Saray Miting so Makagungguna ed Saray Kalangweran
1 Inkuan na sakey a tin-edyer a marikit: “No maminsan et isipen kon saray kalangweran so manasagmak na sankairapan a panaon ed bilay. Apaliberan kami na totoon milalawanan, mandrudruga, tan maniinum.” Ontan kasi so liknaan mo? No ontan, antoy padesir mon makatulong ed sikan nalabanan irayan mauges ya impluensia? Nakaukolan moy pananisia, mabiskeg a pananisia unong ed maptek iran dalan nen Jehova, ta no anggapo itan et ‘sikatoy agnayarian a paliketen.’ (Heb. 11:6) Say iyatendi ed saray miting ed kongregasyon so ontulong ed sikan napabiskeg iray kombiksion tan determinasyon mo bilang Kristiano pian arawiay mauges.
2 Dakel so Nagamoran Mo ed Saray Miting: Antoy makatulong pian napanggayagaan so mananam a putahi a kaibay maapit a kakaaro? Agta say pangikasakey ed masustansian tagano ed say maliket a panuulop diad relaks a kaliberliber? Bueno, ontan met so maliket a naeksperiensia ed saray miting tayo, balet ta diad espiritual a pantalos.
3 Saray bengatlan nasisingbat ed saray miting so makapabiskeg, a saglawien toray pamaakaran ed inagew-agew a problema ed bilay ontan met la’d panaral ed saray makapasagyat a propesiya na Biblia. Nipresenta so praktikal a bilin a mangibangat ed sika no panoy sankaabigan a pambilay mo tan pian natalonaan mo iray angat a kipaarapan mo. Sankaabigan ed anggan iner a pasen iray nakakalimog ed saray miting, tan say espiritual a kipapasen so makapaliket tan maligen. (Sal. 133:1) Agpankelawan ya inkuan na sakey a tobonbalo: “Sanagew ak a walad eskuelaan, tan nadedesdes ak. Balet saray miting so singano mabunan pasen ed desierto a ditan et narerepreskoan ak pian makapansungdo diad eskuelaan.” Inkuan ni na sakey: “Nalmoan kon say maapit a pililimog ed saramay mangaaro ed si Jehova so akatulong ed siak a mansiansian maapit ed sikato.”
4 No akapanpalista ka la ed Teokratikon Eskuelaan Parad Panagministro, naaralan moy panugyop na impormasyon ed Biblia, a tibukelen itan a paliwawa, insan ipresenta itan a singa labat la mitotongtong ed arap na dumerengel diad Kingdom Hall. Isipen pay gungguna na marundunong a kipasal a manbangat nipaakar ed saray manangisalbay bilay a katuaan diad Salitay Dios! Iner ni kasi so pakaromogan na kalangweran na ontanlan mabmablin panangipasal?
5 No Panon a Nagunggunaan a Maong ed Saray Miting: Pian nagunggunaan a maong ed saray miting, walay taloran makanan bengatla a nasasaglawi. Saraya et say panagparaan, pibibiang, tan pangikana.
6 Iparaan Iratan: Mangiganay panaon diad regular a pamparaan parad saray miting. Ag-aabuloyan a say kimey ed eskuelaan, part-time a trabaho, odino panliliket so manamsam ed panaon a kaukolan mo diad panrepason masakbay ed materyal a singbaten ed kada miting. Makatulong so pakawalaan na maabig a rotina. Say manuna, tan importanti’d amin et say pibansag ed eskedyul na sinimban babasaen ed Biblia parad Teokratikon Eskuelaan Parad Panagministro. Mankaukolay pigara labat a minuto ed kada agew so pambasa tan pandalepdep ed ni-asain iran kapitulo. Mangigana na panaon a pamparaan parad Panagaral na Libro ed Kongregasyon tan say Panagaral na Panag-Bantayan. Ontan so gagawaen na arum, sakey odino duay agew sakbay na sarayan miting. No nayadyari, ontan met so gawaen ed saray parti a niyeskedyul ed Service Meeting kada simba.
7 Mibiang ed Saratan: Inkuan na Biblia a diad taon ton 12, aromog si Jesus ed templo ya ontatalineng, mantetepet, tan oneebat. (Luc. 2:46, 47) Diad arum a panangibaga, sikatoy sigpot ya akibiang. Lalo kan nagunggunaan ed saray miting sano panggunaetan moy mibiang ed saratan.—Uli. 15:23.
8 Kaukolan mon dengelen a maong so nibabangat ed saray miting. No maminsan et mairap so italineng ed sakey a paliwawa nen say pampaliwawa. Akin? Nayarin manteyengteyeng so kanonotan mo sano walay manpapaliwawa. Panon mon labanan iya? Diad panamegley na pannota. Isulat iray importantin punto a kaliktan mon usaren ed saginonor. Say pannota so ontulong ed sikan niteen so kanonotan mo ed programa. Ontan met, nengnengen iray teksto, tan tumboken iratan leleg a babasaen na espiker.
9 Niarum ni, gawaen a kalat so pibiang ed tepet tan ebat a diskusyon ed saray miting. Nagkalalo kan nagunggunaan no nonoten mon maong so labay mon ibaga. Inkuan na Uliran 15:28: “Say puso na maptek aralen to so onebat.”
10 Ikanam so Naaralan Mo: Say unor a kundang et say paneguron say naaralan mo et ‘onkana ed sika.’ (1 Tes. 2:13, NW) Leleg ya iyaaplikam iray maabig a punton naaralan mo ed kada miting, lalo kan onapit ed si Jehova a Dios. Sikatoy magmaliw a peteg ed sika, tan naeksperiensiam so baleg a gayaga tan kapenek leleg kan ‘manaakar ed katuaan,’ a kayarianen mo itan.—3 Juan 4.
11 Sikayoran agagin kalangweran, diad regular a pamparaan ed saray miting, pibiang ed saratan, tan pangikana ed naaaralan yo, napanggayagaan yon sigpot iray miting. Ontan met, nagamoran yon amin so gungguna manlapud saratan. Napabiskeg so pananisia yo, diad pandesisyon yo a mansiansian matoor ed mangatatawen ya Ama yo, si Jehova.—Sal. 145:18.