Motekteken Iray Makapakelkelaw a Kimey na Dios
1 Diad loob na ekselentin taloy agew, nantitipon itayo diad “Mananumpal na Salitay Dios” a Distriton Kombension. Nilibangan tayo ni iray agew-agew a kapagaan ed bilay tan insentro so imano tayo ed saray makapakelkelaw a kimey nen Jehova. Panon itayon nagunggunaan manlapud saray bengatlan nibangat ed sikatayo?—Juan 13:17.
2 Tutuloken na Saray Pamilya so Salitay Dios: Say simposium a “Magmaliw a Matulok ed Salitay Dios” so tinmulong ed sikatayo a mangusisa ed espiritual a kipapasen na saray pamilya tayo. Labalabay na ananak so makaaral. Kanian, pinaseseg iray maridios ya atateng a gawaen dan pundasyon so panagaral na pamilya ed Biblia parad kipaalagey na mabiskeg ed espiritual a sankaabungan. Sisingbaten na dakel ya ulo na pamilya ed ananak da so balon brosyur a Nayarian Moy Magmaliw a Kaaro na Dios! Ontulong iya ed sikara pian nabayuboan da so maliket tan maligen a siglaotan ed si Jehova. Sikayoran atateng, ibangat yoray ananak yo no panon so panmotektek ed saray liknaan na Dios. Ipatnag yo so dilin panangaro yo ed sikato tan ed saray gagawaen to. (Sal. 103:2) Mankakasakey a kimeyan so pangiletneg tan pakadampot ed espiritual iran kalat tan sigpot a pibiang ed panaglingkor ed si Jehova.
3 Liliwawaan na Salitay Dios so Dalan Tayo: Agaylan makapaliket so pakaawat ed kompleton New World Translation ed Tagalog tan impakadngel a magano met lan niwala itan diad Cebuano tan Iloko! Aliketan itayo met ya angawat ed balon libro ya Isaiah’s Prophecy—Light for All Mankind I. Kaunongan lay abasa yo ed sayan unonan tomo? Ipapasakbay na libron Isaias iray panangukom ed saray agmaridios a nasyon ontan met ed masnag iran bendision na Panarian parad totoo na Dios. (Isa. 34:2; 35:10) Pabiskegen met na satan so pananisia tan kompiyansa tayo ed si Jehova tan ed paraan a panggagawa to ed saray bengatla.—Isa. 12:2-5.
4 Sano babasaen yo so Isaiah’s Prophecy I, naimano yo lan unona no panon a minantini nen Isaias so integridad to ed si Jehova anggaman sikatoy apaliberan na karelmengan. Sanen ninatnat ed si Isaias so imbitasyon a magmaliw a mensahero na Dios, inkuanto: “Wadia ak; ibaki moak.” (Isa. 6:8) Diad pandalepdep ed mabulos ya awawey to et napaseseg kayo a mantultuloy ed panangipulong na maong a balita, a sigpot a mibiang ed ‘panagtasi ed amin a nasyon.’—Mat. 24:14, NW.
5 Say panmotektek tayo ed saray kimey nen Jehova so mangitandoro ed inkatalonggaring to. Kanian pablien so pribilihyon pagmaliw a mananumpal na salitay Dios!