Mangipapagamor si Jehova na Biskeg
1 Antoy pangipasen yo ed si apostol Pablo? Legan tayon babasaen so libro na Gawa, naapresia tayo no panoy inkakuli to ed serbisyo ed si Jehova. Panon ya asumpal nen Pablo so amin a ginawa to? Inkuanto: “Nayarian ko a gawaen so ganagana ed saman so mamabiskeg ed siak.” (Fil. 4:13) Nagunggunaan itayo met manlapud biskeg ya ipapagamor nen Jehova. Panon? Diad panganamot ed anemiran probisyon ya intarya to ed sikatayo pian onkasil tan ombiskeg itayo ed espiritual.
2 Salitay Dios: No panon a nepeg itayon mangan na tagano pian mansiansian mabiskeg so laman tayo, nepeg a taganoen tayo so inkasikatayo na Salitay Dios ta pian mansiansia itayon mabilay ed espiritual a paraan. (Mat. 4:4) Mangitatarya na biskeg so Biblia ya ontulong ed sikatayo. Pian namantini tayoy seseg tan ligsa tayo ed katuaan, kaukolan tayo so makabaliksan a personal a panagaral tan panagdalepdep, inagew-agew no nayadyari.—Sal. 1:2, 3.
3 Pikakasi: Importanti so iyasingger ed si Jehova, nagkalalo la ed panaon na nikaduman pankaukolan. Diad panamegley na espiritu to, papabiskegen to iramay onkekerew ed sikato na satan diad pikakasi. (Luc. 11:13; Efe. 3:16) Papasesegen itayo na Kasulatan a “mantultuloy ed pikakasi.” (Roma 12:12, NW) Kasin gagawaen yo itan?
4 Say Kongregasyon: Makagamor tayo met na biskeg tan panamaseseg manlapud saray miting ed kongregasyon tan maligsan pililimog ed agagi tayo. (Heb. 10:24, 25) Sano walay problema tayo, sikaray mamaseseg ed sikatayo tan maaron ontulong ed sikatayo.—Uli. 17:17; Ecl. 4:10.
5 Say Lawak na Ministeryo: Say regular a pibibiang ed ministeryo so ontulong ed sikatayo pian mansiansian akasentro so imano tayo ed Panarian tan saray bendision na satan. Napabiskeg so espiritu tayo sano tulongan tayoy arum a makaaral nipaakar ed si Jehova. (Gawa 20:35) Aliwan amin ed sikatayo so makapanlingkor ed lugar a walay babaleg a pankaukolan odino mibiang ed sigpot-panaon a serbisyo, balet diad arum a paraan et nayarian tayo so nawalaan na makabaliksan a pibibiang ed ministeryo.—Heb. 6:10-12.
6 Saray Kristianon Manangasikaso: Nagunggunaan itayo manlapud panamaseseg tan tulong na saray mamatatken. Sikaray pinabtangan nen Jehova a manpastol ed pulok na Dios a walad panangasikaso ra. (1 Ped. 5:2) Saray managbiahen manangasikaso so mamapabiskeg ed saray kongregasyon a panlilingkoran da, unong a ginawa met nen Pablo diad panaon to.—Roma 1:11, 12.
7 Ehemplo na Saray Matoor: Makapabiskeg so pangonsidera ed makapaseseg iran ehemplo na matoor a kaparan komikimey, nensaman tan natan. (Heb. 12:1) No kaukolan yo so panamabiskeg, akin ya agmanbasa na sakey ed saray makapaseseg ya istorya ed bilay diad saray magasin tayo, makapabiskeg a report ed Yearbook, odino pigaran makapaliket iran salaysay na modernon panaon ya awaran na Tastasi nen Jehova diad libron Proclaimers?
8 Sakey ya agin laki, natan et wala la’d kapegleyan a 90 años to so angawat ed katuaan sanen malangwer ni. Sanen tobonbalo ni, asubok so pananisia to. Pilimero, pigaran aktibo a mililimog ed kongregasyon so angikaindan ed organisasyon nen Jehova. Insan wadtan so panagkabkaabungan a kimey, a naimano ton mairap. Anggaman ontan, lawas a sikatoy nanmatalek ed si Jehova. Ag-abayag et nanggayagaan toy ministeryo. Tan natan? Anggaman ed makapuy lan bunigas to, sikato nin siansia so membro na pamilyay Bethel ed Brooklyn, a manlilingkor bilang sakey ed Mananguley ya Ulop. Agto pagbabawian so impansiansia to ed organisasyon nen Jehova.
9 Sakey ya agin bii a membro na pamilyay Bethel diad Britanya so abautismoan sanen mantaon na 13. Sikatoy ginmapon nampayunir kaibay kuya to diad tinmumbok a taon, tan kayari sakey taon, say ama to so nipriso lapud neutral a talindeg to legan na Guerra Mundial II. Nansiansian nanmatalek iyan agin bii ed si Jehova parad biskeg, tan sikatoy nantultuloy a nanlingkor ed tuan Dios. Asabi panaon, sikatoy akiasawa ed sakey a matoor ya agi, tan sikaran dua so nantultuloy ed panggagawa na linawa nen Jehova. Kayari 35 a taon na panamaley, say masiken to so biglan inatey. Sikatoy nanilalo lamet ed biskeg a manlapud si Jehova, tan sikatoy nantultuloy ed panaglingkor to anggad natan, a maniilalo a manlingkor ed ando lan ando bilang kabiangan na mangaraldalin a pamilya nen Jehova.
10 Tutulongan tan papabiskegen nen Jehova iray matoor a lingkor to. “Sikato mangiter na pakayari ed makapuy; et saman so andian na pakapanyari sikato so parakelan to na biskeg.” Makagamor itayo manlapud sayan anggapoy geter a lapuan na biskeg diad panganamot ed amin ya anemiran probisyon ya asalambit ed tagey. Tandaan: “Saray manalagar ed Jehova pasimbaloen to so biskeg da. . . . Ombatik ira naani, tan ag-ira nakesawan; manakar ira naani, tan ag-ira onkapuy.” (Isa. 40:29-31) Nanmatalek a maong si Pablo ed si Jehova parad biskeg, tan ontan met so nepeg tayon gawaen.