Kasin Walaan Kayo na Espiritu na Dilin-Panagsakripisyo?
1 Say panamabli ed andi-siblet a ginawa nen Jesu-Kristo parad katooan so nepeg a mamakiwas ed sikatayon amin pian usaren iray abilidad, kasil, tan biskeg tayo diad dilin-panagsakripisyon paraan. Mikakasi ed sikatayo so Kasulatan: “Ipatnag yo so saray laman yo a mabilay a bagat, masantos, makapaliket ed Dios, ta sikato so maespiritu a lingkor yo.” (Roma 12:1) Say panapanaon a dilin-panangusisa so ontulong ed sikayon naimano no kasin sigpot yon nipapanengneng itan a klase na espiritu legan ya iyaabuloy na saray sirkumstansia yo.
2 Diad Pangala na Pikakabat ed Biblia: Kasin angigana kayo la na panaon parad personal a panagbasa tan panagaral ed Biblia a regular? Kasin tutumboken yo itan ya eskedyul? Kasin niyugali yo lay pamparaan a maong parad saray miting ed kongregasyon? No sikayo so ulo na pamilya, kasin walay regular a panagaral yo na Biblia a kaibay sankaabungan yo? Say panggawa ed saya so mankaukolay pangisakripisyo ed panaon ed panagbantay na telebisyon odino panag-computer odino diad arum nin kimey. Anggaman ontan, melag lambengat itan ya isakripisyo, ta say panaon ya usaren parad Salita na Dios so makapangitonton ed sikayo diad andi-anggaan a bilay!—Juan 17:3.
3 Diad Pangipasal ed Ananak Yo: Say sankaabigan a panaon pian makaaral la ed kurson dilin-panagsakripisyo et diad inkaugaw. Ibangat yo iray ananak yo ya anggaman walay panaon parad panggalaw, nepeg a wala met so panaon parad pankimey tan parad saray teokratikon aktibidad. (Efe. 6:4) Ikdan ira na makanan trabaho ed abung. Iletneg so regular ya eskedyul a kaiba iran manpulong. Paletan so bilin yo diad dilin maabig ya alimbawa yo.
4 Diad Saray Aktibidad na Kongregasyon: Onaligwas so kongregasyon sano amin a membro et mabulos a mansakripisyo a manumpal ed saray bengatlan kagunggunaan na amin. (Heb. 13:16) Kasin posibli ed sikayon usarey malaglaem a panaon diad kimey na panangipulong ed Panarian tan panaggaway babangatan? Kasin makapanboluntaryo kayo pian ontulong ed mansasakit odino maedad la, a nayarin samaren iran miaral?
5 Sakbay a nanggaway kaunoran ya impansakripisyo ed bilay to bilang too, sinimbawa nen Jesus iray babangatan to ya iyapasakey day kamataan da ed intereses na Panarian, a pagmaliwen a segundaryo so amin a bengatla ed bilay da. (Mat. 6:33) Say panggegemtan ed ontan ya awawey na dilin-panagsakripisyo so mangiter ed sikatayo na babaleg a liket leleg ya itultuloy tayoy manlingkor a maliket ed si Jehova.