Ilugar so Panagrelaks ed Kinepeg To
1 Diad sarayan mairap ya agew, amin tayo so mankakaukolan na panguman a magano ed gagawaen tayo a panapanaon. Say kabkaabigan a panagrelaks so manepeg. Balet, say alablabas a panaon ya uusaren ed panagrelaks, panligliwaan, tan panliliket so mamaraiset ed panaon ya uusaren na sakey parad espiritual iran gegemtan. Nepeg ya ilugar tayoy panagrelaks ed kinepeg to. (Mat. 5:3) Panon iyan posibli? Diad panumbok ed simbawa a naromog ed Efeso 5:15-17.
2 Mangigeter: Insulat nen Pablo a saray Kristiano so nepeg a “mansiansian akabantay” no panon a makabat so pambilay da. Nakaukolan so inkabalanse tan dangka pian limitaan so panagrelaks ed no anto so talagan nakaukolan. Maabig a nonoten tayon maong so panguusar tayo na libren panaon tayo. Say panligliwaan so nepeg a makagunggona imbes a kaperdian na panaon tayo odino pakabanalan tayo. No liknaen yon anggapoy agawaan, ag-apenek, tan magbabawi itayo kayari na impibiang ed sakey ya aktibidad, saya so pakapatnagan a kaukolan iray pananguman ed pangusar tayo na panaon.
3 Magmaliw a Makatunongan: Sinimbawa itayo nen Pablo pian “saliwen so pankanawnawan panaon” parad mas importante iran bengatla ed bilay, ya agmagmaliw ya “agmakatunongan.” Ag-isesentro na saray dedikadon Kristiano so kabibilay da ed panagrelaks. Anggaman say panagpainawa tan panagrelaks so mamakasil lamet ed laman tayo, say lapuan na espiritual a biskeg et say aktibon puersa na Dios. (Isa. 40:29-31) Nagamoran tayo so espiritu to panamegley na teokratiko iran aktibidad—panagaral ed Biblia, iyatendi ed saray miting ed kongregasyon, pampulong—aliwan diad panagligliwaan.
4 Iletneg Iray Prayuridad: Binilin nen Pablo iray Kristiano a ‘talosan no anto so linawa na Katawan.’ Imbangat nen Jesus a say aktibidades tayo so nepeg ya akasentro ed Panarian na Dios bilang prayuridad tayo ed bilay. (Mat. 6:33) Importante a gawaen tayon unona iray bengatla a mangitunos ed bilay tayo unong ed dedikasyon tayo ed si Jehova. Insan say panagrelaks so nayarin ilugar ed kinepeg to. Sano nagawaan itan, nawalaan itan na maabig ya epekto, tan lalon panliketan tayo itan.—Ecl. 5:12