Kasin Makasbel Itan ed Panagpulong?

¹ Maslak a totoo so walaan na okupadon kabibilay. Saray Tastasi nen Jehova so sakey ed saray sanka-okupadoan​—diad panaaral ed Salitay Dios, iyaatendi ed saray miting ed kongregasyon, tan diad panagpulong. Niarum ni, okupado itayo ed sekular a trabaho, kimey ed abung odino asainmin ed eskuelaan, tan dakel niran responsabilidad, ya amin na saratan et mangaala na panaon. Saya so nagkalalo lan makapaangat ed saray ulo na pamilya.

² Lapud agmaabig iran kipapasen ed ekonomya ed nanduruman pasen, nayarin saray ulo na sankaabungan so kaukolan a mantrabaho ed loob na dakel ya oras tan mipuligesgesan ed pananap na pambilay. No saray sekular a trabaho so mangaalay baleg a panaon tan biskeg da, daiset lay panaon da parad panagpulong. Lapud walaan iray obligasyon a manlegpet ed saray pamilya ra, arum so nayarin manlikna a limitado lambengat so pibiang da ed ministeryo. (1 Tim. 5:8) On, natan et dakel iray desdes nipaakar ed pakagamor na saray nakaukolan ed bilay. Balet say sekular a trabaho na sakey so agnepeg a makasbel ed pangipulong na maong a balita. (Mar. 13:10) Kanian, nepeg tayon usisaen so aktual a kipapasen tayo.

³ Lapud say kipapasen na mundo et lawas a manguuman, say ulo na pamilya so nayarin onkiling a mangusar na alablabas a panaon ed trabaho, diad gagalan makapantipon ed pinansyal ya onkana’d ag-iilaloan iran krisis. (1 Cor. 7:31) Anggaman makatulong so pakawalaan na dakel ya anapan parad ekstra iran materyal a bengatla odino kaaruman iran pankanawnawa parad panligliwaan odino panliliket, kasin saya so manggawa ed pamilya a mas maliket tan mas kontento no nisasakripisyo so panaon a parad espiritual iran gegemtan tan regular ya iyaatendi ed miting? Seguradon labay tayon paliisan so antokaman a mangipeligro ed espiritualidad tayo. Makabat a kurso so panumbok ed konseho nen Jesus a ‘mantipon na kayamanan ed tawen’ tan magmaliw a ‘mayaman ed Dios.’​—Mat. 6:19-21; Luc. 12:15-21.

⁴ Anapen ya Unona so Intereses na Panarian: Imbangat nen Jesus iray patumbok to a mangiyuna ed espiritual iran bengatla nen say amin nin arum a bengatla. Pinaseseg tora: “Agkayo sirin mapaga, ya ikuan yo, Anto kasi inumen mi? ono, Anto kasi pankawes mi?” Akin ya imbaga to itan? Impaliwawa to: “Say Ama yon mangatatawen amta to a nakaukolan yo so saraya ya amin a bengatla.” No talagan kombensido tayo ed satan, anggapoy makasbel ed sikatayo ed panggawa’d tinmumbok ya imbaga nen Jesus: “Ingen anapen yo nin unona so panarian, tan say inkatunong to; et amin iraya [nakakaukolan a materyal] a bengatla niarum ira ed sikayo.” Seguroen na Dios a walaan itayo na sarayan nakaukolan a bengatla! (Mat. 6:31-33) Talagan aliwan saya so panaon pian naabala ed agnakakaukolan a kapagaan ed pananap na pambilay odino diad pilalek a pakagamor na mainawan bilay ed sayan sistema na saray bengatla a magano lan napaso.​—1 Ped. 5:7; 1 Juan 2:15-17.

⁵ Say manunan gagala na sekular a trabaho et pian mangitarya na materyal iran nakaukolan na sakey. Balet kaunongan so nakaukolan tayo? Insulat nen apostol Pablo: “No wala siri pantagano tayo tan kawesen tayo pasaragen tayo komon iya.” Kasin panggugunaetan tayoy makagamor na nagkalalo ni nen say satan? No ontan, nayarin aanien tayo iray pansumpalan ya impasakbay nen Pablo: “Saray manpirawat ya onyaman napelag ira ed sakey a katuksoan tan say kalot tan dia ed saray dakel ya agum a maksay tan makaderal a kaalakan, a mangipalereg ed saray totoo ed kagegeba tan kababalang.” (1 Tim. 6:8, 9; Mat. 6:24; Luc. 14:33) Panon tayon nibaga a nasesebelan itayo na alablabas iran pilalek?

⁶ No nisengeg ed sekular iran gegemtan et walaan itayo labat na samet a pibibiang ed lawak na serbisyo odino onsaew a makatebek ed pankaukolan a manggawa na panagsakripisyo nisengeg ed maong a balita, diad ontan et nakaukolan tayon umanen iray prayuridad tayo. (Heb. 13:15, 16) Say simplin panagbilay so makatulong a maong ed pangipulisay ed sayan makasbel ed panagpulong tayo. Say intereses na Panarian so nepeg a lawas manunan prayuridad no nipaakar ed panangusar tayoy panaon tan biskeg tayo.

⁷ Say Sagpot ya Aliwan Maapa: Saray salita nen Pablo so mamaseseg ed sikatayo lawas a nawalaan na ‘daakan a kimey ed Katawan, bangta amta [tayo] a say kimey [tayo] et aliwa ya anggapo so kabaliksan to ed Katawan.’ (1 Cor. 15:58) Say sankamanunaan a ‘kimey ed Katawan’ et say panangipulong ed Panarian tan panaggaway babangatan a kimey. (Mat. 24:14; 28:19, 20) Pian sigpot a makapibiang no posibli, kaukolan tayon iyeskedyul so panaon tayo ed lawak na serbisyo kada simba tan panggunaetan ya ag-usaren itan a panaon ed arum a gegemtan. (Efe. 5:15-17) Sirin, nepeg ya agmakasbel so sekular a trabaho odino antokaman ni ed ministeryo tayo.

⁸ Sano mabulos itayon manginabang na saray katuaan na Biblia ed arum, naeksperiensya tayo so pirmin liket a resulta na panangiter. (Gawa 20:35) Diad panggemtan ed panagpulong a kimey, makapanilalo itayo ed arapen tekep na kompiyansa, “ta say Dios aliwan agmatunong pian nalingwanan to so gawa [tayo] tan say aro ya impanengneng [tayo] ed ngaran to.”​—Heb. 6:10.