“Diad Dios Ami’ Bengabengatla Nayari”
1 Say manunan kimey na Kristianon kongregasyon et say pangipulong ed mensahe na Panarian diad sankamundoan. (Mat. 24:14) Satan so abalbaleg a kimey. Parad dakel a makakaimano, ompatnag a mankaukolan itan na abilidad a mas ni nen say walad sikatayo. Parad arum et ngalngalin agda natebek so pakapangisumpal ed sayan kimey lapud sikatayoy puntirya na panagludlurey, isusumpa, tan panamasegsegang. (Mat. 24:9; 2 Tim. 3:12) Kombinsido iray manduaruwa ya imposiblin nagawaan iyan kimey. Balet, inkuan nen Jesus: “Diad Dios ami’ bengabengatla nayari.”—Mat. 19:26.
2 Maabig Iran Alimbawa ya Aligen: Inggapo nen Jesus so ministeryo to bilang sakey a toon susumpaen na mundo. Diad panasalin amperen so itatalona to, saray sumusumpa so angikana na amin a naisip dan panamabaing ed sikato, a diad kaunoran et sikatoy anagmak na makapaot-ot ya ipapatey. Ingen, diad kasampotan, matalek ya inyabawag nen Jesus: “Tinalok so mundo.” (Juan 16:33) Talagan makapakelkelaw ya agawaan!
3 Saray babangatan nen Jesus so angipanengneng na ontan met a makpel ya awawey tan seseg ed Kristianon ministeryo. Dakel so alewet, pinekpek, impriso, tan pinatey ni ingen. Balet, sikaray ‘malikeliket lapud kinmana ra a nantepel na baing ed ngaran nen Jesus.’ (Gawa 5:41) Anggaman ed saray posiblin nagawa sumpad sikara, agawaan da so singa imposiblin kimey a panangipulong na maong a balita “angga ed kasampotan na dalin.”—Gawa 1:8; Col. 1:23.
4 No Panon ya Ontalona ed Panaon Tayo: Sikatayo met so maseseg ya angawat ed kimey a panangipulong na Panarian anggaman ed singa imposibli iran nagawa. Anggaman ed saray pananebel, panamasegsegang, panangipangaw, tan arum niran marawal a panasalin pamatunda ed sikatayo et ontatalona itayo. Panon a posibli iya? “Agnisengeg ed kabayanian, odino dia ed pakayari, noag ingen dia ed espirituk, kuan nen Jehova na saray ehersito.” (Zac. 4:6) Anggapo so makapatunda ed kimey tayo lapud walad benegan tayo si Jehova!—Roma 8:31.
5 Sano manpulong itayo, andian itayo na rason pian ombaing, ontakot, odino liknaen ya agtayo sarag. (2 Cor. 2:16, 17) Walaan itayo na matalonggaring a rason pian mantultuloy ed pangikayat na maong a balita na Panarian. Diad tulong nen Jehova, nagawaan tayo so “imposibli”!—Luc. 18:27, NW.