Tepet

◼ Sioparay nepeg a mangawat na lapel badge card parad distrito kombension?

Saray lapel badge card parad kombension so makatulong a maong ed pakabidbir ed agagi tayo tan diad kipalapag na kombension. Balet, aglabat la basta ibunog ed anggan siopa. Ipabidbir na saratan imay angipeket bilang walaan na maabig a talindeg dia ed partikular a kongregasyon na Tastasi nen Jehova.

Walay espasyo na card parad pangisulatay ngaran na sakey ontan met ed ngaran na kongregasyon. Kanian, kaukolan a say too et mililimog la ed nibagan kongregasyon. Ipatulor na Sosyedad so suplay na saray card ed kada kongregasyon base’d pedidon naawat a walad Special Order Blank parad saray porma. Sano manpedido, kaukolan a nonoten na saray kongregasyon a say nepeg labat ya ikdan na card et saray bautismado tan agbautismado a manangipalapag ya onatendi ed kombension. Ontan met, saray ananak tan arum niran regular ya onaatendi ed saray miting ed kongregasyon tan saramay sarag da lay mibiang ed lawak na ministeryo so nayarin makaawat na sakey. Agmanepeg ya ikdan na lapel badge card parad kombension so adispelosip.

Sano wala laray card, nepeg ya imanoen na mamatatken a saratan so nibunog a mitunosan ed sarayan totontonen.