Mantasi Bilang Maong a Kaparan Too
1 Inkuan nen Jesus ya “aroen mo so kaparam a too unong ed sikan dili.” (Mat. 22:39) Andi-duaruwan ‘manggagawa [ka] na maabig’ ed saray kapananisiaan, balet kasin napalaknab mo ni so arom ed saraman so totoon walad kakaabay mo? (Gal. 6:10) Diad antoran dalan?
2 Diad Pangipakabat Mo ed Inkasika: Kasin kabat na kakaabay mo a sakey kan Tasi? No andi, akin ya agdalawen ira kaleganay lawak na serbisyo? Saray resulta so nayarin manurprisa ed sika! Odino no liknaen mon mas komportabli ka, panggunaetan a pulongan ira diad impormal a paraan. Sano walad paway na abung, nayarin nanengneng mo ira a mankikimey ed sular da odino manaakar ed karsada. Asinggeran ira tan maligsan imisan. Panggunaetan ya itongtong so nipaakar ed pananisiam, say lugar na Kingdom Hall, tan no antoy nagagawa ditan, tan ipaamta ed sikato no siopa ni iray kakaabay ya onaatendi. Imbitaan ira ya onatendi ed saray miting. Magmaliw a determinado ed sigpot a pantasi nipaakar ed maong a balita ed balang sakey a kabat mo.—Gawa 10:42; 28:23.
3 Diad Napanuliranan a Konduktam: Baleg so nagawaan na makaaron konduktam diad pangipakabat ed sika tan nayarin mangilukas na dalan ed pakapanpulong mo. Satan met so ‘mamarakep ed panangibangat na Dios.’ (Tito 2:7, 10) Ipanengneng so puron interes ed saray kaabay mo. Magmaliw a makaaro tan makatalos. Respetoen so kanepegan da no nipaakar ed privacy tan mareen a kaliberliber da. No walay mansasakit ed sikara, magmaliw a makonsidera tan mangiyopresi na tulong. Sano walay pamilya a balon alis ed lugar yo, onsamar kayo tan abrasaen ira. Saratan a mapangasin kiwas so mangitilak na paborablin impresyon tan makapaliket ed si Jehova.—Heb. 13:16.
4 Diad Itsura na Sular tan Abung Yo: Say pagmaliw a maong a kaabay et mangilaktip ed pangasikaso yo ed abung ta pian presentabli itan. Sakey a pantasi ed sikara so malinis tan makapasagyat ya abung tan sular. Balet say abung a marutak odino atalangkab so nayarin mangisuawi ed mensahe na Panarian. Kanian, importanti a pansiansiaen a malinis tan maayos so abung, sular, tan saray luganan.
5 Say pangipanengneng na kapagaan ed saraman so walad paway na Kristianon kongregasyon so pakapatnagay panangaro ed saray kaabay yo. Antoy nayarin resulta? “Lapu ed saray maong a ginawgawa yo a naimatonan da,” posiblin arum ed sikara so ‘mangitandoro ed Dios.’—1 Ped. 2:12.