Onkerew na Tulong
1 Say apuyanan a balikas a “mairap a pidenengan” et matukotukoy a manideskribe ed mapeligron panaon tayo. (2 Tim. 3:1, NW) Kanian, anto so nayarin gawaen yo sano nipaarap kayo ed mairap iran angat ed espiritual a liknaen yon agyo sarag ya arapen?
2 Kasin mabulos kayon mitongtong ed matakken ed espiritual a membro na kongregasyon? Nayarin masuyat so arum a manggawa ed satan lapud nababaingan, agto labay so manpaskar, odino manduaruwa a walay talagan makatulong. Tua, kaukolan tayon panggunaetan ya asikasoen iray personal a responsabilidad tayo ed anggaay nayarian tayo, balet ta kaukolan a lawas itayon mabulos a patulongan ed saray pamaakaran a mangilalanor ed espiritual a kipapasen tayo.—Gal. 6:2, 5.
3 Siopay Pangibagaan: Nayarin labay moy mitongtong ed konduktor na panagaral na libro tan kerewen no nayarin makapiulop ka ed sikato ed lawak na kimeyan. Mangiter iya ed sika na pankanawnawan ibaga ed sikato a pilalek moy onaligwas ed espiritual. No sikato so ministeryal a lingkor, ipaantam ed sikato a kaukolan moy tulong ed espiritual diad ontan nakerew to ed saray mamatatken a tulongan da ka. Odino nayarian moy mitongtong ed anggan siopa ed saray mamatatken nipaakar ed say kapapagaan mo.
4 Anton klase na tulong so kaukolan mo? Kasin walay bengatlan mamapakapuy ed seseg mo? Kasin sakey kan mansusulon ateng a panggugunaetan mon onapit iray ananak mo ed kongregasyon? Kasin sikay maedad la a mankaukolay tulong? Odino kasin walaray problema a kadidismayaan mo? Nayarin mairap so mideneng ed mapeligro iran panaon tayo—balet ta aliwan imposibli. Walay akaparaan a tulong.
5 No Panon a Makatulong Iray Mamatakken: Talagan mangiyaansakit iray mamatatken. Talinengen da iray kapapagaan yo. No nipaarap so arum a manangipalapag ed mipadpara iran babeng, ikonsidera iya na mamatatken legan dan papastolan tan babangatan so kongregasyon. Bilang ‘pinagkauliran a tumboken na saray pulok,’ sikaray akaparaan a kaiba yon mankimey tekep na gayaga. (1 Ped. 5:3) Say italineng ed sarayan eksperiensiadon agagi diad pangikakatunongan da ed saray prinsipyo na Biblia so mamaaligwas ed ministeryo yo tan makatulong itan ed personal a bilay yo.—2 Tim. 3:16, 17.
6 Impagamor nen Jesus ed sikatayo so dakel “iran langkap a tugyopen na lalaki.” (Efe. 4:8, NW, paimano’d leksab) Kabaliksan na saya a sipaparaan lawas iray mamatatken a manlingkor ed sikayo. Akaparaan iran ontulong ed sikayo. Diad ontan, sikaray “kayarian yo.” (1 Cor. 3:21-23) Kanian imbes a manpareen, mansalita kayo. Onkerew na tulong a kaukolan yo.