo a makaaral na katuaan, diad panamegley na matoor iran sagpot da diad pangidayew ed Dios.
4 Sarayan matoor a bibii so makagamor na pirmin kapenek lapud dilin-panagsakripisyon dalan na bilay da. (1 Tim. 6:6, 8) Sikaray makanepegan na komendasyon tan antokaman a panamaseseg tan suporta a niiter tayo ed sikara.
5 Saray Kristianon bibii so mablin kayarian ed organisasyon nen Jehova, a manggagawa na matoor a serbisyo a kabendisionan na amin. Itultuloy tayo komon a pablien irayan bibii tan ipikasi so panamendision nen Jehova ed sikara leleg a sikaray mantutultuloy a “makulin mankikimey ed Katawan.”