“Iner so Pangalaan Ko na Panaon?”
1 Ontan so iyeey-ey na dakel ed sikatayo, lapud say kabibilay tayo so okupado na saray aktibidad. Nibabagan say panaon so sankablian tan sankapelesan ya onlalabas a kayarian tayo. Kanian iner so pangalaan tayo na panaon parad saray bengatla a talagan importante, a singa say panagbasa tan panagaral ed Salita na Dios?—Fil. 1:10.
2 Say tombok et, aliwan say panggunaet a pangala na dakel a panaon, noagta say pandeside no anto so labay tayon gawaen ed walan panaon tayo. Amin tayo so walaan na 168 ya oras ed loob na sakey simba, ngalngalin 100 ed satan so nauusar ed iyugip tan ed pantrabaho. Kanian panon tayon nausar a sankaabigan so nakekeraan iran oras? Irerekomenda na Efeso 5:15-17, unong ed New World Translation a manakar itayo ya “aliwan agmakabat a totoo noagta makabat a totoo, a saliwen so pankanawnawan panaon . . . tebeken no anto so linawa nen Jehova.” Ipapatnag na saya so pankaukolan na sigpot a pangusar ed kada pankanawnawa pian gawaen iray bengatla ya ibabaga nen Jehova a makana.
3 Inkompara nen Jesus so panaon tayo ed panaon nen Noe. (Luc. 17:26, 27) Saray totoo ed saman so okupado ed inagew-agew a kurang na bilay da. Anggaman ontan, impanaon nen Noe so pangipaalagey na abalbaleg a biong tan panagpulong. (Heb. 11:7; 2 Ped. 2:5) Panon? Diad impangiyuna to ed linawa na Dios tan diad intulok ed sikato diad panggawa na saray bengatla, ya “ontan so ginawa to.”—Gen. 6:22.
4 Anto so Nepeg ya Iyuna? Inkuan nen Jesus: “Aliwa a say tinapay labat so napambilay na too noag say amin a salitan ombesngaw ed sangi’ Dios.” (Mat. 4:4) Kada simba, makakagamor itayo na “magenap [ya espiritual] a tagano ed dugan panaon.” (Luc. 12:42, NW) Saya so mankakaukolan na regular ya eskedyul ed personal a panagbasa tan panagaral pian natalosan itan ya amin no labay tayoy peteg a nagunggonaan. Lapud pisasalamat ed espiritual a tagano, agtayo ipapasen itan a singa fast food, a maganat a kanen. Imbes, say manepeg a pisasalamat so mamakiwas ed sikatayon mangigana na malaem a panaon ed panagaral tan panggayagaan iray espiritual a bengatla.
5 Say pangala na espiritual a tagano so mangitonton ed andi-anggaan a bilay. (Juan 17:3) Makanepegan itan na manunan lugar ed inagew-agew ya eskedyul tayo. Kasin nilugaran tayo na panaon so inagew-agew a panagbasa ed Biblia tan panagparaan parad saray Kristianon miting? On, nilugaran tayo. Diad ontan et naawat tayo so “baleg a tumang” a resulta na pangamta tan panggawa ed linawa na Dios.—Sal. 19:7-11.