Kasin Makapanlingkor Ka ed Babaleg so Pankaukolan?

¹ Kasin naumameng mo la so iyalis ed lugar a walay pankaukolan parad dakel a manangipalapag na Panarian? No naimbitaan kan ‘onla . . . tan ontulong,’ kasin onkiwas ka a singa ginawa nen apostol Pablo? (Gawa 16:9, 10) Diad dakel a kongregasyon et wala so pankaukolan ed saray matakken ed espiritual a pamilya, saray payunir pian ontulong ed pangobre ed teritorya, odino kualipikadon mamatatken tan ministeryal iran lingkor ya ontulong a mangidaulo. Kasin mabulos kan onebat ed sayan pankaukolan? Panon a posibli so italona ed satan?

² Nakaukolan so Pananisia tan Talek: Diad panangiwanwan na Dios, tinaynan nen Abram so baley ton Ur tan binaroy toy 1,000 a kilometro ya amaarap ed Haran kaibay asawa to, kaanakan to, tan masiken lan ama to, si Tera. (Gen. 11:31, 32; Neh. 9:7) Kayari impatey nen Tera, ginanggan nen Jehova si Abram, diad saman et 75 años to la, pian taynan to so Haran tan saray kakanayon to tan manbiahe ed bansa ya ipanengneng ed sikato na Dios. Si Abram, Sarai, tan Lot et “nankurang ira.” (Gen. 12:1, 4, 5) Siempre, ag-inmalis si Abram pian manlingkor ed babaleg so pankaukolan parad saray ministro. Balet say inyalis to so nankaukolan na sakey a bengatla. Anto itan?

³ Kinaukolan so pananisia tan talek ed biang nen Abram pian nagawaan itan a niganggan ed sikato. Kaukolan ya umanen toy kaisipan tan paraan na kabibilay to. Kaukolan ton taynan so inkaligen ed limog na kakanayon to. Balet sikatoy nanmatalek ed si Jehova a mantalima ed sikato tan ed sankaabungan to. Dakel natan so mangipapatnag na panagmatalek da ed si Jehova diad mipadparan paraan.

⁴ Iyalis ed Saray Kongregasyon a Mankaukolan na Tulong: Dakel niray kongregasyon ed Pilipinas a kulang na saray mamatatken tan ministeryal a lingkor. No wala ka ed sakey a kongregasyon a dakel so matakken ed espiritual ya agagi tan labay mo so ontulong ed sananey a kongregasyon diad sirkito yo, maabig sirin no asinggeran moy manangasikaso na sirkito yo. Kabisado to so interon sirkito tan saray pankaukolan na satan tan nipaamta to ed sika no iner so pakatulongan mo. Mabetbet ya aasinggeran na saray managbiahen manangasikaso iray agagi no walay amta ran pankaukolan tan no inasinggeran da ka, kasin boluntaryo kan ontulong?

⁵ Temporaryo Iran Asainmin: Kasin nanggayagaan mo la so mayaman a bendisyon a resulta na impankimey ed agnapupulongan a teritorya, anggan magano labat? Aganggano ni, duara ed saray manangasikaso na sirkito tayo so namboluntaryo a mangusar ed simba a panagpayunir da pian iyareglo iray grupo na mabulos ya agagi a manpulong ed arawi iran teritorya diad saray sirkito ra ya agni akobrian ed loob la na dakel a taon. Kasin atumangan so sagpot da?

⁶ Sakey ed sarayan manangasikaso na sirkito so angitagar na 35 ya agagi pian onla ed arawi iran baryo diad nipalpalandey iran lugar. Sikaray nambabalon tan tinmuloy ira ed natuloyan da legan na sakey-simba a biahe ra. Say resulta? Sikaray dinmalaw ed totoo ya agni akapitongtong ed Tastasi ed loob na ngalngali 30 a taon. Sikaray akapangipalima na dagup a 60 a libro, 186 a magasin, 50 a brosyur, tan 287 a tract. Sikara met so akapangigapo na 74 a panangiyaral na Biblia. Antoy liknaan na saray agagi? Inkuan na manangasikaso na sirkito: “Sayan matalag a nagawa a panagpulong a kimey so aglabat amaelet ed inaagin aroan mi noagta amabiskeg met na pananisia mi ed si Jehova.” Nanliketan itan a maong na talora ed grupo tan sikaray apakiwas a man-regular payunir.

⁷ Say pangawat ed temporaryon asainmin pian manlingkor ed babaleg so pankaukolan so onkana ed sananey nin gagala. Saraman so manggawa ed satan so makagamor na makanan impormasyon pian ontulong ed sikaran ‘mankuenta ed bili’ diad iyalis da ed sananey a parte na bansa.​—Luc. 14:28, NW.

⁸ Iyalis ed Babaleg so Pankaukolan: Determinado si Jehova a niyabawag so maong a balita ed “sankamundoan” sakbay ya onsabi so anggaan. (Mat. 24:14) Diad pikabat ed saya, kasin mabulos kan onalis anggan diad paway na sirkito yo a babaleg so pankaukolan?

⁹ Kasin retirado ka la? Kasin walaan ka na maligen ya anapan? No andi, kasin niyareglom so dilin-anapan? No agka makaalis ed sananey a lugar, kasin natulongan moy sakey a membro na pamilya pian manlingkor ed arum a pasen?

¹⁰ No kayari na sipipikasin panangonsidera et liknaen mon nasarag moy angat ya onalis ed babaleg so pankaukolan, itongtong so pamaakaran ed pamilya yo tan ed saray mamatatken ed kongregasyon yo. Magmaong met ya isingbat itan ed manangasikaso na sirkito yo, lapud amta to iray asingger a lugar a mankaukolan na tulong. No pirawat mo so onalis ed mas arawi iran lugar, manggawa ka na sulat ed Service Department diad sangan opisina. Iter moy sulat mo ed saray mamatatken ta pian nitekep da iray obserbasyon tan rekomendasyon da sakbay ya ipawit itan ed Sosyedad.

¹¹ Antoy nepeg mon ilaktip ed sulat mo? Say edad mo, petsa na bautismom, saray responsabilidad mo ed kongregasyon, kipapasen mo ed panamaley, tan no kasin walaan ka na ankelag ya ananak. Importantin ibagam a sarag mon suportaan so inkasika ed pinansyal. Bitlaen iray probinsya a labay mon panserbian, unong ed personal a pankaukolan mo.

¹² Kasin saray sirkumstansyam so mangiyabuloy ed sika a manlingkor ed babaleg so pankaukolan? No ontan sirin et imanoen no panon a mantultuloy ya ikakalbo nen Jehova so mayaman iran bendisyon to ed saraman so manmatalek ed sikato legan dan ipapatnag so espiritu na dilin-panagsakripisyo!​—Sal. 34:8; Mal. 3:10.